នារីវៀតណាម ហ្វីលីពីន នៅមានឱកាសឡើងវគ្គជម្រុះ អូឡាំពិក ជុំទី៣

ការប្រកួតជម្រុះជុំទី២បាល់ទាត់នារី ក្នុងព្រឹត្តិការណ៍អូឡាំពិកក្នុងតំបន់អាស៊ី ត្រូវ​​បញ្ចប់នៅថ្ងៃទី១ ខែវិច្ឆកា ឆ្នាំ២០២៣ ក្នុងនោះនឹងរកឃើញ៤ក្រុមបានឡើងទៅវគ្គជម្រុះជុំទី៣បន្តទៀត។

នៅ​វគ្គជម្រុះជុំទី២ ក្រុមបាល់ទាត់នារីក្នុងតំបន់អាស៊ានតែ៣ក្រុមប៉ុណ្ណោះ​គឺ​ក្រុមបាល់ទាត់នារីថៃ វៀតណាម និង ហ្វីលីពីន។ បន្ទាប់​ពី​ការ​ប្រកួត​ជម្រុះជុំទី២ពីរ​ប្រកួត​ដូច​គ្នា​ ​មាន២ក្រុម​​នៅ​មាន​ឱកាស​ឡើងទៅកាន់ជុំទី៣គឺក្រុមវៀតណាម និងហ្វីលីពីន ខណៈ​ថៃអស់ឱកាស ទោះ​មិនទាន់​ចប់​ការ​ប្រកួត​ជម្រុះ។

ក្រុមបាល់ទាត់នារីថៃត្រូវជួបជាមួយក្រុមបាល់ទាត់នារីកូរ៉េខាងជើងនៅថ្ងៃទី១ ខែវិច្ឆកា ឆ្នាំ២០២៣ នាពេលវេលាម៉ោង២:៣០នាទី ថ្ងៃត្រង់នៅកីឡដ្ឋាន Xiamen Egret ក្នុងប្រទេសចិន ដែល​ជា​ការ​ប្រកួត​ជម្រុះ​ចុង​ក្រោយ។ ក្រុមបាល់ទាត់នារីថៃបានបាត់បង់ឱកាសក្នុងការឡើងទៅជុំទី៣ ក្រោយចាប់ផ្តើម២ប្រកួតដំបូងគឺចាញ់ទាំង២ប្រកួតក្នុងនោះចាញ់កូរ៉េខាងត្បូង ១០-០, ចាញ់ចិន ៣-០។ ថៃស្ថិតនៅក្នុងពូលB រួមមានក្រុមបាល់ទាត់នារីខាងត្បូង កូរ៉េខាងជើង និង ប្រទេសចិន។

សម្រាប់ក្រុមបាល់ទាត់នារីវៀតណាមត្រូវជួបជាមួយក្រុមបាល់ទាត់នារីជប៉ុន នាវេលាម៉ោង៥ល្ងាច នៅកីឡដ្ឋាន Lokomotiv ​នៅ​ប្រទេស អ៊ូបេគីស្ថាន ។ វៀតណាមនៅមានឱកាសក្នុងការឡើងទៅវគ្គបន្ត ក្នុង​នាម​ជា​​ក្រុមលេខ២ល្អក្នុងពូល។ ឆ្លងកាត់២ប្រកួតក្នុងពូលក្រុមវៀតណាមឈ្នះ១ ចាញ់១ មាន៣ពិន្ទុ។ វៀតណាមស្ថិតក្នុងពូលC រួមមានក្រុមបាល់ទាត់នារីជប៉ុន អ៊ូបេគីស្ថាន និង ឥណ្ឌា។

ក្រុមបាល់ទាត់​នារីហ្វីលីពីននឹងត្រូវជួបក្រុមបាល់ទាត់នារីអុីរ៉ង វេលាម៉ោង២:៥០នាទី ថ្ងៃត្រង់នៅកីឡដ្ឋាន HBF Park ក្នុងប្រទេសអូស្រ្តាលី។ ក្រុមហ្វីលីពីន​ ​ក៏​មាន​ឱកាសឡើងទៅវគ្គបន្តជុំទៅ៣ ក្នុង​នាម​​ជាក្រុមលេខ២ ល្អក្នុងពូល។ ឆ្លងកាត់ការប្រកួត២លើកក្នុងពូលហ្វីលីពីនឈ្នះ១ ចាញ់១ មាន៣ពិន្ទុ។ ហ្វីលីពីនស្ថិតក្នុងពូល​ដែល​មានក្រុមបាល់ទាត់នារីអូស្ដ្រាលី អ៉ីរ៉ង់​ និង ឆាយនិសតៃប៉ិ។

ចំណាត់ថ្នាក់ក្រុមលេខ២ល្អ ក្នុងពូលត្រូវបានឡើងទៅជុំទី៣គឺត្រូវរង់ចាំ​លទ្ធផលការប្រកួតរបស់ក្រុមទាំង៣នេះ

-ក្រុមបាល់ទាត់នារីកូរ៉េខាងជើង vs ក្រុមបាល់ទាត់នារីថៃ

-ក្រុមបាល់ទាត់នារីវៀតណាម vs ក្រុមបាល់ទាត់នារីជប៉ុន

-ក្រុមបាល់ទាត់នារីហ្វីលីពីន vs ក្រុមបាល់ទាត់អុីរ៉ង

អត្ថបទ៖ ផា រតនា​