ក្លិបអង់គ្លេស៣បានឈ្នះពាន FA Community Shield ច្រើនបំផុតក្នុងប្រវត្តិសាស្រ្ត

ក្រុម​បាល់ទាត់​ជា​​ម្ចាស់​ជើង​ឯក​លីគ​បាល់ទាត់​កំពូល​អង់គ្លេស និង​ម្ចាស់​ជើង​ឯក FA Cup ត្រូវ​ប្រជែង​​ពាន​រង្វាន់ FA Community Shiel បើក​រដូវ​កាល​ថ្មី។ នៅ​ក្នុង​ប្រវត្តិ​សាស្ត្រ​​បាល់ទាត់​អង់គ្លេស​មាន​ក្លិប​ចំនួន​៣​ដែល​បាន​ឈ្នះ​ពាន​រង្វាន់​បើក​រដូវ​កាល​នេះច្រើន​ជាង​គេ​បំផុត។

១. ក្លិបបាល់ទាត់បិសាចក្រហម Manchester United ឈ្នះ​២១​លើក

ក្លិបបាល់ទាត់ដែលមានមូលដ្ឋាន​នៅទីក្រុង Manchester ដែលបច្ចុប្បន្នដឹកនាំដោយគ្រូបង្វឹកលោក Erik Ten Hag សញ្ជាតិ ហូឡង់ ​បាន​​ឈ្នះពានរង្វាន់ FA Community Shield ច្រើនជាងក្នុងប្រវត្តិសាស្រ្ត គិតត្រឹមឆ្នាំ ២០២៣នេះ ពោលគឺឈ្នះបាន ២១លើក។ នៅថ្ងៃទី ៧ ខែសីហា ឆ្នាំ ២០១៦ ជាឆ្នាំចុងក្រោយ Manchester United ឈ្នះពានរង្វាន់ FA Community Shield ដោយបានយកឈ្នះក្លិបបាល់ទាត់ Leicester City ក្នុងលទ្ធផល ២-១ ដឹកនាំដោយគ្រូបង្វឹក លោក Jose Mourinho។

២. ក្លិបបាល់ទាត់កាំភ្លើងធំ Arsenal ឈ្នះ​១៧​លើក

ក្លិបបាល់ទាត់កាំភ្លើងធំ Arsenal ជាម្ចាស់ជើងឯកពានរង្វាន់ FA Community Shield ឆ្នាំ ២០២៣ បន្ទាប់​ពី​បាន​ឈ្នះ​​មេឃខៀវ Manchester City ដោយ​បាល់ប៉េណាល់ទីកាត់សេចក្ដី ក្នុងលទ្ធផល ៤ ទល់១។ ក្លិបដែលមានមូលដ្ឋានគ្រិះនៅទីក្រុងឡុងដ៍ ដែលបច្ចុប្បន្ន​ដឹកនាំដោយគ្រូបង្វឹក លោក Mikel Arteta សញ្ជាតិ​អេស្ប៉ាញវ័យ៤១ឆ្នាំ ជាក្លិបទី​២ក្នុងប្រវត្តិសាស្រ្ត ដែលឈ្នះពានរង្វាន់ FA Community Shield ចំនួន​១៧​លើក ទាំង​ឆ្នាំ២០២៣។

៣. ក្លិបបាល់ទាត់ហង្សក្រហម Liverpool ១៦​លើក

ក្លិបហង្សក្រហម Liverpool ជាក្លិបទី៣ក្នុងប្រវតិ្តសាស្រ្ត ​ធ្លាប់​បាន​ឈ្នះពានរង្វាន់ FA Community Shield ចំនួន​១៦ លើកគិតត្រឹម ២០២៣។ ក្លិបបាល់ទាត់ដែលបច្ចុប្បន្នដឹកនាំដោយគ្រូបង្វឹក លោក Jürgen Klopp សញ្ជាតិ អាឡឺម៉ង់ វ័យ​៥៦ឆ្នាំ បាន​ឈ្នះ​ជើងឯកពានរង្វាន់ FA Community Shield ចុង​ក្រោយ​បំផុត​កាលពីឆ្នាំ២០២២។ ពេល​នោះ​ហង្សក្រហម Liverpool បានយកឈ្នះ Manchester City ក្នុងលទ្ធផល ៣-១៕

អត្ថបទ៖ ផា រតនា