កីឡា

តម្លៃខ្លួនកីឡាករខ្លះកើនពី៣០០ទៅជាង១ពាន់ដុល្លារក្នុង១ឆ្នាំចុងក្រោយ

បានផុស

១ នាទី មុន

នៅ

ថ្ងៃពុធ ១៤ សីហា ២០២៤

ដោយ

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រាប់ឲ្យដឹងពីតម្លៃខ្លួនកីឡាករ កីឡាការិនីប្រដាល់គុនខ្មែរមួយចំនួនទទួលបានតម្លៃខ្លួនកើនឡើងពី៣០០ដុល្លារដល់ជាង១០០០ដុល្លារក្នុង១ប្រកួតសម្រាប់រយៈពេលមួយឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» លោក ខូវ ឆាយ ដែលបានឡើងកាន់ជាប្រធានសហព័ន្ធកីឡាប្រដាល់គុនខ្មែរកាលពីប៉ុន្មានខែមុនបានប្រាប់ថា ៖«សព្វថ្ងៃយើងឃើញហើយ ការរីកចម្រើនរបស់គុនខ្មែរកំពុងមានការគាំទ្រច្រើន ដូច្នេះពេលយើងរីកចម្រើនគឺភាគីពាក់ព័ន្ធទទួលបានផលប្រយោជន៍។ កីឡាករ កីឡាការិនីយើងតម្លៃខ្លួនកើនឡើងច្រើនជាងមុន។ យើងឃើញហើយ កីឡាករ កីឡាការិនីខ្លះកាលពីឆ្នាំមុនបានតម្លៃបានតម្លៃខ្លួន២០០ទៅ៣០០ដុល្លារក្នុងមួយប្រកួត តែឥឡូវកើនរហូតដល់១០០០ដុល្លារ ១២០០ដុល្លារ ឬ១៥០០ដុល្លារក៏មាន។ បើបូកបន្ថែមនឹងប្រាក់រង្វាន់២០០០ទៅ៣០០០ដុល្លារទៀត អាចមួយប្រកួតបាន៤០០០ទៅ៥០០០ដុល្លារក៏មាន»។

ការបង្កើនតម្លៃខ្លួន និងប្រាក់រង្វាន់ ស្របពេលមានកម្មវិធីប្រកួតច្រើនទាំងក្នុងស្រុក និងក្រៅប្រទេសជាមូលដ្ឋានគ្រឹះដ៏ចាំបាច់មួយដែលជំរុញឲ្យវិស័យកីឡាគុនខ្មែររីកចម្រើន។

លោក ខូវ ឆាយ បានរៀបរាប់ថា ៖«ដូច្នេះធ្វើឲ្យអាជីពប្រដាល់របស់ពួកគាត់កាន់តែមានតម្លៃ។ ពួកគាត់យកចិត្តទុកដាក់ ពង្រឹងការហ្វឹកហាត់ដើម្បីមានទីផ្សារប្រកួត ដោយសារតម្លៃខ្លួនចេះតែកើនឡើង។ វានៅតែមានអ្នកបោះបង់អាជីពខ្លះដែរ តែអ្នកចូលហ្វឹកហាត់ប្រដាល់ច្រើន ហើយអ្នកបោះបង់តិចតូចគឺជាអ្នកស៊ូអត់រួច»។

«ការប្រកួត យើងឃើញហើយ នៅលើសង្វៀនមានភាពស្វិតស្វាញជាងមុន មានការប្រកួតប្រជែងខ្ពស់ជាងមុន ដោយសារកីឡាករ កីឡាការិនីរបស់យើងបញ្ចេញអស់ពីសមត្ថភាព។ នៅពេលតម្លៃខ្លួនខ្ពស់គឺពួកគាត់វ៉ៃអស់ពីសមត្ថភាព គុណភាពកាន់តែល្អ»។ លោក ខូវ ឆាយ បញ្ជាក់បន្ថែម។

ប្រធានសហព័ន្ធកីឡាប្រដាល់គុនខ្មែរមិនបានបង្ហាញឲ្យដឹងថាតើកីឡាកររូបណាខ្លះ និងកម្រិតណាដែលកើនឡើងតម្លៃខ្លួនប្រកួតបានយ៉ាងឆាប់រហ័សក្នុងរយៈពេលមួយយ៉ាងខ្លី។ ទោះបីជាយ៉ាងណា បច្ចុប្បន្នមានម្ចាស់កម្មវិធីប្រកួតច្រើនកីឡាករល្បីៗលំដាប់ជួរមុខទទួលបានឱកាសប្រកួតស្ទើររកពេលសម្រាកគ្មាន ដូច្នេះតម្លៃខ្លួនរបស់ពួកគេកាន់មានការប្រកួតប្រជែងឡើងខ្ពស់ទៅតាមសមត្ថភាព និងប្រជាប្រិយភាពរបស់ពួកគេ៕

អត្ថបទ៖ វីរបុត្រ