ដឹកភ្ញៀវចេញពីអាកាសយានដ្ឋានបុកបង្កាន់ដៃស្ពានអាកាស​៥មករាឆេះយ៉ាងសន្ធោសន្ធៅ

បុរសម្នាក់បើករថយន្តតាក់ស៊ីឯកជនម៉ាកtoyota prius មួយគ្រឿងដឹកភ្ញៀវជនជាតិបរទេសពីរនាក់ចេញពីអាកាស​យានដ្ឋានអន្តរជាតិភ្នំពេញក្នុងល្បឿនលឿនជ្រុលចង្កូតបុកបង្កាន់ដៃស្ពានអាកាស៥មករា ផ្ទុះឆេះយ៉ាងសន្ធោសន្ធៅបណ្ដាលឲ្យរងរបួសភ្ញៀវពីរនាក់ចំណែកអ្នកបើកបរប្រមូលឯកសារចេញពីរថយន្តគេខ្លួនបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីនេះបានបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គីភ័យចុះមកអន្តរាគមន៍ កាលពីវេលាម៉ោង១១និង៣០នាទី យប់ថ្ងៃទី៤ ខែធ្នូ ឆ្នាំ២០២៣ នៅចំណុចគល់ស្ពានអាកាស៥មករា ខាងលិច តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តtoyota prius ពណ៌ទឹកប្រាក់ពាក់ស្លាកលេខភ្នំពេញ2BE-7185 ជារថយន្តតាក់សុីឯកជន បើកបរដោយបុរសម្នាក់ មានដឹកភ្ញៀវជនជាតិបរទេសចំនួនពីរនាក់ចេញពីអាកាសយានដ្ឋានអន្តរជាតិភ្នំពេញ ដោយធ្វើដំណើរតាមបណ្តោយផ្លូវសហព័ន្ធរុស្ស៊ី ទិសដៅពីលិចទៅកើតក្នុងល្បឿនលឿន លុះមកដល់ចំណុចកើតហេតុ បម្រុងនឹងឡើងលើស្ពានក៏ជ្រុលចង្កូតបុកបង្កាន់ដៃស្ពានពេញទំហឹងបណ្ដាលឲ្យភ្ញៀវជនជាតិបរទេសទាំងពីរដែលជិះក្នុងរថយន្តរងរបួសបែកមុខបែកមាត់។ ភ្លាមនោះគេឃើញរថយន្តហុយផ្សែងខ្មួលខ្មាញ់ចេញពីផ្នែកខាងមុខនៃម៉ាស៊ីន ហើយចេញជាអណ្ដាតភ្លើងឆេះយ៉ាងសន្ធោសន្ធៅ។ 

បន្ទាប់ពីឃើញបែបនេះ ប្រជាពលរដ្ឋដែលធ្វើដំណើរតាមដងផ្លូវ និងនៅកន្លែងកើតហេតុនាំគ្នាយកបំពង់ពន្លត់អគ្គិភ័យជួយបាញ់ពន្លត់ តែមិនអន់ថយអណ្ដាតភ្លើងឆេះកាន់តែខ្លាំងឡើង រួចនាំគ្នាទំនាក់ទំនងទៅសមត្ថកិច្ចមូលដ្ឋានហៅរថយន្តពន្លត់អគ្គិភ័យចំនួន២គ្រឿងចុះមកអន្តរាគមន៍បាញ់ពន្លត់ទើបអាចគ្រប់គ្រងបាន ប៉ុន្តែរថយន្ដត្រូវខូចខាតទាំងស្រុង។ ក្រោយហេតុការណ៍ ជនជាតិបរទេសទាំងពីរនាក់បានរងរបួសត្រូវបានរថយន្តមន្ទីរពេទ្យរដ្ឋដឹកយកទៅសង្គ្រោះនៅឯមន្ទីរពេទ្យ។

ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែង និងស្ទូចរថយន្តយកទៅរក្សាទុក ដើម្បីស្រាវជ្រាវរកម្ចាស់មកដោះស្រាយតាមច្បាប់៕

អត្ថបទ៖ សុខា