កីឡា

ក្រោយធ្វើនៅកម្ពុជា២លើកជាប់គ្នា ពាន AFF U-23 ឆ្នាំ២០២៣ធ្វើនៅថៃ

បានផុស

១០ ខែ មុន

នៅ

ថ្ងៃអង្គារ ២៣ ឧសភា ២០២៣

ដោយ

ពានរង្វាន់បាល់ទាត់យុវជនអាយុក្រោម២៣ឆ្នាំ (AFF U-23 Championship) លើកទី៤ ឆ្នាំ២០២៣ នឹងរៀបចំការប្រកួតនៅប្រទេសថៃចាប់ពីថ្ងៃទី១៥ ដល់ទី២៧ ខែកក្កដាដែលមានប្រទេសសមាជិកអាស៊ានចូលរួមប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខៀវ សាម៉េត ប្រធានសហព័ន្ធកីឡាបាល់ទាត់អាស៊ីអាគ្នេយ៍ (AFF) បានឲ្យដឹងថា ការរៀបចំប្រកួតជើងឯកបាល់ទាត់យុវជនអាយុក្រោម២៣ឆ្នាំលើកទី៤នឹងធ្វើនៅប្រទេសថៃនាខែកក្កដា ឆ្នាំ២០២៣។ នេះជាលើកទី២ដែលប្រទេសថៃទទួលរៀបចំធ្វើម្ចាស់ផ្ទះ បន្ទាប់ពីលើកទី១រៀបចំនៅឆ្នាំ២០០៥ ដែលក្រុមបាល់ទាត់ U23 ថៃ បានក្លាយជាជើងឯក។

តាមការគ្រោងទុក ការចាប់ឆ្នោតជ្រើសរើសពូលជើងឯក AFF U-23 Championship នឹងធ្វើនៅថ្ងៃទី២៩ ខែឧសភា។ តាមរយៈពាលរង្វាន់នេះ ក្រុមបាល់ទាត់ U23 ជម្រើសជាតិនៅតំបន់អាស៊ាននឹងបានជួបប្រកួតគ្នាម្តងទៀតនៅក្នុងឆ្នាំ២០២៣នេះ បន្ទាប់ពីបានជួបប្រកួតគ្នាម្តងហើយក្នុងព្រឹត្តិការណ៍កីឡាស៊ីហ្គេមនៅប្រទេសកម្ពុជា។

ការរៀបចំពានរង្វាន់ AFF U-23 ឲ្យក្រុមយុវជនទទួលបានឱកាសប្រកួតពីរលើកក្នុងមួយឆ្នាំនេះដូចទៅនឹងកាលឆ្នាំ២០២២ដែលកម្ពុជាបានទទួលរៀបចំធ្វើម្ចាស់ផ្ទះនៅក្នុងខែកុម្ភៈនៅពហុកីឡដ្ឋានជាតិមរតកតេជោ មុនពេលជួបប្រកួតគ្នាម្តងទៀតនៅក្នុងព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម។

រហូតដល់ពេលនេះ កម្ពុជាបានទទួលធ្វើម្ចាស់ផ្ទះរៀបចំការប្រកួតជើងឯក AFF U-23 ពីរដងគឺឆ្នាំ២០១៩ ដែលក្រុម U23 ឥណ្ឌូណេស៊ី បានក្លាយជាជើងឯក បន្ទាប់ពីឈ្នះថៃនៅវគ្គផ្តាច់ព្រ័ត្រ និងឆ្នាំ២០២២ ដែលក្រុម U23 វៀតណាមបានក្លាយជាជើងឯក បន្ទាប់ពីបានឈ្នះថៃនៅវគ្គផ្តាច់ព្រ័ត្រ ខណៈលើកទី១ ឆ្នាំ២០០៥ ក្រុម U23 ថៃបានក្លាយជាជើងឯក បន្ទាប់ពីបានឈ្នះក្រុមU23 សិង្ហបុរីនៅវគ្គផ្តាច់ព្រ័ត្រ៕