កីឡា៣ប្រភេទដែលកម្ពុជាទទួលបានមេដាយមាសច្រើនជាងគេ

ព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះមានកីឡា៣៧ប្រភេទដែលបានលើកយកមកប្រកួត។ ក្នុងចំណោមប្រភេទកីឡាទាំងនោះ កម្ពុជាមានកីឡា៣ប្រភេទដែលទទួលបានមេដាយមាសច្រើនជាងគេ បើគិតត្រឹមថ្ងៃទី១៦ ខែឧសភា ឆ្នាំ២០២៣នេះ។

កីឡា៣ប្រភេទដែលកម្ពុជាទទួលបានមេដាយមាសច្រើនជាងគេក្នុងចំណោមប្រភេទកីឡាដែលបានប្រកួតក្នុងស៊ីហ្គេមឆ្នាំ២០២៣នេះ រួមមាន៖

១. កីឡាគុនខ្មែរ ជាប្រភេទកីឡាមួយដែលត្រូវបានយកមកប្រកួតក្នុងព្រឹត្តិការណ៍ស៊ីហ្គេមឆ្នាំ២០២៣នេះ​ ហើយក៏ជាកីឡាមួយប្រភេទដែលកម្ពុជាទទួលបានមេដាយមាសច្រើនជាងគេ។ ក្នុងនាម​​ជា​ម្ចាស់​ក្បាច់​គុន អត្តពលិកគុនខ្មែរចំនួន១៤រូបបានឈ្នះមេដាយមាសចំនួន១៤គ្រឿងជូនជាតិ ក្នុងព្រឹត្តិការណ៍ស៊ីហ្គេមលើកទី៣២។ នេះគឺជាជោគជ័យមួយសម្រាប់កម្ពុជាដែលមានអត្តពលិកដែលមានសមត្ថភាព អាចលើកមុខមាត់​កីឡា​អត្តសញ្ញាណ​ខ្មែរដែលអាចដណ្តើមបានមេដាយមាសបានច្រើនជាងគេ។

២. វ៉ូវីណាម ជាកីឡាមួយប្រភេទដែលទទួលបានមេដាយមាសចំនួន១០គ្រឿងជូនជាតិមាតុភូមិ​ ក្នុងនាមជាម្ចាស់ផ្ទះស៊ីហ្គេម។ បើយោងតាមសន្ទស្សន៍មេដាយមាសរបស់សហព័ន្ធកីឡាវ៉ូវីណាមកម្ពុជាបានដាក់គោលដៅ ក្រោមការចង្អុលបង្ហាញពីថ្នាក់ដឹកនាំគណ:កម្មាធិការជាតិរៀបចំការប្រកួតកីឡាស៊ីហ្គេម លើកទី៣២នេះ បានកំណត់នូវមេដាយមាសចំនួន៩គ្រឿង ប៉ុន្តែ​ឆ្លងកាត់ការប្រកួត កម្ពុជា​សម្រេចបានលទ្ធផល​មេដាយមាស១០គ្រឿង​​។ នេះ​គឺជាប្រវត្តិសាស្ត្រថ្មីមួយសម្រាប់កម្ពុជាដែលទទួលបានមេដាយមាសច្រើនជាងការប្រកួតស៊ីហ្គេមមុនៗ។​ ជាក់ស្តែង កាលពីស៊ីហ្គេម ២០២១ នៅក្នុង​ប្រទេស​វៀតណាម​ សម្រាប់ប្រភេទកីឡាវ៉ូវីណាមនេះ កម្ពុជា​ទទួលបានមេដាយមាស៣គ្រឿងប៉ុណ្ណោះ។

៣.គុនល្បុក្កតោ កីឡាមួយនេះទទួលបានមេដាយមាសចំនួន៨គ្រឿងក្នុងព្រឹត្តិការណ៍ស៊ីហ្គេម។ គួររំលឹកផងដែរថា គុនល្បុក្កតោជាក្បាច់គុនបុរាណខ្មែរ​ច្រើនសតវត្សរ៍មកហើយដែលបន្តរស់រានក្នុងសង្គមខ្មែររហូត​ដល់ពេលបច្ចុប្បន្ន​។​ កីឡាមួយប្រភេទនេះត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយុនេស្កូ កាលពីថ្ងៃទី២៩ ខែវិច្ឆិកា ឆ្នាំ២០២២។

សូមបញ្ជាក់ថា ការប្រកួតកីឡាស៊ីហ្គេមលើកទី៣២ ឆ្នាំ២០២៣នេះ បានចាប់ផ្តើមបើកព្រឹត្តិការណ៍ជាផ្លូវការពីថ្ងៃទី០៥ ខែឧសភា ដល់ថ្ងៃទី១៧ ខែឧសភា ឆ្នាំ២០២៣។ នេះ គឺជាលើកដំបូងហើយសម្រាប់កម្ពុជាដែលធ្វើជាម្ចាស់ផ្ទះ ក្នុងព្រឹត្តិការណ៍ដ៏អស្ចារ្យមួយនេះក្រោយពីរង់ចាំអស់រយ:ពេល៦៤ឆ្នាំ៕

អត្ថបទ៖ ម៉ាលីស