កីឡា

អត្តពលិក៩៩នាក់ប្រកួតកីឡាគុនដាវ នៅ Peak Mall ក្នុងកីឡាជាតិ

បានផុស

២ years មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

កីឡាគុនដាវ បានក្លាយជាកីឡាតែមួយគត់រៀបចំការប្រកួតនៅផ្សារក្នុងចំណោមកីឡា៣៦ប្រភេទនៃព្រឹត្តិការណ៍កីឡាជាតិ លើកទី៤ និងកីឡាជាតិជនពិការ លើកទី២ មានកីឡា១៣ប្រភេទដែលបានចាប់ដំណើរការប្រកួតពីថ្ងៃទី៣១ ខែតុលា ដល់ទី៨ ខែវិច្ឆិកា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាគុនដាវមានកីឡាករ កីឡាការិនីចំនួន៩៩នាក់មកពីរាជធានី-ខេត្ត១២ និងក្រសួង២ ប្រកួតប្រជែងលើ៦វិញ្ញាសា (៦មេដាយមាស) នៅផ្សារទំនើប The Peak Mall ក្នុងមជ្ឈមណ្ឌលកោះពេជ្រ ចាប់ពីថ្ងៃទី៤ ដល់ទី៧ ខែវិច្ឆិកា ឆ្នាំ២០២៤។

សហព័ន្ធកីឡាគុនដាវកម្ពុជាបានសហការជាមួយផ្សារទំនើប រៀបចំការប្រកួតកីឡាគុនដាវក្នុងព្រឹត្តិការណ៍កីឡាជាតិលើកទី៤ ដែលជាការរួមចំណែកជំរុញឲ្យវិស័យកីឡាមួយរីកចម្រើនលើឆាកអន្តរជាតិ។ មុនពេលព្រឹត្តិការណ៍ប្រកួតឈានចូលមកដល់ សហព័ន្ធកីឡាគុនដាវកម្ពុជាក៏បានរៀបចំសិក្ខាសាលា និងរៀបចំការកម្សាន្តនានាសម្រាប់មហាជនទូទៅផង។

ព្រឹត្តិការណ៍កីឡាជាតិ លើកទី៤ និងកីឡាជាតិជនពិការលើកទី២ ត្រូវបានរៀបចំពិធីបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី៣០ ខែតុលា ឆ្នាំ២០២៤ ដែល រៀបចំឡើងដោយក្រសួងអប់រំ យុវជន និងកីឡា ជាមួយគណៈកម្មាធិការជាតិអូឡាំពិកកម្ពុជា សហការជាមួយ សហព័ន្ធកីឡាជាតិ និងក្រសួង ស្ថាប័ន រាជធានីខេត្ត។

ព្រឹត្តិការណ៍ពហុកីឡាដែលមានរយៈ១១ថ្ងៃនេះមានការប្រកួតតាមបណ្តាទីលានជាច្រើនក្នុងរាជធានីភ្នំពេញ និងតាមបណ្តាមួយចំនួនដូចជា ខេត្តកែប ស្វាយរៀង ព្រះសីហនុ និងខេត្តកំពង់ឆ្នាំង ក្រោមបុព្វបទ «កីឡាជាតិដើម្បីព្រែកជីកហ្វូណនតេជោ»។ ជាមួយគ្នានេះគណៈកម្មការរៀបចំការប្រកួតក៏បានកំណត់យុទ្ធនាការអប់រំចំនួន៥គឺ ១. កីឡារស់ក្នុងសន្តិភាព ២.ប្រជាជនម្នាក់លេងកីឡាមួយមុខយ៉ាងតិចប្រចាំជីវិត ៣.កីឡាគ្មានគ្រឿងញៀន គ្មានផ្សែងបារី ៤.កីឡាបៃតង កីឡាស្អាតស្អំ និង៥.កីឡាគ្មានសារធាតុដូប៉ា-ដូពីង៕