កីឡា

ខ្សែបម្រើកណ្ដាល៥រូបមានតម្លៃផ្ទេរខ្ពស់បំផុតក្នុងប្រវត្តិសាស្ត្រលីគអង់គ្លេស

បានផុស

៣ years មុន

នៅ

ថ្ងៃពុធ ១៦ សីហា ២០២៣

ដោយ

បាល់ទាត់សម័យទំនើប តម្លៃទីផ្សារដោះដូរកីឡាករអាជីពបានប្រែប្រួលយ៉ាងខ្លាំង ក្នុងនោះការផ្ទេរកីឡាករឆ្នើមៗពីក្លិបមួយទៅក្លិបមានតម្លៃខ្ពស់ណាស់។ ថ្ងៃនេះនិយាយពីតម្លៃផ្ទេររបស់ កីឡាករខ្សែបម្រើកណ្ដាល ៥រូបដែលមានតម្លៃខ្ពស់បំផុតក្នុងប្រវត្តិសាស្រ្តក្របខណ្ឌលីគកំពូលអង់គ្លេស Premier League។

១. កីឡាករ Moises Caicedo

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករវ័យ២១ឆ្នាំបានបំបែកកំណត់ត្រាជាខ្សែបម្រើកណ្តាលមានតម្លៃផ្ទេរខ្ពស់បំផុតនាពេលបច្ចុប្បន្ន ក្នុងក្របខណ្ឌ Premier League។ កីឡាករអេក្វាទ័ររូបនេះ បានផ្ទេរទៅក្លិបតោខៀវ Chelsea ក្នុងតម្លៃ ១៣៤ លានអឺរូ។ រដូវកាលមុន Caicedo បង្ហាញខ្លួនឲ្យក្លិប Brighton បាន ៤៥លើក ស៊ុតបាន២គ្រាប់ និងជួយឲ្យក្លិបឈរលេខ៦ និងបានទៅលេងពាន UEFA Europa League ជាលើកដំបូងក្នុងប្រវត្តិសាស្រ្តរបស់ក្លិប។

២. កីឡាករ Enzo Fernández

រូបគេបានផ្ទេរទៅក្លិបតោខៀវ Chelsea ក្នុងតម្លៃ ១២១ លានអឺរ៉ូ។ ខ្សែបម្រើកណ្ដាលវ័យ ២២ឆ្នាំ សញ្ជាតិអាហ្សង់ទីនរូបនេះ ជាសមាជិកដែលជួយអាហ្សង់ទីនឈ្នះជើងឯកពិភពលោកឆ្នាំ២០២២។ មុនពេលផ្លាស់មកកាន់តោខៀវ រូបគេលេងឲ្យក្លិប Benfica នៅលីគប្រទេសព័រទុយហ្គាល់។

៣. កីឡាករ Declan Rice

ខ្សែមប្រើកណ្ដាល Declan Rice បានផ្ទេរមកកាន់ក្លិបកាំភ្លើងធំ Arsenal ក្នុងតម្លៃ ១១៧ លានអឺរ៉ូ ហើយក្លាយជាខ្សែបម្រើកណ្ដាលទី៣ដែលមានតម្លៃផ្ទេរខ្ពស់បំផុតនៅអង់គ្លេស។ កីឡាករសញ្ជាតិអង់គ្លេស វ័យ២៤ឆ្នាំ រូបនេះជាសមាជិកដែលជួយក្លិប West Ham ឈ្នះពានរង្វាន់ Europa Conference League រដូវកាលមុន។

៤. កីឡាករ Paul Pogba

រូបគេជាអតីតយុវជនរបស់ក្លិប Manchester United ប៉ុន្តែឆ្នាំ២០១២ បានផ្ទេរទៅក្លិប Juventus ប្រទេសអ៉ីតាលី។ ពេលរូបគេវិលត្រឡប់មក Man United វិញក្នុងតម្លៃផ្ទេរចំនួន១១០ លានអឺរ៉ូ ដោយបានបំបែកកំណត់ត្រាជាខ្សែបម្រើកណ្ដាលមានតម្លៃផ្ទេរខ្ពស់បំផុតកាលពីឆ្នាំ២០១៦។ កីឡាករបារាំងវ័យ ៣០ រូបនេះបានជួយឲ្យក្លិប Manchester United ឈ្នះពានរង្វាន់ UEFA Europa League និងពានរង្វាន់ Carabao Cup។

៥. កីឡាករ Rodri

ខ្សែបម្រើកណ្ដាលកីឡាករ Rodri បានផ្ទេរទៅក្លិបមេឃខៀវ Manchester City ក្នុងតម្លៃ ៧០លានអឺរ៉ូ។ កីឡាករវ័យ២៧ឆ្នាំ សញ្ជាតិអេស្ប៉ាញ រូបនេះជាតួអង្គដ៏សំខាន់ ដែលជួយឲ្យក្លិប Manchester City ឈ្នះពានរង្វាន់៣ក្នុង១រដូវកាល រួមមានពានរង្វាន់ UEFA Champion League, Premier League និង FA Cup៕

អត្ថបទ៖ ផា រតនា