អូឡាំពិក២០២៨ កំពុងស្ថិតលើដំណើររៀបចំ​ដ៏​ល្អ​ បន្ទាប់ពីទស្សនកិច្ចរបស់ IOC

គណៈកម្មការ​សម្របសម្រួលរបស់គណៈកម្មាធិការអូឡាំពិកអន្តរជាតិបានបញ្ចប់ដំណើរទស្សនកិច្ចរយៈពេល​ ៣ថ្ងៃទៅកាន់ទីក្រុង Los Angeles សហរដ្ឋ​អាមេរិក ក្នុង​សប្តាហ៍នេះ ដើម្បីតាមដានវឌ្ឍនភាព​រៀប​ចំ​ការប្រកួតកីឡាអូឡាំពិក និងប៉ារ៉ាឡាំពិករដូវក្តៅ ឆ្នាំ២០២៨។

នេះនឹងរួមបញ្ចូលការបញ្ចប់ផែនការមេនៃទីកន្លែង កាលវិភាគនៃការប្រកួត ការដាក់ស្លាកសញ្ញា ការដាក់លក់សំបុត្រ និងការសម្ពោធម៉ាស្កូតជាផ្លូវការ។ ការជ្រើសរើសអ្នកស្ម័គ្រចិត្តដែលជាធាតុសំខាន់ក្នុងការរៀបចំហ្គេម។

លោក Casey Wasserman ប្រធាន LA28 Organizing បាននិយាយថា ៖«យើងបានកសាងមូលដ្ឋានគ្រឹះដ៏រឹងមាំសម្រាប់ហ្គេមរបស់យើង ហើយត្រៀមខ្លួនជាស្រេចដើម្បីឈានចូលដំណាក់កាលអនុវត្ត។ ជាមួយនឹងក្រុមដែលមានទេពកោសល្យ ពួកយើងផ្តោត​លើការផ្តល់នូវព្រឹត្តិការណ៍ដ៏អស្ចារ្យមួយសម្រាប់អត្តពលិក អ្នកគាំទ្រ និងអ្នកទស្សនា»។

គណៈកម្មាការ IOC បានទៅទស្សនាកន្លែងនានានៅ Long Beach, Pasadena និង Intuit Dome នៅ Inglewood ហើយបានបញ្ចប់ដំណើរទស្សនកិច្ច​នៅ UCLA ដែលជាទីតាំងនៃភូមិ​កីឡា​សម្រាប់អូឡាំពិក និងប៉ារ៉ាឡាំពិក។ អ្នករៀបចំ LA កំពុងប្តេជ្ញាប្រើប្រាស់កន្លែងដែលមានស្រាប់ក្នុងឆ្នាំ២០២៨ ជំនួសឱ្យការកសាងកីឡដ្ឋានកីឡាអចិន្ត្រៃយ៍ ហើយទីតាំងល្បីៗដូចជា Los Angeles Memorial Coliseum និង Rose Bowl នឹងរីករាយក្នុងការធ្វើជាម្ចាស់ផ្ទះព្រឹត្តិការណ៍អូឡាំពិកម្តងទៀត។

ទោះជាយ៉ាងណា កីឡាមួយចំនួនមិនទាន់ស្វែងរកកន្លែងសមរម្យ ដូចជា កីឡា Lacrosse sixes, កីឡា pentathlon ទំនើប និងកីឡា cricket ដែលអាចលេងនៅ East Coast ប៉ុន្តែ Wasserman មិនបានច្រានចោលការរៀបចំ​ឡើយ។

“រាល់ពេលដែលយើងទៅលេងទីក្រុង Los Angeles យើងត្រូវបានគេរំលឹកថាទីក្រុងនេះអស្ចារ្យប៉ុណ្ណា។ ប្រជាជនអស្ចារ្យប៉ុណ្ណា។ យើងឃើញ​ពី​គុណភាព និងបរិមាណនៃសម្ភារ​កីឡាលំដាប់ពិភពលោក ទំនើបទាន់សម័យ។ ប្រធានគណៈកម្មការសម្របសម្រួល LA28 របស់ IOC លោកស្រី Nicole Hoevertsz បានប្រាប់ Olympics.com។

លោកស្រី Hoevertsz ដែលបានចូលរួមប្រកួតកីឡាអូឡាំពិកនៅទីក្រុង Los Angeles ឆ្នាំ១៩៨៤ បានរំលឹកពីបទពិសោធន៍របស់​គាត់​នៅក្នុងទីក្រុង ហើយឆ្លៀតពេល​ដោះស្រាយបញ្ហាដឹកជញ្ជូន។ លោក​ស្រី​បាននិយាយថា ៖«យើងមានបញ្ហាដឹកជញ្ជូនរួចហើយនៅឆ្នាំ១៩៨៤ ហើយជាការពិត យើងត្រូវចាំថា អំឡុងពេលហ្គេមយើងនឹងមានគន្លងជាក់លាក់ ដូច្នេះវាមិនអាចប្រៀបធៀបទៅនឹងអ្វីដែលចរាចរនាពេលបច្ចុប្បន្នទេ»។

គួររម្លឹក​ថា ការប្រកួតកីឡាអូឡាំពិក LA28 ត្រូវបានកំណត់ធ្វើខែកក្កដា ឆ្នាំ២០២៨ ខណៈ​កីឡាប៉ារ៉ាឡាំពិក នៅខែសីហា ដោយទាំងពិធីបើក និងបិទធ្វើឡើងនៅ Los Angeles Memorial Coliseum និង SoFi Stadium៕

ប្រែសម្រួល៖ មន្នីរ័ត្ន
ប្រភព៖ Inside The Games