Cristian ប្តេជ្ញា​ប្រឹងប្រែង​​ ដើម្បី​នាំ​ព្រះ​ខ័ន​រាជ​ស្វាយរៀងឡើងដល់វគ្គផ្តាច់ព្រ័ត្រ

ខ្សែបម្រើប្រយុទ្ធរបស់ក្រុម ព្រះខ័នរាជស្វាយរៀង កីឡាករ Cristian Roque បានបង្ហាញឆន្ទៈខ្ពស់ និង​​ប្រឹងប្រែងឱ្យខ្លាំង ដើម្បីជួយក្រុមសម្រេចគោលដៅឡើងទៅកាន់វគ្គផ្តាច់ព្រ័ត្រពាន AFC Challenge League។

កីឡាករសញ្ជាតិ ប្រេស៊ីល ២៩ ឆ្នាំរូបនេះ ​បាន​បង្ហាញសមត្ថភាព​យ៉ាង​ល្អ​ ក្នុងការប្រកួតជើងទី ១ វគ្គ ៨ ក្រុម​ចុង​ក្រោយ ពាន AFC Challenge League រវាង ស្វាយរៀង ទល់នឹង Shan United កាលពី​យប់​ថ្ងៃទី ៦ ខែ មីនា ឆ្នាំ​២០២៥។ ក្នុងនោះគេបានរួមចំណែករកបាន ៣ គ្រាប់ (hat-trick) ជួយឱ្យក្រុម ព្រះខ័នរាជ ទទួលជ័យជម្នះក្នុងលទ្ធផល ៦ ទល់នឹង ២។

បន្ទាប់ពីបញ្ចប់ការប្រកួតដ៏សំខាន់មួយនេះ Cristian Roque បានបង្ហោះសារខ្លីមួយ នៅលើគណនី Facebook របស់ខ្លួនយ៉ាងដូច្នេះថា «ខ្ញុំពិតជារីករាយខ្លាំងណាស់ ជាមួយការប្រកួតកាលពីយប់មិញ។ ជំហានដំបូង យើងបានជោគជ័យ ១០០%។ ឥឡូវនេះ ពួកយើងនឹងប្រឹងប្រែងឱ្យកាន់តែខ្លាំង ដើម្បីរក្សាគោលដៅរបស់យើងក្នុងការឡើងទៅកាន់វគ្គផ្តាច់ព្រ័ត្រ។ ខ្ញុំចង់អរគុណអ្នកគាំទ្រទាំងអស់គ្នា ដែលបានមកគាំទ្រពួកយើងដល់កីឡដ្ឋាន។ អ្នកទាំងអស់គ្នា គឺអស្ចារ្យ»។

គួរដឹងថា តាមរយៈជ័យជម្នះយប់មិញ បានធ្វើឱ្យ ​ព្រះ​ខ័ន​រាជ​ស្វាយរៀង​ មាន​ភាគ​រយ​កាន់តែខ្លាំង ក្នុងការដណ្តើមកៅអីឡើងទៅកាន់វគ្គពាក់កណ្តាលផ្តាច់ព្រ័ត្រ ខណៈការប្រកួតជើងទី ២ នឹងធ្វើឡើងនៅប្រទេស មីយ៉ាន់ម៉ា ថ្ងៃទី ១៣ ខែ មីនា៕

អត្ថបទ៖ សេម កុសល