បារាំងត្រៀមទទួលមេដឹកនាំពិភពលោក១២០រូបក្នុងពិធីបើកអូឡាំពិក២០២៤

ប្រទេស​បារាំង​នឹង​​ទទួល​​ប្រមុខរដ្ឋ និងរដ្ឋាភិបាល ប្រហែល១២០រូប ដែលអាចបង្កើតកំណត់ត្រា និងសកម្មភាពការទូតដ៏​ទូលំទូលាយ​ នៅថ្ងៃទី២៦ ខែកក្កដា ក្នុងអំឡុងពេលពិធី​បើកព្រឹត្តិការណ៍កីឡាអូឡាំពិក ទីក្រុងប៉ារីស ឆ្នាំ​២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពីក្រសួងការបរទេសបារាំង រដ្ឋមន្ត្រីប្រហែល ១៦០នាក់ ដែលភាគច្រើនមកពីកីឡា ត្រូវបានគេរំពឹងថានឹងចូលរួមផងដែរ ដែលធ្វើឱ្យវាក្លាយជាព្រឹត្តិការណ៍ដែលមិនធ្លាប់មានពីមុន​ក្នុងប្រវត្តិសាស្ត្រ​កីឡា​អូឡាំពិក ដោយសារចំនួនគណៈប្រតិភូកម្រិតខ្ពស់​ច្រើន​បំផុត។

ប្រធានាធិបតីបារាំង លោក Emmanuel Macron នឹងទទួលមេដឹកនាំ​ដោយ​ការ​ធ្វើបទបង្ហាញប៉ុន្មានម៉ោងមុនពេលក្បួនដង្ហែអូឡាំពិក តាមដងទន្លេសែន ជាមួយអត្តពលិក នៅក្នុងពិធីជួបសម្ដែងការគួរសមនៅវិមាន Élysée ដែលអនុញ្ញាតឱ្យមានការប្រជុំក្រៅផ្លូវការ។ កិច្ចប្រជុំទ្វេភាគីជាច្រើនត្រូវបានរំពឹងទុក ហើយលោក Macron នឹងឆ្លៀតឱកាសដើម្បីរៀបចំកិច្ចប្រជុំមួយចំនួន។ មួយថ្ងៃមុននេះ ប្រធានាធិបតីបារាំងក៏នឹងធ្វើជាម្ចាស់ផ្ទះនៃកិច្ចប្រជុំកំពូលដែលរៀបចំរួមគ្នាជាមួយ IOC ស្តីពីអនាគត​កីឡានៅក្នុងពិភពលោកដែលមាននិរន្តរភាពជាងមុន។

ទោះបីជាវានៅមិនទាន់ដឹងថាតើមានគណៈប្រតិភូប៉ុន្មាននាក់នឹងចូលរួមកិច្ចប្រជុំកំពូលនេះ ដែលទំនងជានឹងប្រារព្ធឡើងនៅសារមន្ទីរ Louvre ក៏ដោយ ក៏គេរំពឹងថានឹងមានការចូលរួមពីថ្នាក់ដឹកនាំនៃអង្គការអន្តរជាតិ រួមទាំងផ្នែកកីឡាមួយចំនួន ក៏ដូចជាអង្គការក្រៅរដ្ឋាភិបាលមួយចំនួនផងដែរ។

គេរំពឹងថានឹងមានអ្នកទស្សនា​ជាង​៣០​ម៉ឺន​នាក់​នៅតាមបណ្តោយ​មាត់​ទន្លេ តាមដងផ្លូវ និងចេញ​ពី​អគារដែលនៅជាប់គ្នា ដែលប្រតិបត្តិការសន្តិសុខមិនធ្លាប់មានពីមុនមកនឹងត្រូវដាក់ពង្រាយ រួមទាំងសមាជិកកងកម្លាំងសន្តិសុខបារាំងចំនួន ៤៥,០០០នាក់ និងភ្នាក់ងារឯកជនចំនួន ២៤,០០០នាក់បន្ថែមពីលើបុគ្គលិកយោធាចំនួន ១៨,០០០នាក់ដែលត្រូវបានចល័ត។

ក្នុងអំឡុងការប្រកួតកីឡាអូឡាំពិកទាំងនេះ ប្រទេសបារាំងនឹងទទួលបានជំនួយពីប្រទេសប្រហែល ៤៥ដែលភាគច្រើនជាអឺរ៉ុប ដែលនឹងបញ្ជូនអ្នកជំនាញប្រមាណ ១,១០០នាក់ ដើម្បីពង្រឹងប្រតិបត្តិការសន្តិសុខ។ វាជារឿងធម្មតាទេដែលប៉ូលីសមកពីប្រទេសផ្សេងៗមានវត្តមាននៅក្នុងការប្រកួតកីឡា ឬព្រឹត្តិការណ៍ផ្សេងៗ បង្កើតការល្បាតដែលអមជាមួយភ្នាក់ងារបារាំង ដែលជាអ្នកតែមួយគត់ដែលត្រូវបានអនុញ្ញាតឱ្យធ្វើអន្តរាគមន៍ដោយប្រើកម្លាំង។ ក្នុងករណីនេះ ប្រទេសបារាំងបានស្នើសុំក្រុមបន្ថែមនៃសត្វសុនខដែលត្រូវបានបណ្តុះបណ្តាលក្នុងការរកគ្រឿងផ្ទុះ៕

ប្រែសម្រួល៖ មន្នីរ័ត្ន
ប្រភព៖ Inside The Games