ថ្ងៃនេះ ប៉ម Eiffel Tower បំពាក់កងកីឡា​អូឡាំពិក ក្នុងនាមជាម្ចាស់​ផ្ទះឆ្នាំ២០២៤

អគារតំណាងប្រទេសបារាំង ឬហៅប៉ម Eiffel Tower ត្រូវ​បាន​ដាក់តាំងបង្ហាញចិញ្ចៀន ឬកងកីឡា​អូឡាំពិកនៅថ្ងៃសុក្រទី៧ ខែមិថុនានេះ ពោលគឺ​៥០ថ្ងៃមុនពេលការប្រកួតចាប់ផ្តើម​កីឡា​ អូឡាំពិក ប៉ារីស ឆ្នាំ២០២៤ ​ដែល​​បើក​ជា​ផ្លូវ​ការ​នៅ​ថ្ងៃទី២៦ ខែកក្កដា រហូតដល់ថ្ងៃទី១១ ខែសីហា​​ ទើប​ចប់។

ដែកប្រវែង២៩​ម៉ែត្រ (៩៥ហ្វីត) និង​កម្ពស់១៥​ម៉ែត្រ (៤៩ហ្វីត) នៃកងទាំង​៥​នឹង​ត្រូវ​តុបតែងជានិមិត្តរូប​របស់​ទីក្រុងប៉ារីស ដើម្បីប្រារព្ធគម្រប់ពិធីរាប់ថយក្រោយ​៥០ថ្ងៃ នៅថ្ងៃព្រហស្បតិ៍មុនពេលព្រឹត្តិការណ៍អូឡាំពិកចាប់ផ្តើម។ ទីតាំងនៅផ្នែកខាងត្បូង អាចមើលឃើញទន្លេសែន នៅកណ្តាលទីក្រុងប៉ារីស វានឹងអាចមើលឃើញពេញមួយរយៈពេលនៃការប្រកួតអូឡាំពិករដូវក្តៅនេះ។

អត្តពលិកជាង​១​ម៉ឺន​នាក់​ គ្រោងនឹងចូលរួមក្នុងពិធីបើក ដោយចាប់ផ្តើមជាមួយនឹងក្បួនដង្ហែតាម​ដងទន្លេសែន ឆ្លងកាត់ទីក្រុងប៉ារីស។ ក្បួនដង្ហែនឹងបញ្ចប់ជាមួយនឹងពិធីបើកនៅពេលថ្ងៃលិចនៅថ្ងៃទី២៦ ខែកក្កដាក្នុងរដ្ឋធានីបារាំង។ ប៉ម Eiffel Tower ត្រូវបានគេរំពឹងថានឹងដើរតួយ៉ាងសំខាន់នៅក្នុងកីឡាអូឡាំពិករដូវក្តៅ និងប៉ារ៉ាឡាំពិក ឆ្នាំ២០២៤។ 

ក្រុមហ៊ុន ArcelorMittal ដែលជាក្រុមហ៊ុនដែកថែប និងរ៉ែឈានមុខគេរបស់ពិភពលោក ថ្មីៗនេះបានធ្វើការសាកល្បងដោយជោគជ័យនូវចិញ្ចៀនអូឡាំពិក នៅឯកន្លែងឧស្សាហកម្មឯកជនមួយនៅភាគខាងកើតប្រទេសបារាំង។

ពួកគេបាននិយាយនៅក្នុងសេចក្តីថ្លែងការណ៍មួយថា ៖«ដំណើរការផលិតបានចាប់ផ្តើមនៅរោងចក្រ Chateauneuf និង Le Creusot របស់ ArcelorMittal ដែលជាកន្លែងដែលដែកសំណល់អេតចាយត្រូវបានរលាយ និងត្រូវបានរមូរជាមុន ដោយផ្តល់ប្រសិទ្ធភាពឱ្យដែកនោះមានជីវិតមួយផ្សេងទៀត»។

ជាមួយនឹងប្រវែង ២៩ម៉ែត្រ និងកម្ពស់ ១៥ម៉ែត្រ ចិញ្ចៀនភ្ជាប់គ្នាត្រូវបានលើកឡើងដល់កម្ពស់ ១៥ម៉ែត្រ ដោយសាកល្បងដំណើរការស្ទូចដែលនឹងត្រូវបានប្រើដើម្បីលើកទៅកាន់ទីតាំងនៅលើប៉ម Eiffel Tower៕

ប្រែសម្រួល៖ មន្នីរ័ត្ន
ប្រភព៖ Inside The Games