កីឡា

ប្រធាន APSF សរសើរកម្ពុជាមានសមត្ថភាពរៀបចំអាស៊ានប៉ារ៉ាហ្គេមដោយជោគជ័យ

បានផុស

៩ ខែ មុន

នៅ

ថ្ងៃសៅរ៍ ១០ មិថុនា ២០២៣

ដោយ

ប្រធានសហព័ន្ធកីឡាជនពិការអាស៊ីអាគ្នេយ៍ (APSF) លោកឧត្តមសេនីយ៍ Osoth Bhavilai បានកោតសរសើរកម្ពុជាដែលមានសមត្ថភាពគ្រប់គ្រាន់ និងបង្ហាញពីឆន្ទៈពិតប្រាកដក្នុងការរៀបចំព្រឹត្តិការណ៍កីឡាអាស៊ានប៉ារ៉ាហ្គេម លើកដំបូងទទួលបានជោគជ័យគួរជាទីមោទនភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលជាការរៀបចំលើកដំបូងនៅប្រទេសកម្ពុជាបានរៀបចំពិធីបិទដ៏អស្ចារ្យកាលពីល្ងាចថ្ងៃទី៩ ខែមិថុនា នៅពហុកីឡដ្ឋានជាតិមរតកតេជោក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកឧត្តមសេនីយ៍ Osoth Bhavilai ប្រធានសហព័ន្ធកីឡាជនពិការអាស៊ាន សម្តេចពិជ័យសេនា ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាជនពិការអាស៊ាននៅកម្ពុជា ឯកឧត្តម ហ៊ុន ម៉ានី អនុប្រធានគណៈកម្មាធិការជាតិប៉ារ៉ាឡាំពិកកម្ពុជា ឯកឧត្តម លោកជំទាវ អ្នកឧកញ៉ា លោកឧកញ៉ា ប្រតិភូកីឡាជនពិការទាំង១១ប្រទេស អត្តពលិកជនមានពិការភាព ភ្ញៀវកិត្តិយសជាតិ អន្តរជាតិ និងអ្នកគាំទ្ររាប់ម៉ឺននាក់ពេញពហុកីឡដ្ឋានជាតិ។

ថ្លែងសុន្ទរកថាក្នុងពិធីបិទជាផ្លូវការនារាត្រីដ៏ត្រកាល លោកឧត្តមសេនីយ៍ Osoth Bhavilai បានសម្តែងក្តីសប្បាយរីករាយ និងអបអរសាទរដល់ព្រះរាជាណាចក្រកម្ពុជាដែលបានរៀបចំការប្រកួតកីឡាជនពិការអាស៊ានលើកដំបូងប្រកបដោយជោគជ័យ និងជាប្រវត្តិចងចាំជារៀងរហូត។

លោកមានប្រសាសន៍ថា ៖«សម្រាប់រយៈពេលជាងមួយសប្តាហ៍កន្លងទៅ យើងខ្ញុំឃើញផ្ទាល់ភ្នែកពីការបង្ហាញភាពក្លាហាន និងឆន្ទៈពិតប្រាកដដ៏គួរឲ្យរំភើបរីករាយ។ កម្ពុជា! អ្នកបានបង្ហាញសមត្ថភាពពិតប្រាកដក្នុងរៀបចំធ្វើម្ចាស់ផ្ទះអាស៊ានប៉ារ៉ាហ្គេមលើកដំបូងប្រកបដោយជោគជ័យ។ ខ្ញុំសូមចូលរួមអបអរសាទរ»។

«ចំពោះអត្តពលិក! អ្នកជាអ្នកទទួលបានជ័យជម្នះទាំងអស់គ្នា! ចំពោះក្រុមការងារស្ម័គ្រចិត្ត អ្នកបានផ្តល់សេចក្តីស្រឡាញ់ និងភាពរីករាយប្រកបដោយភាតរភាព! ហើយចំពោះអ្នកគាំទ្រកម្ពុជាទាំងអស់ ការគាទ្ររបស់អ្នកដល់យើងខ្ញុំគឺជាកម្លាំងចិត្តមិនអាចកាត់ថ្លៃបានដើម្បីបន្តផ្តល់កម្លាំងកាយចិត្តដល់សហគមកីឡាជនមានពិការភាព»។

ស្ថិតក្រោមក្រសែភ្នែកអ្នកទស្សនាក្នុងពហុកីឡដ្ឋានជាតិមរតកតេជោ ព្រះអគ្គិជ័យកីឡាត្រូវបានពន្លត់ ហើយទង់ជាតិអាស៊ានប៉ារ៉ាត្រូវបានបង្ហូតចុះដើម្បីប្រគល់ទៅប្រទេសថៃដើម្បីយកទៅរៀបចំការប្រកួតអាស៊ានប៉ារ៉ាហ្គេម លើកទី១៣ ឆ្នាំ២០២៦។

សូមបញ្ជាក់ថា អាស៊ានប៉ារ៉ាហ្គេម លើកទី១២ ដែលមានកីឡា១៤ប្រភេទត្រូវបានបើកជាផ្លូវការកាលពីថ្ងៃទី៣ ខែមិថុនា។ លទ្ធផលនៃការប្រកួតជាងមួយសប្តាហ៍ត្រូវបានបញ្ចប់ ប្រទេសឥណ្ឌូណេស៊ីទទួលបានមេដាយច្រើនជាងដោយឈរលើកំពូលតារាង បន្ទាប់មកថៃ វៀតណាម ម៉ាឡេស៊ី ហ្វីលីពីន មីយ៉ាន់ម៉ា សិង្ហបុរី និងកម្ពុជា។

កម្ពុជាក្នុងនាមជាម្ចាស់ផ្ទះទទួលបានមេដាយសរុប៧១គ្រឿងគឺមាស៩ ប្រាក់១៨ និងសំរិទ្ធ៤៤ ដែលជាចំនួនមេដាយច្រើនបំផុតលើកដំបូងរបស់ខ្លួន ចាប់តាំងពីធ្លាប់ចូលរួមប្រកួតអាស៊ានប៉ារ៉ាហ្គេម លើកដំបូង ឆ្នាំ២០០១មក៕