កីឡា

ប្រាក់រង្វាន់ពាន ACGL រដូវកាលនេះ ខណៈ ព្រះខ័នរាជស្វាយរៀង និងភ្នំពេញក្រោន មាន ១០ ម៉ឺនដុល្លារដូចគ្នាវគ្គចែកពូល

បានផុស

១១ ខែ មុន

នៅ

ថ្ងៃសុក្រ ១៥ សីហា ២០២៥

ដោយ

នៅរដូវកាល ២០២៥-២០២៦ គឺជារដូវកាលទី ២ សម្រាប់ពានក្លិបអាស៊ី កម្រិតទី ៣ AFC Challenge League ដំណើការឡើងវិញ បន្ទាប់ពីផ្អាកតាំងពីឆ្នាំ ២០១៤ ដែលពេលនោះប្រើឈ្មោះ AFC President’s Cup ខណៈប្រាក់រង្វាន់វិញក៏នៅតែរក្សាយ៉ាងច្រើនដដែល មិនខុសពីរដូវកាលមុននោះទេ។

លោក ឃួន ឡាប៊ូរ៉ាវី កាន់ពាន AFC Challenge League

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសៀវភៅបទបញ្ជាការប្រកួតរបស់ AFC បានបង្ហាញយ៉ាងច្បាស់អំពីប្រាក់រង្វាន់របស់ពាន AFC Challenge League ក្នុងរដូវកាល ២០២៥-២០២៦ គឺនៅរក្សាដូចរដូវកាលមុនដដែល។ ក្នុងនោះក្រុមនីមួយៗ ដែលបានចូលដល់វគ្គចែកពូលនឹងទទួលបាន ១០ ម៉ឺនដុល្លារអាមេរិក។ ដូច្នេះក្រុម ២ របស់កម្ពុជា គឺ ព្រះខ័នរាជស្វាយរៀង និង ភ្នំពេញក្រោន មានប្រាក់រង្វាន់ ១០ ម៉ឺនដុល្លារអាមេរិកដូចគ្នាសម្រាប់ការលេងនៅវគ្គសន្សំពិន្ទុក្នុងពូល។ មិនត្រឹមតែប៉ុណ្ណោះ ភ្នំពេញក្រោន ទទួលបាន ៥ ម៉ឺនដុល្លារអាមេរិកហើយសម្រាប់ការប្រកួតវគ្គជម្រុះជាមួយក្រុម Kasuka FC របស់ ព្រុយណេ កាលពីថ្ងៃទី១២ ខែសីហា។

ក្រុម Arkadag ឈ្នះពាន AFC Challenge League រដូវកាលមុន

ករណីបានឡើងដល់វគ្គ ៨ ក្រុមចុងក្រោយ នឹងទទួលបាន ៨ ម៉ឺនដុល្លារអាមេរិកបន្ថែម។ បើបានឡើងដល់វគ្គពាក់កណ្តាលផ្តាច់ព្រ័ត្រនឹងទទួលបាន ១២ ម៉ឺនដុល្លារអាមេរិកថែមទៀត។ ចុងក្រោយនៅវគ្គផ្តាច់ព្រ័ត្រ សម្រាប់ក្រុមណា ដែលឈ្នះជើងឯកនឹងទទួលបានប្រាក់រង្វាន់ ១ លានដុល្លារអាមេរិក ហើយក្រុមជើងឯករងនឹងទទួលបាន ៥០ ម៉ឺនដុល្លារអាមេរិក។

គួរឱ្យដឹងថា នៅរដូវកាល ២០២៥-២០២៦ នេះ ក្នុងចំណោមក្រុមទាំង ៨ ប្រចាំតំបន់ខាងកើត ដែលទទួលបានកៅអីឡើងវគ្គចែកពូលពានរង្វាន់កម្រិតទី ៣ របស់ទ្វីប អាស៊ី គឺមានក្រុម កម្ពុជា ចំនួន ២ រួមមាន ព្រះខ័នរាជស្វាយរៀង និង ភ្នំពេញក្រោន៕