កីឡា

កម្ពុជាឈ្នះមេដាយមាស១ សំរិទ្ធ២ពីជើងឯកសូហ្វតិន្នីសអន្តរជាតិ ISTF នៅថៃ

បានផុស

៨ ខែ មុន

នៅ

ថ្ងៃពុធ ២ សីហា ២០២៣

ដោយ

ក្រុមកីឡាសូហ្វតិន្នីសជម្រើសជាតិកម្ពុជាដណ្តើមបានមេដាយ៣គ្រឿង គឺមាស១ និងសំរិទ្ធ២ ពីព្រឹត្តិការណ៍ប្រកួតកីឡាសូហ្វតិន្នីសអន្តរជាតិ ISTF World Tour 2023 International Soft Tennis Championship នៅប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាសូហ្វតិន្នីសកម្ពុជាបានបញ្ជូនប្រតិភូកីឡា និងអត្តពលិកចំនួន១៤រូប ចូលរួមការប្រកួតនេះ។ ជាលទ្ធផល កម្ពុជាដណ្តើមបានមេដាយមាស១លើលើវិញ្ញាសាក្រុមនារី មេដាយសំរិទ្ធ១បានលើវិញ្ញាសាក្រុមបុរស និងមេដាយសំរិទ្ធ១ទៀតបានលើវិញ្ញាសាគូបុរសលើ៤០ឆ្នាំ។

ព្រឹត្តិការណ៍ប្រកួតធ្វើឡើងក្នុងរយៈពេល៤ថ្ងៃ នៅទីលានវាយកូនបាល់ Keita Resort & Spa Club ដោយចាប់ផ្ដើមពីថ្ងៃទី២៦ ដល់ថ្ងៃទី៣០ ខែកក្កដា នៅទីក្រុងប៉ាតាយ៉ា និងខេត្តឈុនបុរី ប្រទេសថៃ ។ អត្តពលិកអាជីពជាង ២០០ នាក់មកពីបណ្ដាប្រទេសផ្សេងៗគ្នាបានចូលរួមប្រកួតមានដូចជា កម្ពុជា កូរ៉េខាងត្បូង ហ្វីលីពីន ឥណ្ឌូណេស៊ី ឥណ្ឌា ឡាវ និងម្ចាស់ផ្ទះថៃ។

ប្រភេទវិញ្ញាសារួមមានក្រុមបុរស ក្រុមនារី ឯកត្តជនបុរស ឯកត្តជននារី វាយគូបុរស វាយគូនារី និងវាយគូបុរស-នារី ដែលត្រូវបានបែងចែកតាមកម្រិតអាយុចាប់ពី១៥ឆ្នាំ ១៨ឆ្នាំ និង៤០ឆ្នាំឡើង។

គោលបំណងនៃការរៀបចំព្រឹត្តិការណ៍នេះ គឺជាជាការផ្សព្វផ្សាយពីកីឡាសូហ្វតិន្នីសឲ្យកាន់តែទូលំទូលាយនៅតំបន់អាស៊ាន និងអាស៊ី៕

អត្ថបទ៖ ផា រតនា

Related Topics:កីឡាសូហ្វតិន្នីស