រុស្ស៊ីបញ្ជាឱ្យក្រុមហ៊ុន Google លុបចោលព័ត៌មានមួយចំនួនក្នុងរយៈពេល ២៤ ម៉ោង

កាលពីថ្ងៃចន្ទម្សិលមិញនេះ សហព័ន្ធរុស្ស៊ីបានបញ្ជាឱ្យក្រុមហ៊ុន Google លុបចោលព័ត៌មានមួយចំនួនក្នុងរយៈពេល ២៤ ម៉ោងដែលរដ្ឋាភិបាលសម្រេចថាជាព័ត៌មានខុសច្បាប់ បើមិនដូច្នោះទេ ក្រុមហ៊ុននឹងប្រឈមនឹងការផាកពិន័យ ហើយថែមទាំងអាចរងការបន្ថយល្បឿនប្រព័ន្ធប្រតិបត្តិការទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Roskomnadzor បានបញ្ជាក់ថា រដ្ឋាភិបាលបានទំនាក់ទំនងទៅក្រុមហ៊ុន Google ប្រមាណជា ២៦០០០ដង ដើម្បីឱ្យក្រុមហ៊ុនលុបចោលព័ត៌មានខុសច្បាប់មានដូចជា វីដេអូដែលមានការប្រើប្រាស់គ្រឿងញៀន ឬមានអំពើហិង្សា និងព័ត៌មានមួយចំនួនទៀតទាក់ទងទៅនឹងក្រុមជ្រុលនិយម។

ក្រុមហ៊ុនអាចនឹងត្រូវរងការផាកពិន័យពី មួយម៉ឺនដុល្លារទៅ ប្រាំម៉ឺនដុល្លារ ប៉ុន្តែការផាកពិន័យអាចកើនឡើងរហូតទៅដល់ ១០ ភាគរយ នៃប្រាក់ចំណេញប្រចាំឆ្នាំ ប្រសិនបើក្រុមហ៊ុននៅតែបន្តមិនធ្វើតាមការស្នើសុំរបស់រដ្ឋាភិបាល។

ក្រៅពីការស្នើសុំឱ្យលុបចោលទិន្នន័យមួយចំនួននោះ ក្រុមហ៊ុន Google ក៏ត្រូវបានរងការចោទប្រកាន់ថា ពុំមានតម្លាភាពទាក់ទងទៅនឹងការដាក់កំណត់លើប្រព័ន្ធផ្សព្វផ្សាយ RT និង Sputnik នៅក្នុងកម្មវិធី YouTube ផងដែរ។

គួររំឭកផងដែរថា កាលពីខែមីនាកន្លងទៅ រដ្ឋាភិបាលក៏បានបន្ថយល្បឿនប្រព័ន្ធប្រតិបត្តិការ របស់ក្រុមហ៊ុន Twitter ដោយសារតែក្រុមហ៊ុននេះមិនបានធ្វើការលុបចោលព័ត៌មានដែលពួកគេបានស្នើសុំឱ្យបានទាន់ពេលវេលា។ ប៉ុន្តែក្រុមហ៊ុន Twitter បានលុបចោលព័ត៌មានដែលរដ្ឋាភិបាលបានស្នើសុំយ៉ាងលឿន ក្រោយពីរដ្ឋាភិបាលព្រមានថា នឹងបិទកម្មវិធីនេះទាំងស្រុងនៅក្នុងប្រទេសរុស្ស៊ី៕

ប្រភព៖ នាយកដ្ក្ឋានប្រឆាំងបទល្មើសបច្ចេកវិទ្យា