កីឡា

ចប់ព្រឹត្តិការណ៍ ក្រុមនារី កម្ពុជា រកបាន៤ពិន្ទុ ពូល G ពាន AFC Women’s Asian Cup (រូបភាព)

បានផុស

១០ ខែ មុន

នៅ

ថ្ងៃសៅរ៍ ៥ កក្កដា ២០២៥

ដោយ

ក្រុមបាល់ទាត់នារី កម្ពុជា ទទួលបានជ័យជម្នះលើក្រុមនារី អារ៉ាប៊ីសាអ៊ូឌីត ដោយលទ្ធផល ២-១ សម្រាប់ការប្រកួតចុងក្រោយ ជម្រុះក្នុងពូល G ពានរង្វាន់ជម្រើសជាតិនារីអាស៊ី AFC Women’s Asian Cup ថ្ងៃទី៥ ខែកក្កដា ឆ្នាំ២០២៥ នៅពហុកីឡដ្ឋានជាតិអូឡាំពិក។

ការប្រកួតនៅវគ្គទី១ ក្រុមនារីកម្ពុជាធ្វើបានល្អដោយមានឱកាសជាច្រើនលើក ប៉ុន្តែតំបន់ប្រយុទ្ធធ្វើមិនបានល្អ។ ចំណែកក្រុមនារី អារ៉ាប៊ីសាអ៊ូ បានព្យាយាមការពារ និងវាយបក។

សម្រាប់ការប្រកួតវគ្គទី២ ក្រុមនារីកម្ពុជា ហាក់បង្កកំហុសច្រើនដែលធ្វើឲ្យអារ៉ាប៊ីសាអ៊ូឌីត ស៊ុតជាច្រើនលើក បើទោះបីជាក្រុមកម្ពុជាបានគ្រប់គ្រងបាល់ច្រើនក៏ដោយ។ ទីបំផុតគ្រាប់បាល់បានកើតមានឡើងនៅចុងម៉ោងចំនួន ៣ គ្រាប់។

ក្រុមនារីអារ៉ាប៊ីសាអ៊ូឌីត បានបើកឆាកនាំមុខ ០-១ នៅនាទី៨០ ដោយកីឡាការិនី Abdulamohsen Moudi ប៉ុន្តែក្រុមម្ចាស់ផ្ទះកម្ពុជាបានសម្រុក និងវាយបកវិញដោយរកបានគ្រាប់បាល់តាមស្មើ ១-១ ដោយកីឡាការិនី ហេង សុវណ្ណមុនី នៅនាទី ៨៥ និងគ្រាប់បាល់ជ័យជម្នះដោយកីឡាការិនី វឿន សុថាន នៅនាទី ៩០+៥។

ចប់ព្រឹត្តិការណ៍ប្រកួតជម្រុះក្នុងពូល ក្រុមនារីកម្ពុជា រកបាន៤ពិន្ទុ ស្ថិតនៅលេខ ៣ ក្នុងពូល G បន្ទាប់ពីឈ្នះ លើ អារ៉ាប៊ីសាអ៊ូឌីត ដោយលទ្ធផល ២-១ និងស្មើ ហុងកុង ១-១ ហើយចាញ់នារី ហ្វីលីពីន ០-៦។

ក្រុមនារី ហ្វីលីពីន បានកៅឡើងទៅកាន់ជុំចុងក្រោយ នៅប្រទេសអូស្ត្រាលី ឆ្នាំ២០២៦ បន្ទាប់ពីឈ្នះទាំង៣ប្រកួត រកបាន ៩ពិន្ទុ ស្ថិតនៅលេខ១ក្នុងពូល ហើយ ហុងកុង មាន ៤ ពិន្ទុ ស្ថិតនៅលេខ ២ ដោយគ្រាប់បាល់ចំណេញច្រើនជាងកម្ពុជា ខណៈអារ់ាប៊ីសាអ៊ូឌីត ចាញ់ទាំង ៣ ប្រកួត៕