ជនបង្កគ្រោះថ្នាក់ចរាចរណ៍បណ្ដាលឲ្យបុរសម្នាក់ស្លាប់នៅខណ្ឌទួលគោកមិនទាន់ចូលខ្លួនសារភាពតាមការអំពាវនាវរបស់លោកស្នងការនៅឡើយទេ

រហូតមកដល់ពេលនេះ ជនសង្ស័យដែលបើករថយន្ដបង្កគ្រោះថ្នាក់ចរាចរណ៍បណ្ដាលឲ្យបុរសម្នាក់ស្លាប់នៅខណ្ឌទួលគោកកាលពីថ្ងៃទី១៤ធ្នូ នៅមិនទាន់ចូលខ្លួនសារភាពតាមការអំពាវនាវរបស់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញនៅឡើយទេ។ នេះបើតាមការបញ្ចាក់របស់លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ កាលពីយប់ថ្ងៃទី២០ ខែធ្នូ ឆ្នាំ២០២៣នេះ។

ជាមួយគ្នានេះលោក សំ វិច្ឆិកា ក៏សូមអំពាវនាវបន្ថែមដល់ក្រុមគ្រួសារជនសង្ស័យសូមនាំកូនចូលខ្លួនមកសារភាពចំពោះមុខសមត្ថកិច្ចដើម្បីឲ្យសមត្ថកិច្ចអនុវត្តតាមនិតិវិធីដោះស្រាយចំពោះមុខច្បាប់។ លោកបន្ថែមថា ការរត់គេចខ្លួនគឺមិនអាចដោះស្រាយបញ្ហាដែលយើងបានប្រព្រឹត្តនោះទេ។

កាលពីព្រលប់ថ្ងៃទី១៩ធ្នូ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ បានចេញសារអំពាវនាវដល់អ្នកបើករថយន្ដបង្កគ្រោះថ្នាក់ចរាចរណ៍បណ្ដាលឲ្យបុរសម្នាក់បាត់បង់អាយុជីវិតនៅខណ្ឌទួលគោក មកបង្ហាញខ្លួននៅស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធី ខណៈជនសង្កកំពុងគេចខ្លួន។ លោកក៏បានសង្កត់ធ្ងន់ថា ការរត់គេចខ្លួនបែបនេះវាមិនអាចគេចពីផ្លូវច្បាប់មួយជីវិតបានទេ ហើយសមត្ថកិច្ចមិនដកដៃក្នុងការអនុវត្តច្បាប់ចំពោះករណីនេះបានដែរ ហើយបើនៅតែបន្តគេចខ្លួន សមត្ថកិច្ចនឹងបន្តសុំដីកាតាមរកចាប់ខ្លួនបន្តទៀតហើយ។

គួររំលឹកថា កាល​ពី​យប់​ថ្ងៃ​ទី​១៤​ ខែ​ធ្នូ​ ឆ្នាំ​២០២៣​ មានករណីគ្រោះថ្នាក់ចរាចរណ៍ដែលបង្កឡើងដោយរថយន្ត​មួយគ្រឿងម៉ាក Jeep overland ពាក់​ស្លាក​លេខ ភ្នំពេញ​ 2CB-9963 បានបើកបុក​ជនរងគ្រោះ​ជាបុរសម្នាក់ដែលជិះម៉ូតូ​បណ្ដាលឱ្យ​ស្លាប់​ នៅ​ខណ្ឌ​ទួលគោក​ ហើយជនបង្កបានបើករថយន្ដគេចខ្លួនបាត់។

បើតាមប្រភពសមត្ថកិច្ច ម្ចាស់​រថយន្ត​ឈ្មោះ​ សុខ​ លីណា​ និង​អ្នក​បើកបររថយន្ត​ពេលនោះ ត្រូវបាន​គេ​សង្ស័យថា​ ជា​កូនប្រុស​របស់លោកស្រី​ សុខ​ លីណា​ ដែល​មានឈ្មោះ​ ព្រហ្ម​ វិចិត្រ​សុសក្ដា​។ ក្រោយការកើតហេតុនេះ គ្រួសារជនបង្កបានទៅចូលបុណ្យសពជនរងគ្រោះថវិកាមួយចំនួន ដើម្បីសម្របសម្រួលឱ្យដកពាក្យបណ្ដឹងនេះវិញ ប៉ុន្តែយ៉ាងណា គ្រួសារជនរងគ្រោះ មិនយល់ព្រមដកពាក្យបណ្ដឹងឡើយ ដោយបានស្នើឱ្យមានការអនុវត្តតាមនីតិវិធីច្បាប់៕

អត្ថបទ៖ សុខុម