កីឡា

រយៈពេល២ឆ្នាំហើយ Saiyok នៅតែចិញ្ចឹមចិត្តសងសឹក ធឿន ធារ៉ា

បានផុស

៣ ខែ មុន

នៅ

ថ្ងៃសុក្រ ២០ ធ្នូ ២០២៤

ដោយ

ខ្លាចាស់លើសង្វៀនមួយថៃ Saiyok Pumpanmuang នៅតែចិញ្ចឹមចិត្តសងសឹកកំពូលអ្នកប្រដាល់កម្ពុជា ធឿន ធារ៉ា បន្ទាប់ពីរូបគេបានបរាជ័យក្នុងការប្រកួតដណ្តើមពានរង្វាន់ស្តេចថៃក្រោមផ្លែកែងរបស់ជើងខ្លាំងកម្ពុជាកាលពីថ្ងៃទី២៤ ខែធ្នូ ឆ្នាំ២០២២។

នៅសង្វៀន Thai Fight កាលពីថ្ងៃទី២០ ខែវិច្ឆិកា ឆ្នាំ២០២២ Saiyok បានឈ្នះពិន្ទុកីឡាករបារាំង Samuel Andoche ដើម្បីឡើងវគ្គផ្តាច់ព្រ័ត្រជួប ធឿន ធារ៉ា បន្ទាប់ពីកីឡាករកម្ពុជាបានផ្តួលកីឡាកររុស្ស៊ី Yurik Davtyan ឲ្យសន្លប់ក្នុងទឹកទី១ក្នុងថ្ងៃជាមួយគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជើងខ្លាំងទាំងពីរជួបគ្នាវគ្គផ្តាច់ព្រ័ត្រនៅថ្ងៃទី២៤ ខែធ្នូ ឆ្នាំ២០២២ ដើម្បីដណ្តើមពានរង្វាន់ និងខ្សែក្រវាត់ស្តេចថៃនៅកម្មវិធី Thai Fight នាទីក្រុងបាងកកដែលពេលនោះ ធឿន ធារ៉ា បានប្រើពេលត្រឹមតែ១ទឹកប៉ុណ្ណោះ។ រូបគេបានប្រើកណ្តាប់ដៃវាយសន្ធាប់លើពោះទឹក និងវាយមួយកែងធ្វើឲ្យ Saiyok បែកធំរហូតត្រូវបានអាជ្ញាកណ្តាលបញ្ឈប់ការប្រកួតក្នុងទឹកទី១។

ធឿន ធារ៉ា បានក្លាយជាកីឡាករកម្ពុជាទី១បានឈ្នះខ្សែក្រវាត់ Thai Fight និងជាកីឡាករកម្ពុជាទី១បានផ្តួលដៃគូឲ្យសន្លប់ក្នុងទឹកទី១ពីរនាក់ជាប់គ្នាក្នុងកម្មវិធីរបស់ថៃមួយនេះ។

Saiyok ចាប់តាំងពីចាញ់ ធឿន ធារ៉ា មក រូបគេបានឡើងសង្វៀនចំនួន១៤ដងគិតត្រឹមខែធ្នូ ឆ្នាំ២០២៤ ក្នុងនោះរូបគេបានឈ្នះ៩ដង ស្មើ១ដង និងចាញ់៤ដង។ ២ឆ្នាំចុងក្រោយនេះ រូបគេបានមកប្រកួតនៅកម្ពុជា២ដងគឺស្មើពិន្ទុ ធន់ រិទ្ធី សម្រាប់ការប្រកួតលើកទី១ និងចាញ់ពិន្ទុ ធន់ រិទ្ធី សម្រាប់ការប្រកួតលើកទី២។ ចុងក្រោយ រូបគេមានឈ្មោះប្រកួតជាមួយកីឡាករចិន Wang Xin នៅកម្មវិធី Kunlun ថ្ងៃទី១៦ ខែធ្នូ ឆ្នាំ២០២៤ នៅកោះពេជ្រ រាជធានីភ្នំពេញ ប៉ុន្តែគូនេះមិនបានប្រកួតទេ។

ក្នុងដំណើរមកកាន់ទឹកដីកម្ពុជាលើកចុងក្រោយ Saiyok បានប្រាប់ថា រូបគេចង់ជួបកីឡាករកម្ពុជា ធឿន ធារ៉ា ម្តងទៀតដើម្បីជម្រះបញ្ជីចាស់ ពីព្រោះកាលចាញ់នៅកម្មវិធី Thai Fight ដោយសាររបួស។ ជាមួយគ្នានេះ ធឿន ធារ៉ា បានឆ្លើយតបថា រូបគេស្វាគមន៍ជានិច្ចសម្រាប់ជំនួបសងសឹក ប៉ុន្តែសុំប្រកួតនៅទឹកដីកម្ពុជាវិញម្តង។

តាំងពីឆ្នាំ២០២២មក ធឿន ធារ៉ា បានកើនឡើងសមត្ថភាពយ៉ាងខ្លាំង។ រូបគេបានឈ្នះខ្សែក្រវាត់ 8 Men Tournaments ដល់ទៅ២ដង ទទួលបានរង្វាន់រថយន្ត១គ្រឿង ទទួលបានរង្វាន់វីឡា និងផ្ទៃល្វែង ព្រមទាំងមានឈ្មោះក្នុងទស្សនាវដ្តីអាមេរិកដ៏ល្បី Forbes ទៀតផង៕