កីឡា

នៅមិនសុខទេ ជើងខ្លាំង Ricardo បបួល ធឿន ធារ៉ា ជួបគ្នានៅ ONE

បានផុស

១ year មុន

នៅ

ថ្ងៃសុក្រ ២៦ មេសា ២០២៤

ដោយ

កីឡាករអាហ្សង់ទីន Ricardo Bravo បានតាមដានការប្រកួតឃីកបុកស៊ីងជាលើកដំបូងរបស់កីឡាករ ធឿន ធារ៉ា និងបានបបួលជួបគ្នានៅសង្វៀន ONE Championship ដែលនឹងជួបសត្រូវពិតប្រាកដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីយប់មិញនេះ ធឿន ធារ៉ា បានប្រកួតឃីកបុកស៊ីងជាលើកដំបូងក្នុងអាជីពប្រដាល់របស់ខ្លួនដោយបានផ្តួលកីឡាករចិន Cai Zeping ឲ្យអាជ្ញាកណ្តាលបញ្ឈប់ក្នុងទឹកទី២។ កីឡាករចិនម្នាក់នេះអាយុទើប១៩ឆ្នាំ ប៉ុន្តែជាម្ចាស់ខ្សែក្រវាត់ និងកំពុងល្បីខ្លាំងនៅចិន។ ទោះបីជាយ៉ាងណា រូបគេមិនអាចតស៊ូជាមួយ ធឿន ធារ៉ា បានទេដោយត្រូវបានអាជ្ញាកណ្តាលបញ្ឈប់ក្នុងទឹកទី២។

តាមរយៈការឃើញ ធឿន ធារ៉ា ផ្តួលកីឡាករចិននេះ ជើងខ្លាំងប្រេស៊ីល Ricardo Bravo បាននិយាយថា ៖«ធឿន ធារ៉ា លោកត្រូវមកកាន់សង្វៀន ONE! ជាមួយសត្រូវពិតប្រាកដ»។

តាមពិតទៅ ធឿន ធារ៉ា និង Ricardo Bravo ធ្លាប់ប៉ះគ្នាម្តងហើយកាលពីឆ្នាំ២០២២នៅប្រទេសជប៉ុនដែលពេលនោះកីឡាករប្រេស៊ីលបានផ្តួលកីឡាករកម្ពុជាឲ្យសន្លប់។ ចាប់តាំងពីពេលនោះ អ្នកគាំទ្រតែងតែចង់ឲ្យ ធឿន ធារ៉ា សងសឹក ប៉ុន្តែមិនមានឱកាសបានជួបគ្នាទេដោយសារ Ricardo Bravo បានចុះកុងត្រាចូលសង្វៀន ONE។ ក្រោយមកអ្នកទាំងពីរកំពុឡើងខ្លាំងដូចគ្នា។

ចាប់តាំងពីចូលសង្វៀនធំមក Ricardo Bravo បានប្រកួត៣ដងនៅសង្វៀន ONE Championship មិនទាន់ស្គាល់បរាជ័យឡើយដោយបានផ្តួលដៃគូឲ្យសន្លប់ទាំង៣ដង។ រូបគេមានប្រវត្តិប្រកួតអាជីព៣១ដងគឺឈ្នះ២៧ដង ចាញ់២ដង និងស្មើ២ដង។

កាលពីខែធ្នូ ឆ្នាំ២០២៣ Ricardo Bravo បាននិយាយថា៖«ខ្ញុំមិនខ្លាចគាត់ (ធារ៉ា) ឬនរណាម្នាក់ទេ។ ខ្ញុំធ្លាប់ឈ្នះគាត់។ បើគាត់ចង់ប្រកួតជាមួយខ្ញុំ ឲ្យគាត់មកប្រកួតនៅសង្វៀន ONE ហើយប្រសិនបើចង់ឲ្យខ្ញុំទៅប្រកួតនៅកម្ពុជា គួរផ្តល់តម្លៃខ្លួនឲ្យសមតាមអ្វីដែលខ្ញុំចង់បានគឺ២០ម៉ឺនដុល្លារ។ ខ្ញុំបាននិយាយរឿងនេះហើយ ហើយក៏នឹងមិននិយាយទៀតដែរ។ បើអ្នកចង់ អីចឹងប្រាប់ទៅសារព័ត៌មានកម្ពុជាទៅ»។