កីឡា

អង់គ្លេសបដិសេធប្រកួតជាមួយក្រុមយុវជនរុស្សី ទោះ UEFA អនុញ្ញាត

បានផុស

១ year មុន

នៅ

ថ្ងៃព្រហស្បតិ៍ ២៨ កញ្ញា ២០២៣

ដោយ

អង់គ្លេស នឹងមិនប្រកួតជាមួយក្រុមបាល់ទាត់យុវជនជម្រើសជាតិរុស្សីទេ បើទោះបីជាមានការសម្រេចចិត្តថ្មីៗពីសហព័ន្ធបាល់ទាត់ទ្វីបអឺរ៉ុប (UEFA) ក្នុងការបញ្ជូលក្រុមអាយុក្រោម១៧ឆ្នាំរុស្ស៊ីចូលប្រកួតកម្រិតតំបន់អឺរ៉ុបវិញក្នុងរដូវកាលនេះ។

ការផ្លាស់ប្តូរនេះកើតឡើង បន្ទាប់ពី UEFA បានហាមឃាត់ក្រុមរបស់រុស្ស៊ីទាំងអស់ពីការប្រកួតកម្រិតអឺរ៉ុបដោយសារការលុកលុយលើប្រទេសអ៊ុយក្រែនកាលពីឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មការប្រតិបត្តិរបស់សហព័ន្ធបាល់ទាត់ទ្វីបអឺរ៉ុប បានសម្រេចការដាក់បញ្ចូលផ្នែកខ្លះនៃក្រុមជម្រើសជាតិរុស្ស៊ី ជាចម្បងនៅកម្រិតយុវជនជាមុន រួមមានក្រុមបុរស និងក្រុមនារី អាយុក្រោម ១៧ឆ្នាំ។

ការសម្រេចចិត្តនេះបានជំរុញឱ្យមានការសន្ទនាអំពីសក្តានុពលនៃការបញ្ចូលក្រុម U17 រុស្ស៊ីឱ្យចូលទៅក្នុងការប្រកួតនៅតំបន់អឺរ៉ុប បើទោះបីជាកម្មវិធីប្រកួតត្រូវបានចាប់ឆ្នោតបែងចែកពូលរួចរាល់ហើយ។

ទោះបីជាមានការវិវឌ្ឍចុងក្រោយបែបនេះ សមាគមបាល់ទាត់អង់គ្លេសនៅតែមិនផ្លាស់ប្តូរជំហររបស់ខ្លួន ដោយបង្ហាញជំហរយ៉ាងម៉ឺងម៉ាត់ថា គ្មានក្រុមណាមួយរបស់ខ្លួន ទាំងយុវជន ឬក្រុមធំប្រកួតជាមួយក្រុមតំណាងជាតិរុស្ស៊ីឡើយ។

ក្នុងសេចក្តីថ្លែងការណ៍មួយ សហព័ន្ធកីឡាបាល់ទាត់អង់គ្លេសបានរិះគន់ការសម្រេចចិត្តក្នុងការទទួលយកជម្រើសជាតិរុស្ស៊ីឡើងវិញ។ «យើងមិនគាំទ្រជំហរនៃការបញ្ជូលរុស្ស៊ីទៅការប្រកួតកម្រិតយុវជនរបស់ UEFA ហើយជំហររបស់យើងនៅតែថា ក្រុមអង់គ្លេសនឹងមិនប្រកួតជាមួយរុស្ស៊ីឡើយ»។

ការសម្រេចចិត្តរបស់ UEFA ធ្វើឡើងស្របពេលការប្រកួត Women’s Nations League នៅប្រទេសអាមេនី គឺជាការប្រកួតនៅអឺរ៉ុបដំបូងដែលដឹកនាំដោយអាជ្ញាកណ្ដាលរុស្ស៊ី ចាប់តាំងពីសង្គ្រាមជាមួយអ៊ុយក្រែនបានផ្ទុះឡើង។

បញ្ហាប្រឈមក្នុងការធ្វើដំណើរសម្រាប់ពលរដ្ឋរុស្ស៊ី រួមទាំងបញ្ហាទិដ្ឋាការ និងជើងហោះហើរមានកំណត់ បានរួមចំណែកដល់ការស្ទាក់ស្ទើររបស់ UEFA ក្នុងការតែងតាំងអាជ្ញាកណ្តាលមកពីប្រទេសរុស្ស៊ី៕

ប្រែសម្រួល៖ មន្នីរ័ត្ន

Related Topics:កីឡាបាល់ទាត់អន្តរជាតិ