គ្រូ​ក្លិប Inter Miami ប្រាប់​ថា មិន​បាន​គិត​រឿង​នាំ​យក​កីឡាករ Neymar

កីឡាករ Neymar ត្រូវបានគេរំពឹងថាអាចនឹងចូលរួមជាមួយអតីតមិត្តរួមក្រុម Lionel Messi និង Luis Suarez នៅក្លិប​អាមេរិក​ Inter Miami ដើម្បីបង្កើតប្រវត្តិសាស្រ្ដ​ថ្មី​មួយ​ដែល​អតីត​ខ្សែ​ប្រយុទ្ធកំពូលទាំង៣ MSN ម្ដងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Javier Mascherano ជាអតីតកីឡាករ Barcelona ធ្លាប់លេងជាមួយ Neymar បច្ចុប្បន្នជាគ្រូបង្វឹកក្លិប Inter Miami បានឆ្លើយតបទៅកាន់អ្នកសារព័ត៌មានជុំវិញ ការចុះផ្សាយ​ពី​ក្លិប​ដែល​នឹងអាចនាំយកខ្សែប្រយុទ្ធប្រេសុីល មកលេងជុំគ្នាជាថ្មីម្ដងទៀតនៅក្លិប Inter Miami ។

លោក Javier Mascherano បាននិយាយថា ៖«យើងមិនអាចនិយាយអ្វីអំពី Neymar បានទេ ពីព្រោះយើងគ្មានផែនការអ្វីសោះ។ ជាក់ស្តែង Neymar គឺជាកីឡាករដ៏អស្ចារ្យម្នាក់។ គ្រូបង្វឹកគ្រប់រូបនៅលើពិភពលោកចង់បានគាត់នៅពេលនេះ ប៉ុន្តែអ្នកដឹងហើយពីច្បាប់របស់ MLS ជុំវិញប្រាក់ខែកីឡាករ។ សម្រាប់​យើង​ក្នុង​ពេល​នេះ វា​មិន​អាច​ទៅ​រួច​ទេ​ក្នុង​ការ​ព្យាយាម​គិត​អំពី​គាត់»។

Neymar ទំនងជាអាចនឹងចាកចេញពីក្លិប Al-Hilal នៅរដូវក្តៅនេះ ដោយសារក្រុមលីគ Saudi Pro League ត្រូវបានគេរាយការណ៍ថានឹងមិនបន្តកិច្ចសន្យាឲ្យគាត់មួយឆ្នាំទៀត។

កីឡាករវ័យ៣២ ឆ្នាំរូបនេះបានរក្សាភាពស្ងៀមស្ងាត់ ចំពោះអ្វីដែលគេលើកឡើងពីអនាគតរបស់ខ្លួន ខណៈ​រូបគេចង់ស្តារ​កាយសម្បទាពេញលេញ និងបង្កើនសមត្ថភាពឲ្យល្អឡើងវិញ ដើម្បីអាចវិលត្រឡប់ចូលរួមជាមួយក្រុមជម្រើសជាតិប្រេស៊ីលនៅក្នុងព្រឹត្តិការណ៍ World Cup ឆ្នាំ២០២៦៕

ប្រែសម្រួល៖ ផា រតនា