Haaland វ៉ា Van Nistelrooy, Messi ក្លាយជាកីឡាកររកបាន ៥០ គ្រាប់លឿនបំផុតនៅ UCL

ខ្សែប្រយុទ្ធរបស់ក្រុមមេឃខៀវ Manchester City កីឡាករ Erling Haaland បានបង្ហាញសក្តានុពលនៃការស៊ុតបញ្ចូលទីរបស់ខ្លួនយ៉ាងអស្ចារ្យ ដោយបានវ៉ាអតីតកីឡាករ Ruud Van Nistelrooy និង Lionel Messi ក្លាយជាកីឡាករ ដែលរកបានគ្រាប់បាល់ ៥០ គ្រាប់លឿនជាងគេក្នុងពានរង្វាន់ UEFA Champions League។

ដើមឡើយ កំណត់ត្រាអ្នករកបានគ្រាប់បាល់ ៥០ គ្រាប់លឿនជាងគេបំផុតក្នុងពាន UCL គឺត្រូវបានកាន់កាប់ដោយអតីតខ្សែប្រយុទ្ធ Manchester United និង Real Madrid លោក Van Nistelrooy ដែលពេលនោះលោកចាយពេល ៦២ ប្រកួត។ ចំណែកអតីតខ្សែប្រយុទ្ធ Barcelona កីឡាករ Lionel Messi បានចាយពេលចំនួន ៦៦ ប្រកួត ដើម្បីរកបាន ៥០ គ្រាប់ក្នុងពាន UCL។

ថ្មីៗនេះ Haaland បានធ្វើឱ្យអ្នកគាំទ្របាល់ទាត់មានការភ្ញាក់ផ្អើលជាខ្លាំង ដោយរូបគេបានចាយពេលត្រឹម ៤៩ ប្រកួតប៉ុណ្ណោះជាមួយ Man City និង Borussia Dortmund ដើម្បីរកបាន ៥០ គ្រាប់ក្នុងពាន UCL។

គួរឱ្យដឹងថា គ្រាប់បាល់ទី ៥០ របស់ Haaland ក្នុងពាន UCL នេះ គឺរកបាននៅក្នុងការប្រកួតទល់នឹង Napoli កាលពីយប់រំលងអាធ្រាត្រថ្ងៃទី ១៩ ខែ កញ្ញា ឆ្នាំ ២០២៥ ដែលពេលនោះរូបគេរកបាន ១ គ្រាប់ ជួយឱ្យ Man City ទទួលជ័យជម្នះក្នុងលទ្ធផល ២ ទល់នឹង ០៕

ប្រែសម្រួល៖ សេម កុសល
ប្រភព៖ ONE Football