Messi ចាត់ទុកជ័យជម្នះថ្ងៃនេះ ជាក្តីសុបិនរបស់​ខ្លួន​ សម្រាប់ការលេងចុងក្រោយនៅទឹក​ដី អាហ្សង់ទីន

ប្រធានក្រុម Lionel Messi បានបង្ហាញអារម្មណ៍ក្តុកក្តួល ក្រោយការប្រកួតវគ្គជម្រុះបាល់ទាត់ជើងឯកពិភពលោក ២០២៦ ទល់នឹងក្រុមជម្រើសជាតិ វ៉េណេស៊ុយអេឡា នាព្រឹកថ្ងៃ សុក្រ ទី ៥ ខែ កញ្ញា ឆ្នាំ ២០២៥ ត្រូវជាការប្រកួតចុងក្រោយរបស់ខ្លួន​ នៅ​លើ​ទឹក​ដី​ប្រទេស​ អាហ្សង់ទីន។

ក្រុមជម្រើសជាតិ អាហ្សង់ទីន ពិតជាធ្វើបានល្អខ្លាំងមែនទែន សម្រាប់ការប្រកួតវគ្គជម្រុះ​ជើងឯកពិភពលោកប្រចាំតំបន់ អាមេរិកខាងត្បូង ដោយពួកគេបានទទួលជ័យជម្នះលើក្រុមជម្រើសជាតិ វ៉េណេស៊ុយអេឡា ក្នុងលទ្ធផល ៣ ទល់នឹង ០។ ក្នុងនោះ Leo Messi ស៊ុតបញ្ចូលទី ២ គ្រាប់ម្នាក់ឯង នៅនាទីទី ៣៩ និង ៨០។ ចំណែកមួយគ្រាប់ទៀត គឺរកបានដោយ Lautaro Martinez នៅនាទីទី ៧៦។

ក្រោយបញ្ចប់ការប្រកួត ប្រធានក្រុមវ័យ ៣៨ ឆ្នាំ បាននិយាយលាអ្នកគាំទ្រ ចំពោះការប្រកួតចុងក្រោយរបស់ខ្លួននៅទឹកដី អាហ្សង់ទីន ដូច្នេះ ថា៖ «វាមានអនុស្សាវរីយ៍ច្រើន ដែលខ្ញុំធ្លាប់មានបទពិសោធ​លេងនៅលើទីលានមួយនេះ។ ខ្ញុំតែងតែរីករាយ ដើម្បីលេងតំណាងឱ្យ អាហ្សង់ទីន ជាមួយប្រជាជនរបស់ពួកយើង។… ខ្ញុំរីករាយខ្លាំងណាស់ ដែលអាចបញ្ចប់តាមរបៀបនេះ ក្នុងការលេងនៅទីនេះ ហើយវាជាអ្វី ដែលខ្ញុំតែងតែសុបិនចង់បាន»។

នេះគឺជាសារមួយ ដែល Messi បានប្រាប់ទៅកាន់អ្នកគាំទ្រ ជាពិសេសប្រជាជនអាហ្សង់ទីន ថា វាគឺជាការប្រកួតចុងក្រោយរបស់គាត់ ក្នុងការលេងឱ្យជម្រើសជាតិ អាហ្សង់ទីន នៅទឹកដី អាហ្សង់ទីន។ ពេលវេលាសំខាន់របស់របស់ខ្សែប្រយុទ្ធក្រុម Inter Miami ជាមួយក្រុមរហស្សនាមពពកស គឺនៅសល់ការប្រកួតក្នុងព្រឹត្តិការណ៍បាល់ទាត់ជើងឯកពិភពលោក ២០២៦ មួយទៀតប៉ុណ្ណោះ។ ដូច្នេះ បន្ទាប់ពីព្រឹត្តិការណ៍នោះ Messi ទំនងជានឹងប្រកាសចូលនិវត្តន៍ហើយ ដោយសារបច្ចុប្បន្នវ័យ​កាន់តែជ្រែខ្លាំង ដែលមិនអាចឱ្យអាជីពជាកីឡាករបាល់ទាត់របស់គាត់ ដំណើរការក្នុងរយៈពេលវែងឆ្ងាយបានទៀតនោះទេ។

Messi គឺជាកីឡាករដ៏ឆ្នើមបំផុតក្នុងពិភពលោក ហើយគាត់ត្រូវបានគេ ចាត់ទុកជាវីរបុរសម្នាក់របស់ អាហ្សង់ទីន ដោយគាត់បានជួយឱ្យជម្រើសជាតិមួយនេះឈ្នះពានជាច្រើន ដូចជាពាន World Cup ១ លើក, Copa America ២ លើក និងពាន CONMEBOL-UEFA Cup of Champions ១លើក៕

ប្រែសម្រួល៖ សេម កុសល
ប្រភព៖ ESPN