កីឡា

Lamine Yamal ត្រូវគេស្នើឱ្យស៊ើបអង្កេត ជុំវិញការធ្វើខួបកំណើតអាយុ ១៨ ឆ្នាំ

បានផុស

៥១ វិនាទី មុន

នៅ

ថ្ងៃពុធ ១៦ កក្កដា ២០២៥

ដោយ

ក្រសួងកិច្ចការសង្គមរបស់ប្រទេសអេស្ប៉ាញបានស្នើសុំឲ្យមានការស៊ើបអង្កេតពីកីឡាករ Lamine Yamal ដែលជាខ្សែប្រយុទ្ធឆ្នើមរបស់ Barcelona បន្ទាប់ពីមានសេចក្តីរាយការណ៍ពីការជួលមនុស្សតឿមកសម្តែងក្នុងពិធីខួបកំណើតគម្រប់ខួប ១៨ ឆ្នាំរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីខួបកំណើតរបស់ Lamine Yamal បានរៀបចំកាលពីថ្ងៃ អាទិត្យ ទី ១៣ ខែ កក្កដា កន្លងទៅនៅអគារមួយកន្លែងក្នុងតំបន់ Olivella ដែលមានចម្ងាយ ៥០ គីឡូម៉ែត្រពីទីក្រុង Barcelona។ កម្មវិធីមានភ្ញៀវចូលរួមជាច្រើន ដែលមានទាំងអ្នកផលិតមាតិការលើ YouTube អ្នកមានឥទ្ធិពលក្នុងសង្គម និងមិត្តរួមក្រុម Barcelona ជាដើម។

មូលហេតុដែលគេទទូចចង់ស៊ើបអង្កេតលើរឿងនេះ ដោយសារខាងសមាគមមនុស្សដែលមានជំងឺ Achondroplasia និងជំងឺដាច់សរសៃឈាមខួរក្បាល (ADEE) បានថ្កោលទោសចំពោះទង្វើរបស់ Yamal ដែលចាត់ទុកជាការរើសអើងពូជសាសន៍ រំលោភលើសេចក្តីថ្លៃថ្នូរ និងសិទ្ធិរបស់ជនពិការ។

ពួកគេបានដាក់ពាក្យបណ្តឹងតាមផ្លូវច្បាប់រួចរាល់ ដោយជំរុញឱ្យក្រសួងពាក់ព័ន្ធចាត់ការលើរឿងនេះ។ យ៉ាងណា នៅក្នុងប្រទេស អេស្ប៉ាញ បានចែងច្បាប់មួយអំពីជនពិការភាព ដោយហាមប្រាមជួលអ្នកពិការមកសម្តែង ដោយសារការប្រើប្រាស់ជនពិការ ត្រូវបានគេចាត់ទុកជាការបង្កឱ្យមានការចំអកឬរើសអើងជាដើម។

ទោះយ៉ាងណាក៏ដោយ អ្នកសំដែងម្នាក់ដែលមានវត្តមាននៅក្នុងពិធីជប់លៀងបានការពារ Yamal ដោយបញ្ជាក់ថា មិនមាននរណាម្នាក់ ដែលមិនបានផ្តល់តម្លៃឱ្យពួកគាត់ឡើង ហើយការងារនេះក៏មិនខុសច្បាប់ដែរ។ អ្នកសម្តែងនោះបានសង្កត់ធ្ងន់ថា ពួកគេក៏ជាមនុស្សធម្មតាដែរ ហេតុអ្វីបានជាពួកគាត់មកសម្តែង បែរជាមានរឿងបែបនេះទៅវិញ ឬដោយសារតែលក្ខខណ្ឌរាងកាយរបស់ពួកគេ។

គួរឱ្យដឹងថា មកដល់ពេលនេះ Lamine Yamal និងក្លិប Barcelona គឺមិនទាន់បានបញ្ជាក់អ្វីលម្អិតឡើយអំពីរឿងនេះ៕