កីឡា

លន បញ្ញា ប៉ះ Elias ជាជើងឯកអឺរ៉ុបពិតៗមានកំណត់ត្រាមិនធ្លាប់ចាញ់

បានផុស

១០ ខែ មុន

នៅ

ថ្ងៃសុក្រ ៧ មិថុនា ២០២៤

ដោយ

ម្ចាស់មេដាយមាសកីឡាស៊ីហ្គេម លន បញ្ញា ត្រូវប៉ះជើងខ្លាំងពិតប្រាកដលំដាប់អឺរ៉ុប Elias Naji នៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Elias NAJI អាយុ២០ឆ្នាំធ្លាប់ប្រកួតបាន៣៥ដងគឺឈ្នះទាំងអស់ សូម្បីស្មើក៏មិនធ្លាប់ផង។ កីឡាករបារាំង-ម៉ារ៉ុករូបនេះមានខ្សែក្រវាត់ជាច្រើនគ្រឿងក្នុង៣ស្ថាប័នផ្សេងគ្នា ក្នុងនោះខ្សែក្រវាត់ថ្នាក់ជាតិបារាំងចំនួន៦ខ្សែ ខ្សែក្រវាត់ជាជើងឯកអឺរ៉ុប GMGP និងខ្សែក្រវាត់ WBC អឺរ៉ុប។

ស្ថាប័នប្រដាល់មួយថៃទ្វីបអឺរ៉ុបបានចារទុកហើយគឺ កីឡាករបារាំង Elias Naji បានគ្រងជើងឯក European Super-Welterweight នៅទី១ ខែកក្កដា ឆ្នាំ២០២៣ ដែលរហូតពេលនេះកាន់កាប់បានជិតមួយឆ្នាំហើយ។

ចំណែក លន បញ្ញា ជាម្ចាស់ខ្សែក្រវាត់៥ខ្សែ ជាម្ចាស់មេដាយមាសកីឡាស៊ីហ្គេម ឆ្នាំ២០២៣ ជាម្ចាស់មេដាយប្រាក់ស៊ីហ្គេម ឆ្នាំ២០២១។ ក្នុងរយៈពេលជាង៣ឆ្នាំចុងក្រោយនេះ សម្រាប់ការឡើងប្រកួតគុនខ្មែរ រូបគេបានចាញ់តែម្តងគត់គឺចាញ់មិត្តរួមជាតិ ឡៅ ចិត្រា ខណៈការប្រកួតជាមួយដៃគូបរទេសមិនធ្លាប់ចាញ់សោះ។

កាលពីថ្ងៃទី២ ខែមិថុនា ឆ្នាំ២០២៤ លន បញ្ញា បានប្រកួតឈ្នះកីឡាករបារាំង Omar Bathily ដោយពិន្ទុ នៅប្រទេសបារាំង និងជាការឈ្នះលើកទី២លើដៃគូម្នាក់នេះ។

នៅថ្ងៃទី២៧ ខែមិថុនាជាមួយគ្នានេះដែរ ឈុត សេរីវ៉ាន់ថង ត្រូវប្រកួតម៉ារ៉ាតុងដែលមានបេក្ខភាព៣ប្រទេសផ្សេងទៀតគឺម្ចាស់ផ្ទះបារាំង អង់គ្លេស និងអេស្ប៉ាញ។ ប្រសិនបើ រូបគេទទួលបានជ័យជម្នះក្នុងការប្រកួតម៉ារ៉ាតុងនេះ រូបគេនឹងទទួលបានរង្វាន់រថយន្ត១គ្រឿង ហើយនេះជាការប្រកួតម៉ារ៉ាតុងលើកទី២លើទឹកដីបារាំង បន្ទាប់ពីលើកទី១រូបគេទទួលបានខ្សែក្រវាត់។

ចំណែកដៃគូរបស់ ឡៅ ចិត្រា និង ព្រំ សំណាង មិនទាន់ត្រូវបានបង្ហាញទេ ប៉ុន្តែលោក សឿ វណ្ណៈ ស្ថាបនិកកម្មវិធីគុនខ្មែរស៊ុបភើហ្វៃបានឲ្យដឹងថា ដៃគូរបស់កីឡាករកម្ពុជានៅចុងខែនេះសុទ្ធតែលំដាប់កំពូលៗ និងជម្រើសប្រចាំទ្វីបអឺរ៉ុបហើយ ដូច្នេះជាឱកាសធំដែលកីឡាករគុនខ្មែរត្រូវសាងកេរ្តិ៍ឈ្មោះលើឆាកអន្តរជាតិ៕