Pacquiao នឹងវិលចូលសង្វៀនវិញ ដោយដណ្តើមខ្សែក្រវាត់ WBC ទល់កីឡាករ Mario Barrios

ស្តេចប្រដាល់ ហ្វីលីពីន លោក Manny Pacquiao នឹងត្រឡប់ពីការចូលនិវត្តន៍ ឈានជើងឡើងសង្វៀនប្រដាល់ឡើងវិញ ដោយប្រកួតដណ្តើមខ្សែក្រវាត់ពិភពលោក WBC ទល់នឹងអ្នកប្រដាល់ អាមេរិក Mario Barrios។

Pacquiao ធ្លាប់បានប្រកាសចូលនិវត្តន៍ពីអាជីពជាកីឡាករប្រដាល់រួចម្តងហើយ បន្ទាប់ពីគាត់ប្រកួតលើកចុងក្រោយ បរាជ័យក្រោមថ្វីដៃកីឡាករសញ្ជាតិ គុយបា Yordenis Ugas នៅរដ្ឋ Las Vegas ទឹកដី សហរដ្ឋអាមេរិក។

យ៉ាងណា ពេលនេះមានតម្រុយថា អ្នកប្រដាល់សញ្ជាតិ ហ្វីលីពីន វ័យ ៤៦ ឆ្នាំ នឹងត្រូវឡើងសង្វៀនឡើងវិញ បន្ទាប់ពីអវត្តមានពីសង្វៀនប្រដាល់អស់រយៈពេល ៤ ឆ្នាំ ដោយប្រកួតដណ្តើមខ្សែក្រវាត់ពិភពលោក WBC ទល់នឹងអ្នកប្រដាល់ អាមេរិក វ័យ ២៩ ឆ្នាំ Mario Barrios នៅថ្ងៃទី ១៩ ខែ កក្កដា ឆ្នាំ ២០២៥ នៅ អាមេរិក។

បន្ទាប់ពីប្រកាសចូលនិវត្តន៍ Pacquiao ក៏ធ្លាប់បានឡើងសង្វៀនចំនួន ២ លើកផងដែរ គឺនៅឆ្នាំ ២០២២ និងកាលពីពេលថ្មីៗនេះនៅអំឡុងខែ កក្កដា ឆ្នាំ ២០២៤ ប៉ុន្តែការប្រកួតទាំង ២ នេះ គឺពុំត្រូវបានគេចាត់ទុកជាការប្រកួតផ្លូវការឡើយ ដោយសារការប្រកួតទាំងនេះគ្រាន់តែជាការប្រកួតលក្ខណៈពិពណ៌ប៉ុណ្ណោះ។

សូមបញ្ជាក់ថា Pacquiao មានកំណត់ត្រាប្រកួតចំនួន ៧២ ដង ឈ្នះ ៦២ ដង ចាញ់ ៨ ដង និងស្មើ ២ ដង។ ចំណែក Mario Barrios ធ្លាប់ឡើងសង្វៀនបានចំនួន ៣២ ដង ក្នុងនោះឈ្នះ ២៩ ដង ចាញ់ ២ ដង និងស្មើ ១ ដង៕

ប្រែសម្រួល៖ សេម កុសល
ប្រភព៖ INDEPENDENT