ទីបំផុត Elon Musk ទិញ Twitter បានហើយ ចាយលុយរាប់ពាន់លានដុល្លារ

លោក Elon Musk បានយល់ព្រមលើកិច្ចព្រមព្រៀងទិញយកបណ្ដាញសង្គម Twitter ក្នុងតម្លៃសាច់ប្រាក់ ៤៤ ពាន់លានដុល្លារកាលពីថ្ងៃចន្ទ ពោលក្នុងប្រតិបត្តិការមួយដែលនឹងផ្លាស់ប្តូរការគ្រប់គ្រងលើប្រព័ន្ធផ្សព្វផ្សាយសង្គមដែលមានអ្នកប្រើប្រាស់រាប់លាននាក់មួយនេះ ។

នៅក្នុងសេចក្តីថ្លែងការណ៍មួយលោក Elon Musk បាននិយាយថា លោកចង់ឲ្យមានសេរីភាពក្នុងការបញ្ចេញមតិ និងថែមទាំងចង់នាំយកបច្ចេកវិទ្យាមួយចំនួនចូលទៅក្នុងវេទិកាប្រព័ន្ធផ្សព្វផ្សាយមួយនេះផងដែរ ។

ទន្ទឹមនោះ វាក៏កើតឡើង ក្រោយការពិភាក្សាលើកិច្ចព្រមព្រៀងដែលកាលពីសប្តាហ៍មុនហាក់ដូចជាមិនប្រាកដប្រជា តែបានបង្កើនល្បឿនកាលពីចុងសប្តាហ៍ទៅវិញ បន្ទាប់ពីលោក Elon Musk បានទាក់ទាញម្ចាស់ភាគហ៊ុន Twitter ជាមួយនឹងព័ត៌មានលម្អិតហិរញ្ញប្បទាននៃការផ្តល់ជូនរបស់មហាសេដ្ឋីរូបនេះ ។

ក្រោមសម្ពាធនេះ Twitter បានចាប់ផ្តើមចរចាជាមួយលោក Elon Musk ឲ្យទិញក្រុមហ៊ុនក្នុងតម្លៃ ៥៤.២០ ដុល្លារក្នុងមួយហ៊ុន រហូតឈានដល់ការសម្រេចទិញយកទាំងស្រុងក្នុងទំហំទឹកប្រាក់ ៤៤ ពាន់លានដុល្លារ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS