អភិបាលក្រុងប៉ារីសប្រកាស’មិនស្វាគមន៍’ អត្តពលិករុស្ស៊ី និងបេឡារុស្ស ក្នុងកីឡាអូឡាំពិក២០២៤

បួនខែមុន​កីឡាអូឡាំពិក លើកទី៣៣ នៃយុគសម័យទំនើបនៅទីក្រុងប៉ារីសមក​ដល់ ជំហរមិនច្បាស់លាស់របស់គណៈកម្មាធិការអូឡាំពិកអន្តរជាតិ (IOC) ជុំ​វិញ​វត្តមានរបស់អត្តពលិកមកពីប្រទេសរុស្ស៊ី និងបេឡារុស្ស នៅតែបន្តបង្កបញ្ហា ដោយមានសម្រង់សម្តី និងប្រតិកម្មជាបន្តបន្ទាប់ពីភាគីទាំងពីរ។

លើកនេះ អភិបាលក្រុងប៉ារីស លោកស្រី Anne Hidalgo បាននិយាយកាលពីថ្ងៃសៅរ៍ថា អត្តពលិករុស្ស៊ី និងបេឡារុស្ស “មិនត្រូវបានស្វាគមន៍” នៅក្នុងព្រឹត្តិការណ៍កីឡាដ៏ធំបំផុតនៅរដូវក្តៅនេះ។

«ខ្ញុំចង់ប្រាប់អត្តពលិករុស្ស៊ី និងបេឡារុស្សថា ពួកគេមិនស្វាគមន៍នៅទីក្រុងប៉ារីសទេ។ ខ្ញុំក៏ចង់ប្រាប់អត្តពលិកអ៊ុយក្រែន និងប្រជាជនអ៊ុយក្រែនទាំងអស់ថា យើងគាំទ្រពួកគេខ្លាំងណាស់»។

លោក​ស្រី Hidalgo បាន​លើក​ឡើង​បែប​នេះ​ក្នុងការធ្វើដំណើរទៅកាន់ទីក្រុងគៀវ ជាកន្លែងដែលលោកស្រីបានទៅទស្សនាមជ្ឈមណ្ឌលហ្វឹកហាត់សម្រាប់អត្តពលិកអ៊ុយក្រែន។ អត្តពលិករុស្ស៊ីត្រូវបានអនុញ្ញាតឱ្យចូលរួមប្រកួតនៅកីឡាអូឡាំពិកទីក្រុងប៉ារីសដែលដំណើរការចាប់ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ប៉ុន្តែសម្រាប់តែអត្តពលិក​អព្យាក្រឹតប៉ុណ្ណោះ។ ប្រទេសទាំងពីរត្រូវបានហាមឃាត់​ពី​ការ​ចូលរួមក្នុងពិធីបើកដែលនឹងប្រព្រឹត្តទៅនៅលើដងទន្លេសេន Seine កណ្តាលទីក្រុង។

ជាការឆ្លើយតប ទីក្រុងមូស្គូបានចាប់ផ្តើមការខឹងសម្បារប្រឆាំងនឹងគណៈកម្មាធិការអូឡាំពិកអន្តរជាតិ ដោយលើកហេតុផលថា ការរឹតបន្តឹងលើអត្តពលិករុស្ស៊ីគឺស្មើនឹង “ការរើសអើងជាតិសាសន៍ និងលទ្ធិណាហ្សីនិយម”។ នេះបើយោងតាមអ្នកនាំពាក្យក្រសួងការបរទេសរុស្ស៊ីលោកស្រី Maria Zakharova។

IOC បានព្យួរប្រទេសរុស្ស៊ី ពីការប្រកួតកីឡាឆ្នាំ២០២៤ កាលពីឆ្នាំមុន ប៉ុន្តែបានផ្តល់ភ្លើងខៀវដល់អត្តពលិករបស់ខ្លួនដើម្បីប្រកួតប្រជែងក្នុងលក្ខណៈអព្យាក្រឹត ដរាបណាពួកគេមិនគាំទ្រយ៉ាងសកម្មចំពោះការវាយប្រហាររបស់វិមានក្រឹមឡាំងលើអ៊ុយក្រែន។

IOC គួរតែធ្វើសេចក្តីថ្លែងការណ៍ជាសាធារណៈថ្កោលទោស លោកស្រី Hidalgo ចំពោះពាក្យសម្ដីរបស់លោកស្រី ឬគាំទ្រលោកស្រី ប៉ុន្តែជាអកុសលពួកគេនឹងមិនធ្វើអ្វីនោះទេ។ ជាលទ្ធផល មានរយៈពេល ២២៨ថ្ងៃទៀតរហូតដល់ពិធីបើក វានៅតែមិនទាន់ច្បាស់ថានឹងមានអ្វីកើតឡើងចំពោះអត្តពលិកមកពីប្រទេសទាំងនេះ។

លោកស្រី Ana María Hidalgo ដើមកំណើតអេស្ប៉ាញ ត្រូវបានគេស្គាល់ថា Anne Hidalgo ជាសមាជិកនៃគណបក្សសង្គមនិយម និងបានក្លាយជាអភិបាលក្រុងប៉ារីសតាំងពីឆ្នាំ២០១៤ ដែលជាស្ត្រីដំបូងគេដែលកាន់តំណែងនេះ។ លោកស្រីបានធ្វើការជាច្រើនដើម្បីធ្វើឱ្យប៉ារីសឆ្នាំ២០២៤ ក្លាយជាការពិត ដោយធ្វើការជាមួយប្រធានគណៈកម្មាធិការរៀបចំគឺ លោក Tony Estanguet ប៉ុន្តែឥឡូវនេះការអត្ថាធិប្បាយរបស់លោកស្រីនៅទីក្រុងគៀវអាចមានបញ្ហាជាមួយ IOC។ តើលោកស្រីមិនអាចស្វាគមន៍អត្តពលិកដែល IOC អនុញ្ញាតឱ្យចូលរួមប្រកួតបានទេ?

រុស្ស៊ី និងបេឡារុស្ស មិនបានបញ្ជាក់ថា អត្តពលិករបស់ពួកគេនឹងចូលរួមជាអព្យាក្រឹតទេ បើមិនដូច្នេះទេ ប្រទេសទាំងពីរនឹងបញ្ចប់ការធ្វើពហិការ៕

ប្រែសម្រួល៖ មន្នីរ័ត្ន
ប្រភព៖ Inside The Games