រន្ធត់! រថយន្តក្រុង២គ្រឿងបុកគ្នា នៅប្រទេស សេណេហ្គាល់​ ស្លាប់និងរបួសមនុស្សជាង១០០នាក់ (មានវីដេអូ)

មនុស្សយ៉ាងតិច៤០នាក់បានស្លាប់ និង៨៧នាក់រងរបួស បន្ទាប់ពីរថយន្តក្រុងពីរគ្រឿង បុកគ្នាពេញទំហឹងនៅជិតទីក្រុង Kaffrine កណ្តាលប្រទេសសេណេហ្គាល់។

គ្រោះថ្នាក់​នេះ​​កើត​ឡើង​នៅ​លើ​កំណាត់​ផ្លូវជាតិ​លេខ​១ វេលា​ម៉ោង​៣​និង​១៥​នាទី​រំលង​អធ្រាត្រ​ឈាន​ចូល​ថ្ងៃ​អាទិត្យ។

លោកប្រធានាធិបតី Macky Sall បាននិយាយថា មនុស្ស ៤០ នាក់បានស្លាប់នៅក្នុងឧបទ្ទវហេតុដ៏រន្ធត់នេះ ហើយបានប្រកាសកាន់ទុក្ខថ្នាក់ជាតិរយៈពេលបីថ្ងៃ។

យោងតាមការឲ្យដឹងពីក្រុមពន្លត់អគ្គិភ័យ រថយន្តក្រុង៦០កៅអី កំពុងធ្វើដំណើរទៅកាន់ទីក្រុង Rosso ស្ថិតក្បែរព្រំដែនជាមួយប្រទេស ម៉ូរីតានី។

លោក Cheikh Dieng រដ្ឋអាជ្ញាសាធារណៈនិយាយថា ការស៊ើបអង្កេតដំបូងបង្ហាញថា គ្រោះថ្នាក់នេះ កើតឡើងនៅពេលរថយន្តក្រុងដឹកអ្នកដំណើរសាធារណៈ ផ្ទុះកង់ រេចង្កូតទៅបុករថយន្តក្រុងមួយគ្រឿងទៀត ដែលធ្វើដំណើរបញ្ច្រាស់ទិសគ្នា។ .

នេះ​ជាគ្រោះថ្នាក់ចរាចរណ៍សម្លាប់មនុស្ស​ច្រើន​បំផុត ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នៅក្នុង​ប្រទេស​ដែល​គ្រោះថ្នាក់​ចរាចរណ៍​ច្រើន​កើត​ឡើង ​ដោយ​សារ​តែ​អ្នកបើកបរ​មិន​គោរព​វិន័យ ផ្លូវ​មិន​ល្អ និង​យានយន្ត​ចាស់ៗ។

កាលពីខែតុលា ឆ្នាំ ២០២០ មនុស្សយ៉ាងតិច១៦នាក់បានស្លាប់ និង១៥នាក់ទៀតរងរបួស នៅពេលរថយន្តក្រុង បុកជាមួយរថយន្តដឹកទំនិញ នៅភាគខាងលិចប្រទេសសេណេហ្គាល់៕

សូមទស្សនាវីដេអូ៖

ប្រែសម្រួល៖​ Vann Vann

ប្រភព៖ Aljazeera

ចុចអាន៖ ទារក ១១នាក់ ស្លាប់ក្នុងអគ្គិភ័យឆាបឆេះមន្ទីរពេទ្យទើបសម្ពោធនៅ សេណេហ្គាល់