កីឡា

កម្ពុជាបញ្ជូនកីឡា២ប្រភេទទៅប្រកួតកីឡាអូឡាំពិកជាកីឡាកាតព្វកិច្ច

បានផុស

៣ ខែ មុន

នៅ

ថ្ងៃចន្ទ ១ កក្កដា ២០២៤

ដោយ

កម្ពុជានឹងបញ្ជូនកីឡា២ប្រភេទគឺកីឡាហែលទឹក និងអត្តពលកម្ម ទៅចូលរួមប្រកួតព្រឹត្តិការណ៍កីឡាអូឡាំពិក ឆ្នា២០២៤ នៅទីក្រុងបារីស ប្រទេសបារាំង។

សម្រាប់ព្រឹត្តិការណ៍កីឡាអូឡាំពិកឆ្នាំ២០២៤នេះ កម្ពុជាមិនមានកីឡាណាមួយដែលបានជាប់វគ្គជម្រុះ ឬទទួលបានកៅអីចូលរួមប្រកួតឡើយ ដូច្នេះការបញ្ជូនកីឡា២ប្រភេទទៅចូលរួមនេះតាមរយៈសិទ្ធិអនុគ្រោះ។

កីឡាករ ឈុន ប៊ុនថន ម្ចាស់មេដាយមាសស៊ីហ្គេម

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមលក្ខខណ្ឌដែលបានចែងក្នុងកីឡាអូឡាំពិក គ្រប់សមាជិកនៃគណៈកម្មាធិការអូឡាំពិកអន្តរជាតិ (IOC) ត្រូវតែបញ្ជូនអត្តពលិកផ្នែកកីឡា អត្តពលកម្ម និង ហែលទឹក ចូលរួមប្រកួត បើទោះបីជាបានជាប់វគ្គជម្រុះ ឬមិនជាប់ក៏ដោយ។ ប្រសិនបើប្រភេទកីឡាណាមួយបានជាប់វគ្គជម្រុះប្រចាំតំបន់ នឹងបានចូលរួមក្នុងនាមអត្តពលិកទទួលបានកៅអីសិទ្ធិពេញលេញ ប៉ុន្តែប្រសិនបើមិនបានជាប់វគ្គជម្រុះទេគឺត្រូវចូលរួមក្នុងនាមជាសមាជិកបំពេញកាតព្វកិច្ច ដែលហៅថា ទទួលបានសិទ្ធិអនុគ្រោះ។

ចាប់តាំងពីក្រោយសម័យសង្គ្រាមមក កីឡាការិនី ស៊ន សៀវម៉ី បានក្លាយជាអត្តពលិកកម្ពុជាទី១ទទួលបានសិទ្ធិពេញលេញក្នុងការចូលរួមប្រកួតកីឡាអូឡាំពិក ឆ្នាំ២០១៦ នៅប្រទេសប្រេស៊ីល បន្ទាប់ពីបានប្រកួតឈ្នះក្នុងវគ្គជម្រុះតំបន់អាស៊ី។

ចំពោះកីឡាអត្តពលិកកម្ម និង ហែលទឹកកម្ពុជាមិនធ្លាប់បានជាប់វគ្គជម្រុះទេ ប៉ុន្តែតែងតែបានចូលរួមរាល់លើក ដោយសារសិទ្ធិអនុគ្រោះក្នុងនាមជាសមាជិកបំពេញកាតព្វកិច្ច។

សម្រាប់ការបញ្ជូនចូលរួមប្រកួតលើកនេះ អត្តពលកម្មមានកីឡាករ ឈុន ប៊ុនថន ម្ចាស់មេដាយមាសកីឡាស៊ីហ្គេម ឆ្នាំ២០២៣ ខណៈកីឡាហែលទឹលមានកីឡាករ កូសុងដឺឡាប៉ារ៉ង់ អង់ត័្វន ម៉ាតាំងក្លូដ និងកីឡាការិនី សាក់ប៊ុន អប្សរា កាតារីណា។

សម្រាប់ប្រទេសនៅក្នុងតំបន់អាស៊ាន ក៏មានប្រទេស ឡាវ ព្រុយណេ និងទីម័រខាងកើត បានចូលរួមប្រកួតក្នុងនាមសិទ្ធិអនុគ្រោះដែរ។ ចំពោះ ថៃ ឥណ្ឌូណេស៊ី ម៉ាឡេស៊ី សិង្ហបុរី ហ្វីលីនពីន វៀតណាម និង មីយ៉ាន់ម៉ា បានចូលរួមក្នុងនាមដែលពួកគេមានកីឡាទទួលបានសិទ្ធិពេញលេញ។

សូមបញ្ជាក់ថា ព្រឹត្តិការណ៍កីឡាអូឡាំពិក នៅទីក្រុងបារីស ប្រទេសបារាំង នឹងចាប់ផ្តើមពីថ្ងៃទី២៦ ខែកក្កដា ដល់ថ្ងៃទី១១ ខែសីហា ឆ្នាំ២០២៤៕

អត្ថបទ៖ វីរបុត្រ

Related Topics:ព្រឹត្តិការណ៍អូឡាំពិក