សហជីពកម្ពុជា ថ្កោលទោសយ៉ាងដាច់អហង្ការចំពោះភាគីថៃរំលោភដែនអធិបតេយ្យភាពកម្ពុជាម្តងហើយម្តងទៀត

ក្រុមសហជីពនៅកម្ពុជា បានថ្កោលទោសយ៉ាងដាច់អហង្ការ ចំពោះសកម្មភាពរបស់កងកម្លាំងសមត្ថកិច្ចថៃ ដែលបានឈ្លានពានលើដែនអធិបតេយ្យភាព និងបូរណភាពទឹកដីរបស់កម្ពុជាម្តងហើយម្តងទៀត ដែលជាទង្វើដ៏ឃោរឃៅបំផុត និងយ៉ាងគឃ្លើន។

ការថ្កោលទោសនេះ បន្ទាប់ពីកាលពីព្រឹកថ្ងៃទី ១០ ខែតុលា ឆ្នាំ ២០២៥ កងកម្លាំងសមត្ថកិច្ចថៃប្រដាប់ដោយដំបង និងខែល ព្រមទាំងឧបករណ៍ផ្សេងៗជាច្រើន បានធ្វើសកម្មភាពរាវមីន និងប្រើគ្រឿងចក្រឈូសឆាយដីដែលពួកគេបានព័ទ្ធរបងលួស នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានន័យ។ សកម្មភាពបំពានយ៉ាងគឃ្លើននេះ ត្រូវបានក្រុមសហជីពកម្ពុជា ចាត់ទុកជាអំពើឈ្លានពានលើអធិបតេយ្យភាព និងបូរណភាពទឹកដីរបស់កម្ពុជាយ៉ាងកំរោលបំផុត តាមរយៈការអនុវត្តច្បាប់ថៃមកលើដែនអធិបតេយ្យរបស់កម្ពុជា។

លោក សំ សឿន ប្រធានសហភាពពលកម្មជាតិកម្ពុជា សង្កេតឃើញថា យោថៃបានរំលោភបទឈប់បាញ់ម្ដងហើយម្ដងទៀតជាមួយកម្ពុជា ហើយមិនត្រឹមតែប៉ុណ្ណោះនៅថ្ងៃទី ១០ ខែតុលា យោធាថៃ បានបន្តឈ្លានពានលើអធិបតេយ្យភាព និងបូរណភាពទឹកដីរបស់កម្ពុជាយ៉ាងកំរោល និងយ៉ាងគឃ្លើនថែមទៀត។ លោកចាត់ទុកទង្វើចូលមកទន្ទ្រាន និងឈូសឆាយមកលើទឹកដីកម្ពុជា គឺជាអំពើដ៏អាក្រក់ និងឃោរឃៅបំផុត ហើយក៏ជាការរំលោភទាំងសិទ្ធិមនុស្ស និងច្បាប់អន្តរជាតិថែមទៀត។

លោក សំ សឿន បានថ្លែងថា «យើងខ្ញុំសូមថ្កោលយ៉ាងខ្លាំង ចំពោះទង្វើដ៏អាក្រក់របស់យោធាថៃ ដែលបានមករំលោភបំពានម្ដងហើយម្ដងទៀត មកលើទឹកដីកម្ពុជាជាពិសេសគឺនៅក្នុងតំបន់ភូមិជោគជ័យ និងភូមិព្រៃចាន់ ដែលជាលំនៅឋានរបស់ប្រជាពលរដ្ឋកម្ពុជារស់នៅអាស្រ័យផលរាប់ទសវត្សមកហើយ»។

ចំណែកលោក គឹម ចាន់សំណាង ប្រធានសហភាពសិទ្ធិកម្មករកម្ពុជា បានកត់សម្គាល់ដែរថា ភាគីថៃ តែងតែយកលេស​​ឈ្លានពានមកលើទឹកដីរបស់កម្ពុជាម្ដងហើយម្ដងទៀត ជាពិសេសតាមរយៈសកម្មភាពរាវមីន និងប្រើគ្រឿងចក្រឈូសឆាយដីនៅភូមិព្រៃចាន់ ដែលនេះជាការរំលោភកិច្ចព្រមព្រៀងបទឈប់បាញ់ជាមួយកម្ពុជា។ លោកក៏បានថ្កោលទោសចំពោះសកម្មភាពរបស់កងកម្លាំងសមត្ថកិច្ចថៃ ហើយចាត់ទុកថាជាទង្វើសាហាវព្រៃផ្សៃបំផុត។

លោកបានថ្លែងថា៖« យើងឃើញថាសម្រាប់ភាគីថៃតែងតែយកគ្រឿងចក្រយកមកឈូសឆាយ ហើយមានការចាក់ឧបករណ៍បំពងសំឡេងរំខានដល់ប្រជាពលរដ្ឋ ក៏ដូចជាក្មេងតូចៗដែលមិនអាចបានសម្រាកនៅពេលយប់ ហើយនេះជាទង្វើមួយសាហាវព្រៃផ្សៃបំផុត ដែលភាគីថៃតែងតែអនុវត្តមកលើកម្ពុជា»។

គួរឱ្យដឹងថា សកម្មភាពរបស់កងកម្លាំងសមត្ថកិច្ចថៃ គឺជាការរំលោភបំពានយ៉ាងធ្ងន់ធ្ងរទៅលើកិច្ចព្រមព្រៀងបទឈប់បាញ់, រំលោភលើស្មារតីនៃកិច្ចប្រជុំ GBC និង RBC, រំលោភលើអនុស្សរណៈនៃការយោគយល់គ្នា ត្រង់ចំណុចទី ២ មាត្រា ៤ នៃ MoU ឆ្នាំ ២០០០ និងរំលោភលើគោលការណ៍សិទ្ធិមនុស្ស និងច្បាប់មនុស្សធម៌អន្តរជាតិផងដែរ៕