កីឡា

ឈឿង ល្វៃ ទៅប្រកួតនៅហុងកុង២ដង ឈ្នះខ្សែក្រវាត់ទាំង២ដង

បានផុស

៩ ខែ មុន

នៅ

ថ្ងៃពុធ ២៦ មិថុនា ២០២៤

ដោយ

កីឡាករគុនខ្មែរ ឈឿង ល្វៃ បានឈ្នះខ្សែក្រវាត់កម្រិតពិភពលោកមួយទៀតនៅទឹកដីហុងកុង បន្ទាប់ពីរូបគេបានឈ្នះកីឡាករអ៉ីតាលី Luca Lombardo ដោយពិន្ទុដាច់កាលពីយប់ថ្ងៃទី២៥ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតក្នុងនាមជាគូឯកប្រចាំព្រឹត្តិការណ៍ ឈឿង ល្វៃ ធ្វើបានល្អខ្លាំងមែនទែនសម្រាប់ការប្រកួតទាំង៣ទឹក។ អ្នកលេងគុនខ្មែរបានចេញអាវុធដ៏មានប្រសិទ្ធភាពមួយកំភ្លេតែម្តងគឺកណ្តាប់ដៃ ទាត់ កែង និងជង្គង់ ដែលស្ទើរតែផ្តួលកីឡាករ Luca Lombardo ឲ្យសន្លប់ថែមទៀតដើម្បីឈ្នះខ្សែក្រវាត់ I-1 World Supreme Championship ទម្ងន់៧៥គីឡូក្រាម។

កីឡាករអ៉ីតាលីជាជើងខ្លាំងម្នាក់ដែលមានបទពិសោធប្រកួត៨០ដងគឺឈ្នះ៦៥ដង ចាញ់១៣ដង និងស្មើ២ដង។ រូបគេបានប្រឡូកសង្វៀនធំៗច្រើននៅតាមបណ្តាប្រទេសផ្សេងៗ។ ការប្រកួតកាលពីខែឧសភា រូបគេបានឈ្នះកីឡាករថៃ Wanchana នៅសង្វៀនធំ Rajadamnern និងធ្លាប់ប្រកួតនៅសង្វៀនធំ ONE Championship កាលពីឆ្នាំ២០២៣ដោយបានចាញ់កីឡាករប៊ុលហ្គារី Anton Petrov ដោយសន្លប់ក្នុងទឹកទី១។

នេះជាខ្សែក្រវាត់ទី២ដែល ឈឿង ល្វៃ បានឈ្នះនៅលើទឹកដីហុងកុង។ ខ្សែក្រវាត់ទី១គឺកម្រិតពិភពលោក World Super-4 Championship កាលថ្ងៃទី១២ ខែមីនា ឆ្នាំ២០២៤។ ពេលនោះនៅជុំទី១ អ្នកលេងគុនខ្មែរបានផ្តួលកីឡាករថៃ Fahsang ក្នុងទឹកទី១ដើម្បីឡើងទៅវគ្គផ្តាច់ព្រ័ត្រជួបកីឡាករអាល្លឺម៉ង់ Elysee Kochiese។

នៅវគ្គផ្តាច់ព្រ័ត្រ ឈឿង ល្វៃ នៅតែធ្វើបានល្អទៀតដោយបានឈ្នះកីឡាករអាល្លឺម៉ង់ Elysee Kochiese ដោយពិន្ទុដើម្បីក្លាយជាម្ចាស់ខ្សែក្រវាត់កម្រិតពិភពលោក។

សរុបទៅ ឈឿង ល្វៃ ចេញទៅប្រកួត២ដងនៅទឹកដីហុងកុង ទទួលបានខ្សែក្រវាត់ទាំងពីរដង ហើយជាកីឡាករគុនខ្មែរតែម្នាក់គត់ដែលបានឈ្នះខ្សែក្រវាត់នៅលើទឹកដីហុងកុង ប្រទេសចិន។

ចំណែកកីឡាករ សុខ ធី បានចាញ់កីឡាករអ៉ីរ៉ង់ Ali Zarinfar ដោយពិន្ទុនៅជុំទី១ដែលធ្វើឲ្យអ្នកលេងគុនខ្មែរអស់ឱកាសឡើងទៅវគ្គផ្តាច់ព្រ័ត្រក្នុងការប្រកួតខ្សែក្រវាត់ម៉ារ៉ាតុង I-1 World Super-4 Championship ដែលមានបេក្ខភាព៤រូប៕

អត្ថបទ៖ វីរបុត្រ