កីឡាករវ័យក្មេងបំផុត​៥រូបបង្ហាញខ្លួនក្នុងប្រវត្តិសាស្ត្រពាន EURO

ព្រឹត្តិការណ៍​បាល់ទាត់​អឺរ៉ូ (EURO) ជាពានលំដាប់់ទី១ ប្រចាំទ្វីបអឺរ៉ុប ​ដែល​ធ្វើ​ឡើង​រាល់​៤ឆ្នាំម្ដង តម្រូវឲ្យក្រុមជម្រើស​ជាតិ​ទាំងអស់​ប្រកួត​ប្រជែង​គ្នា ប៉ុន្តែ​ជម្រុះ​យក​តែ​២៤​ក្រុម​ចុង​ក្រោយ​ប៉ុណ្ណោះ​​ទៅ​ជុំ​ផ្តាច់​ព្រ័ត្រ​។ ថ្ងៃនេះសារព័ត៌មានកម្ពុជាថ្មី សូមណែនាំពីកីឡាករវ័យ៥រូបដែលបង្ហាញខ្លួនក្នុងពានរង្វាន់នេះ។

១. កីឡាករប៉ូឡូញ Kacper Kozlowski
Kacper ជាកីឡាករ​វ័យក្មេងជាង​គេ​​បំផុត បានបង្ហាញខ្លួនក្នុងព្រឹត្តិការណ៍អឺរ៉ូ ក្នុងវ័យ១៧ ឆ្នាំនិង២៤៦ថ្ងៃ។ ការបង្ហាញខ្លួន​លើក​ដំបូង ​រូប​​គេ​​ត្រូវបាន​ប្ដូរ​ចូល​​នៅ​​វគ្គ​ទី២ ​នៅ​ពេល​ប៉ូឡូញ ប្រកួត​ជាមួយ​ អេស្ប៉ាញ វគ្គ​សន្សំ​ពិន្ទុ​ក្នុង​ពូល កាល​ពី​ឆ្នាំ២០២០។

២. កីឡាករអង់គ្លេស Jude Bellingham
Jude Bellingham ជាកីឡាករវ័យក្មេងទី២ ក្នុងព្រឹត្តិការណ៍អឺរ៉ូ​ ស្ថិតក្នុងវ័យ១៧ឆ្នាំនិង៣៤៩ថ្ងៃ។ រូបគេ​ត្រូវ​បាន​ប្ដូរចូល​នៅនាទីទី៨២ ក្នុងការប្រកួតបើកឆាករបស់អង់គ្លេស​ដែល​បាន​ឈ្នះ ក្រូអាត ដោយ​លទ្ធផល​ ១-០ នៅកីឡដ្ឋាន Wembley ឆ្នាំ​២០២០។ រូប​គេ​បានបំបែកកំណត់ត្រាជាកីឡាករវ័យក្មេងរបស់​មិត្ត​រួម​ជាតិ​ក្នុងការបង្ហាញខ្លួនក្នុងព្រឹត្តិការណ៍ប្រកួតធំៗ​របស់​អង់គ្លេស។

៣. កីឡាករហុល្លង់  Jetro Willems
Jetro Willems ជាកីឡាករវ័យក្មេងទី៣ ក្នុងប្រវត្តិសាស្រ្ដពានរង្វាន់​អឺរ៉ូ។ នៅ​ឆ្នាំ​២០១២ រូប​គេ​បានបង្ហាញខ្លួនលើកដំបូងឲ្យក្រុមជម្រើសជាតិហុល្លង់​ក្នុងការប្រកួតជាមួយ ដាណឺម៉ាក ក្នុងវ័យ​១៨ឆ្នាំនិង៧១ថ្ងៃ។ ​

៤. កីឡាករបែលហ្ស៊ិក Enzo Scifo
Enzo Scifo ជាកីឡាករវ័យក្មេងទី៤ ក្នុងប្រវត្តិសាស្រ្ត​អឺរ៉ូ។ រូបគេបានបង្ហាញខ្លួនដំបូងក្នុងព្រឹត្តិការណ៍​អឺរ៉ូ​ ឆ្នាំ១៩៨៤ ត្រឹមវ័យ១៨ឆ្នាំ និង១១៥ថ្ងៃ វគ្គសន្សំពិន្ទុក្នុងពូលជាមួយក្រុមជម្រើសជាតិបែលហ្ស៊ិក។ ពេលនោះរូបគេបាន​ជួយក្រុមបែលហ្ស៊ិក យកឈ្នះក្រុម យូហ្គោស្លាវី ក្នុងលទ្ធផល ២-០។

៥. កីឡាករ​អាល្លឺម៉ង់ Jamal Musiala
Jamal Musiala ជាកីឡាករវ័យក្មេងទី៥។ រូបគេបាន​បង្ហាញខ្លួនដំបូងជាមួយក្រុមជម្រើសជាតិអាល្លឺម៉ង់​ក្នុងវ័យ​១៨ឆ្នាំ និង១១៧ថ្ងៃ នៅ​ពេលស្មើ ហុងគ្រី ២-២។ រូប​គេ​​បានក្លាយជាកីឡាករវ័យក្មេងបំផុត​របស់​អាល្លឺម៉ង់​ ដែលបានបង្ហាញខ្លួនក្នុងព្រឹត្តិការណ៍អឺរ៉ូ៕

ប្រែ​សម្រួល៖ ផា រតនា