ក្លិប Mainz បញ្ចប់កិច្ចសន្យាកីឡាករម្នាក់ដែលនិយាយពាក់ព័ន្ធនឹងសង្រ្គាម អ៊ីស្រាអែល-ប៉ាឡេស្ទីន

ក្លិបបាល់ទាត់លីគកំពូលអាល្លឺម៉ង់ Mainz 05 បានលុបចោលកិច្ចសន្យារបស់កីឡាករ Anwar El Ghazi ជុំវិញការបង្ហោះសារតាមបណ្តាញសង្គមទាក់ទងនឹងជម្លោះអ៉ីស្រាអែល និងប៉ាឡេស្ទីន។

ក្នុងសេចក្តីថ្លែងការណ៍មួយកាលពីថ្ងៃសុក្រ Mainz បាននិយាយថា កិច្ចព្រមព្រៀងរបស់ El Ghazi ត្រូវបានបញ្ចប់ដោយសារ“ការបញ្ចេញមតិ និងការបង្ហោះរបស់កីឡាករនៅលើប្រព័ន្ធផ្សព្វផ្សាយសង្គម”។

កីឡាករ El Ghazi វ័យ ២៨ឆ្នាំត្រូវបានក្លិបផ្អាកម្ដង​ហើយ ជុំវិញការបង្ហោះសារ​អំពីជម្លោះនៅមជ្ឈិមបូព៌ា ប៉ុន្តែត្រូវបានអនុញ្ញាតឱ្យត្រឡប់ទៅហ្វឹកហាត់វិញនៅដើមសប្តាហ៍នេះ។

El Ghazi បាននិយាយ​ក្នុងសារ​បង្ហោះ​ បន្ទាប់ពីកិច្ចសន្យាត្រូវ​បាន​បញ្ចប់ថា ៖«ឈរ​លើ​អ្វីដែលត្រឹមត្រូវ ទោះបី​វាមានន័យថា ឈរតែម្នាក់ឯង ក៏​សុខ​ចិត្ត។ ការបាត់បង់ជីវភាពរស់នៅរបស់ខ្ញុំគឺគ្មានអ្វីសោះ បើប្រៀបធៀប​នឹងឋាននរកដែលត្រូវ​បាន​ធ្វើ​លើមនុស្សស្លូតត្រង់ និងងាយរងគ្រោះនៅហ្គាហ្សា»។

ក្នុងការបង្ហោះតាមបណ្តាញសង្គមកាលពីថ្ងៃទី២៧ ខែ​តុលា រូប​គេបានបញ្ជាក់ថា ៖«ចំពោះទំហំដែល​សារ​មុនរបស់ខ្ញុំលើបណ្តាញសង្គមគឺ​មានការយល់ច្រឡំ។ ខ្ញុំសូមបញ្ជាក់ឱ្យច្បាស់ថា ខ្ញុំឈរដើម្បីសន្តិភាព និងមនុស្សជាតិសម្រាប់ទាំងអស់គ្នា»។

ក្លិប Mainz បាននិយាយកាលពីថ្ងៃចន្ទថា ពួកគេបានដកការផ្អាកនេះ ហើយកំពុងផ្តល់ឱកាសជាលើកទី២ ដល់គេ ដោយនិយាយថា El Ghazi បាននិយាយប្រឆាំងនឹងអំពើភេរវកម្មគ្រប់ប្រភេទ រួមទាំងពីក្រុមហាម៉ាស់ ហើយក៏មិនបានចោទសួរអំពីសិទ្ធិរបស់​អ៉ីស្រាអែលផងដែរ។

ទោះជាយ៉ាងណា ការបង្ហោះសារ​តាម​ប្រព័ន្ធផ្សព្វផ្សាយសង្គមបន្ថែមកាលពីថ្ងៃពុធ El Ghazi បានបង្ហាញថា ក្លិបបានចេញសេចក្តីថ្លែងការណ៍​ដោយសារ​សួរពី​រូប​គេ​ឡើយ។

កីឡាកររូបនេះបានសរសេរថា៖ «ខ្ញុំមិនសោកស្ដាយ ឬមានវិប្បដិសារីចំពោះ​អាជីព​នេះ​​ទេ។ ខ្ញុំ​នឹង​មិនឃ្លាតឆ្ងាយពីអ្វីដែលខ្ញុំនិយាយនោះទេ។ ខ្ញុំនៅ​តែ​ប្រកាន់​គោល​ជំហរ​របស់​ខ្ញុំ​ថ្ងៃនេះ និងជានិច្ចរហូតដល់ដង្ហើមចុងក្រោយ​ដើម្បីមនុស្សជាតិ និងអ្នកដែលត្រូវគេជិះជាន់»។

មុន​ការបញ្ចប់កិច្ចសន្យារបស់ El Ghazi នៅថ្ងៃសុក្រ រដ្ឋអាជ្ញាអាល្លឺម៉ង់​បានចោទប្រកាន់រូបគេពីបទ “រំខានដល់សន្តិភាពសាធារណៈដោយការកាត់ទោសអំពើឧក្រិដ្ឋកម្ម រួមជាមួយនឹងការញុះញង់ឱ្យស្អប់ខ្ពើម” តាមរយៈការបង្ហោះតាមប្រព័ន្ធផ្សព្វផ្សាយសង្គមរបស់គេ៕

ប្រែសម្រួល៖ មន្នីរ័ត្ន
ប្រភព៖ aljazeera