Messi បំបែកកំណត់ត្រាថ្មីក្នុងពានរង្វាន់ Copa America

ខ្សែប្រយុទ្ធសញ្ជាតិអាហ្សង់ទីន Lionel Messi បានក្លាយជាកីឡាករ​ទី១ក្នុងប្រវត្តិសាស្រ្ដពានរង្វាន់ Copa America​ ដែល​បាន​បង្ហាញខ្លួនក្នុងការប្រកួតវគ្គផ្ដាច់ព្រ័ត្រច្រើនជាង​គេ​បំផុត។

ក្រោយបង្ហាញខ្លួនក្នុងវគ្គផ្ដាច់ព្រ័ត្រពានរង្វាន់ Copa America ឆ្នាំ២០២៤ ទល់ក្រុមជម្រើសជាតិកូឡុំប៊ី ប្រធានក្រុមជម្រើសជាតិអាហ្សង់ទីន Lionel Messi ជាកីឡាករដំបូងគេ បង្ហាញខ្លួនក្នុងការប្រកួតវគ្គផ្តាច់ព្រ័ត្រច្រើនបំផុតពោលគឺចំនួន៥លើក។

Lionel Messi បង្ហាញខ្លួនក្នុងវគ្គផ្តាច់ព្រ័ត្រពានរង្វាន់ Copa America ចំនួន៥លើក​គឺ​ឆ្នាំ២០០៧, ២០១៥, ២០១៦, ២០២១ និង២០២៤។ រូបគេបាននាំមុខកំណត់ត្រារបស់អតីតមិត្តរួមជាតិអាហ្សង់ទីន និងក្រុម Barcelona លោក Javier Mascherano ដែលបច្ចុប្បន្នជាគ្រូបង្វឹកក្រុមយុវជនអាហ្សង់ទីនក្នុងព្រឹត្តិការណ៍អូឡាំពិក ដែលធ្លាប់បង្ហាញខ្លួននៅវគ្គផ្ដាច់ព្រ័ត្រចំនួន៤លើកក្នុងឆ្នាំ២០០៤, ២០០៧, ២០១៥ និង២០១៦ ។

យ៉ាងណាមិញសម្រាប់ព្រឹត្តិការណ៍ Copa America ឆ្នាំនេះអាចជាការបង្ហាញខ្លួនលើកចុងក្រោយរបស់តារាឆ្នើម Lionel Messi ហើយចំពោះកំណត់ត្រារបស់រូបគេក្នុងនាមជាកីឡាករបង្ហាញខ្លួនច្រើនបំផុតក្នុងពានរង្វាន់ទ្វីបអាមេរិកឡាទីននេះគឺពិតជាពិបាកនឹងរកកីឡាកររូបណាធ្វើបានបែបនេះណាស់៕

ប្រែសម្រួល៖ ផា រតនា