ឃាត់ខ្លួនជនជាតិចិនម្នាក់ ក្រោយបង្កគ្រោះថ្នាក់ចរាចរណ៍ និងឆែករកឃើញកាំបិតចុងស្រួចពីរដើមក្នុងរថយន្ដ

កម្លាំងសមត្ថកិច្ចបានឃាត់ខ្លួនបុរសជនជាតិចិនម្នាក់ ក្រោយបង្កគ្រោះថ្នាក់ចរាចរណ៍ជាច្រើនកន្លែងហើយព្យាយាម បើករថយន្ដគេចខ្លួន និងរកឃើញកាំបិតចុងស្រួចចំនួនពីរដើមក្នុងរថយន្ដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍​នេះបង្កភ្ញាក់ផ្អើលវេលា​ម៉ោង​១១យប់​ ថ្ងៃ​​ទី​១៣​ ខែឧសភា​ ឆ្នាំ​២០២៥ ស្ថិត​តាមបណ្ដោយផ្លូវ​លេខ៩០ តំបន់​អភិវឌ្ឍន៍​បឹងកក់​​ សង្កាត់​ស្រះចក​​ ខណ្ឌដូនពេញ​ រាជធានី​ភ្នំពេញ​។

បើតាមប្រភពព័ត៍មានពីប្រជាពលរដ្ឋបានអោយដឹងថា មុនពេលកើតហេតុមានបុរសជនជាតិចិនម្នាក់បេីករថយន្ត​ម៉ាក Tundra ពាក់ស្លាកលេខភ្នំពេញ​ 2AT-3207​ មិនដឹងជារឿងអ្វីនោះឡើយបានរត់ចូលរថយន្តរួចបើកទៅបំបុកប៉ារាស់របស់កម្លាំងកងរាជអាវុធហត្ថបើករត់គេច។ ភ្លាមៗ ប្រជាពលរដ្ឋបានជិះម៉ូតូប្រដេញតាមពីក្រោយរហូតទៅបុកម៉ូតូ​ Honda Dream ពាក់ស្លាកលេខបាត់ដំបង 1O-8721 ​បណ្ដាលអោយអ្នកដឹកជញ្ជូនម្ហូបអាហារម្នាក់រងរបួសបាក់ភ្លៅបញ្ជូនទៅមន្ទីរពេទ្យ។ បន្ទាប់ពីបុកបង្កគ្រោះថ្នាក់ចរាចរណ៍ បុរសជនជាតិចិនខាងលើបានព្យាយាមបើកគេចចេញពីតំបន់​អភិវឌ្ឍន៍​បឹងកក់​ រត់គេចបន្តទៅបុករះម៉ូតូ​ ម៉ូតូកង់បីឥណ្ឌា​ និងរថយន្ត​ នៅក្បែរពហុកីឡដ្ឋានជាតិអូឡាំពិក ក្នុងមូលដ្ឋានខណ្ឌ៧មករា​ ទេីបឃាត់បាន​។ ស្របពេលឃាត់នោះ សមត្ថកិច្ចបានឆែកឆេររកឃេីញកាំបិតចុងស្រួច២ដើមនៅក្នុងរថយន្តបន្ថែមទៀត។ ចំណែកជនជាតិចិនដែលជាអ្នកបង្កត្រូវនគរបាលជំនាញបាននាំខ្លួនទៅកាន់ប៉ុស្តិ៍នគរបាលដើម្បីធ្វើការសាកសួរ។

ក្រោយកេីតហេតុ សមត្ថកិច្ចជំនាញចរាចរណ៍ផ្លូវគោក​នៃស្នងការដ្ឋាននគរបាលរាជធានីភ្នំពេញ​ធ្វេីការវាស់វែងយករថយន្តម៉ូតូ​ និងម៉ូតូកង់បីឥណ្ឌា​ ទៅរក្សាទុកដេីម្បីរង់ចាំដោះស្រាយនៅពេលក្រោយ​៕

អត្ថបទ៖ រដ្ឋា