កីឡា

បុរសណាហ្ស៊ីនិយមម្នាក់ជាប់គុក២ឆ្នាំពីបទគំរាមកំហែងការដង្ហែភ្លើងគប់អូឡាំពិក

បានផុស

២ years មុន

នៅ

ថ្ងៃពុធ ២៤ កក្កដា ២០២៤

ដោយ

ជនជាតិបារាំងដែលជាណាហ្ស៊ីនិយមម្នាក់ត្រូវបានកាត់ទោសឱ្យជាប់ពន្ធនាគាររយៈពេលពីរឆ្នាំ ពីបទគំរាមកំហែងតាមអ៊ីនធឺណិត ហើយត្រូវបានគេសង្ស័យពាក់ព័ន្ធនឹងការកំណត់គោលដៅវាយប្រហារអំឡុងពេលដង្ហែរភ្លើងគប់អូឡាំពិក ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសវ័យ១៩ឆ្នាំរូបនេះត្រូវបានឃុំខ្លួននៅតំបន់ Bas-Rhin ភាគខាងកើតកាលពីថ្ងៃពុធសប្តាហ៍មុន ក្រោមការសង្ស័យថា កំពុងរៀបចំការវាយប្រហារក្នុងអំឡុងពេលការប្រកួតកីឡាអូឡាំពិកនៅទីក្រុងប៉ារីសនាពេលខាងមុខ។ យោងតាមប្រភពសន្តិសុខ ពួកគេបានកត់សម្គាល់ឃើញការគំរាមកំហែងប្រឆាំងនឹងកីឡាអូឡាំពិក ទីក្រុងប៉ារីស ទៅលើក្រុមមួយដែលមានឈ្មោះថា “French Aryan division” នៅលើកម្មវិធីទូរស័ព្ទ Telegram; រួមទាំងការគំរាមសម្លាប់ និងការនិយាយស្អប់ខ្ពើម។

ការិយាល័យរដ្ឋអាជ្ញាសាធារណៈទីក្រុងប៉ារីស បាននិយាយនៅក្នុងសេចក្តីថ្លែងការណ៍មួយថា ជនសង្ស័យត្រូវបានកាត់ទោស បន្ទាប់ពីការកាត់ទោសយ៉ាងរហ័សមួយយប់ថ្ងៃសុក្រ ពីបទចែករំលែកការណែនាំអំពីការបំផ្ទុះគ្រាប់បែកនៅលើប្រព័ន្ធផ្សព្វផ្សាយសង្គម ការបង្ហោះញុះញង់ឱ្យមានការស្អប់ខ្ពើម និងការគំរាមកំហែងដល់ជីវិត ព្រមទាំងការបង្ហោះព័ត៌មានផ្ទាល់ខ្លួនដែលធ្វើឱ្យមនុស្សមានគ្រោះថ្នាក់។

ការិយាល័យរដ្ឋអាជ្ញាដដែលបានបំភ្លឺការអត្ថាធិប្បាយចោទប្រកាន់ ដែលបង្កឱ្យមានការស៊ើបអង្កេតដោយអង្គភាពរបស់ខ្លួន ដែលឧទ្ទិសដល់ការប្រយុទ្ធប្រឆាំងនឹងការស្អប់ខ្ពើមតាមអ៊ីនធឺណិត មិនបានកំណត់គោលដៅជាក់លាក់ចំពោះកីឡាអូឡាំពិកទីក្រុងប៉ារីសនោះទេ។

រដ្ឋមន្ត្រីក្រសួងមហាផ្ទៃបារាំង លោក Gerald Darmanin បាននិយាយថា ប៉ូលិសប្រឆាំងភេរវកម្មបានឃាត់ខ្លួនបុរសនេះដោយសង្ស័យថា “មានឆន្ទៈក្នុងការអន្តរាគមន៍ក្នុងអំឡុងពេលរត់បណ្ដាក់ភ្លើងគប់”។

ការរត់បណ្ដាក់ ឬដង្ហែភ្លើងគប់នេះ ជិតឈានដល់ទីបញ្ចប់ហើយ បន្ទាប់ពីធ្វើដំណើរអស់រយៈពេលជាច្រើនខែជុំវិញប្រទេសបារាំង នៅមុនពេលពិធីបើកការប្រកួតកីឡា។ កងកម្លាំងសន្តិសុខបារាំងបានចាប់ផ្តើមបិទកណ្តាលទីក្រុងប៉ារីសរួចហើយ ដើម្បីត្រៀមរៀបចំព្រឹត្តិការណ៍កីឡាអូឡាំពិក ដោយមានមន្ត្រី ៤៥,០០០ នាក់ ប៉ូលិសបរទេស ១,៩០០ នាក់ ទាហានបារាំង ១០,០០០ នាក់ និងភ្នាក់ងារសន្តិសុខឯកជនរាប់ពាន់នាក់ចូលរួមការពារផងដែរ៕