សេដ្ឋកិច្ច

តំបន់សេដ្ឋកិច្ចពិសេស រ៉ូយ៉ាល់ គ្រុប សម្រេចការនាំចេញ ១.៥ ពាន់លានដុល្លារគិតត្រឹមខែកញ្ញា ឆ្នាំនេះ

បានផុស

៩ ខែ មុន

នៅ

ថ្ងៃចន្ទ ១៣ តុលា ២០២៥

ដោយ

គិតត្រឹមខែកញ្ញា ឆ្នាំ២០២៥នេះ តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ឬ Royal Group Phnom Penh Special Economic Zone (RGPPSEZ) របស់អ្នកឧកញ៉ា គិត ម៉េង សម្រេចបានការនាំចេញ គិតជាទឹកប្រាក់មានចំនួន ១.៥ ពាន់លានដុល្លារ។ តួលេខនេះអាចនឹងកើនលើសពី ២ ពាន់លានដុល្លារនៅចុងឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីត្រូវបានបង្កើតឡើងតាំងពីឆ្នាំ២០០៦ រហូតមកដល់បច្ចុប្បន្ន តំបន់សេដ្ឋកិច្ចពិសេស រ៉ូយ៉ាល់ គ្រុប ទទួលបានវិនិយោគិន ដែលជាក្រុមហ៊ុនផលិតកម្មចំនួន ៩១ និងក្រុមហ៊ុនមិនមែនផលិតកម្ម ចំនួន ២៩ ក្រុមហ៊ុន មកពីប្រទេសចំនួន ១៥ លើសាកលលោក និងផ្តល់ការងារដល់កម្មករចំនួន ៥៥,០០០នាក់ នៅក្នុង ឧស្សាហកម្មដែលមានតម្លៃបន្ថែមខ្ពស់ មានសារៈសំខាន់ចំពោះការរីកចម្រើនរបស់ប្រទេសជាតិ។

ក្នុងចំណោមក្រុមហ៊ុនទាំង ១២០ នេះ ក្រុមហ៊ុនថ្មីពីប្រទេសចិន ចំនួន ១០ ក្រុមហ៊ុន និងពីប្រទេសជប៉ុន ចំនួន ២ ក្រុមហ៊ុន មកបណ្តាក់ទុន នៅក្នុងតំបន់សេដ្ឋកិច្ចពិសេសរបស់ក្រុមហ៊ុនរ៉ូយ៉ាល់ ត្រឹមតែក្នុងឆ្នាំ២០២៥ មួយប៉ុណ្ណោះ។

RGPPSEZ បង្ហាញកាន់តែច្បាស់នូវភាពរឹងមាំ និងស្ថិរភាពរបស់ខ្លួន បើទោះបីជាមានស្ថានភាពតានតឹងនៃជម្លោះ ព្រំដែនកម្ពុជា-ថៃ នាពេលថ្មីៗនេះ និងវិធានការពន្ធគយរបស់សហរដ្ឋអាមេរិកថ្មី (១៩%) ក្រោមការគ្រប់គ្រងរបស់ប្រធានាធិបតី Trump ក៏ដោយ។

ជាក់ស្តែង គិតត្រឹមខែកញ្ញា ឆ្នាំ២០២៥ នេះ តម្លៃនាំចេញសរុបពីតំបន់សេដ្ឋកិច្ចពិសេស គឺមានចំនួនទឹកប្រាក់ ១.៥ពាន់លាន ដុល្លារ។ តួលេខនេះអាចនឹងកើនលើសពី ២ពាន់លានដុល្លារនៅចុងឆ្នាំ។ ចាប់ពីខែមករា ដល់ខែកញ្ញា ឆ្នាំ២០២៥ និង ចំពេលដែលមានស្ថានភាពតានតឹង តម្លៃនៃការនាំចេញទៅកាន់ប្រទេសថៃគឺ ១៤៥ លានដុល្លារ ឬ ៩.៧២% , ទៅកាន់ សហរដ្ឋអាមេរិកគឺ ៤២៣ លានដុល្លារ ឬ ២៨.៤៤%។

ចាប់តាំងពីចំណុចផ្តើមនៃភាពតានតឹងនៅតាមព្រំដែន និងការអនុវត្ត ពន្ធគយថ្មីរបស់សហរដ្ឋអាមេរិក តម្លៃនៃការនាំចេញទៅកាន់ប្រទេសថៃ និងសហរដ្ឋអាមេរិក មិនបានបង្ហាញ ពីការធ្លាក់ចុះគួរឱ្យកត់សម្គាល់ណាមួយឡើយ។ ចំណែកឯតម្លៃនាំចេញទៅគោលដៅផ្សេងទៀតដែលរួមបញ្ចូលគ្នាបានឈានដល់ចំណុចខ្ពស់បំផុតមួយ ក្នុងខែកញ្ញា។

ជាងនេះទៅទៀត ចាប់ពីការចាប់ផ្តើមនៃភាពតានតឹងនៅតាមបណ្តោយព្រំដែន ក្នុងខែមិថុនា រហូតមកដល់បច្ចុប្បន្ននេះ យើងបានទទួលកម្មករជាង ១០,០០០នាក់ ឱ្យចូលបម្រើការងារក្នុងតំបន់ដោយជោគជ័យ។ នេះឆ្លុះបញ្ចាំងពីការបន្តប្តេជ្ញាចិត្ត ចូលរួមចំណែករបស់ក្រុមហ៊ុនរ៉ូយ៉ាល់ ជាមួយសកម្មភាពរបស់រាជរដ្ឋាភិបាលកម្ពុជា ក្នុងការផ្តល់ឱកាសការងារដល់ពលករកម្ពុជាដែល បានវិលត្រឡប់មកពីប្រទេសថៃវិញ។

រ៉ូយ៉ាល់ គ្រុប គឺជាក្រុមហ៊ុនគ្រប់គ្រងការវិនិយោគជាយុទ្ធសាស្ត្ររបស់កម្ពុជា ដែលត្រូវបានទទួលស្គាល់ថាជាក្រុមហ៊ុន អាជីវកម្មដែលមានថាមពល និងចម្រុះបំផុតរបស់ប្រទេស។ ជាមួយនឹងចំណាប់អារម្មណ៍នៅក្នុងឧស្សាហកម្មជាច្រើនរួមមាន ធនាគារ និងហិរញ្ញវត្ថុ ធានារ៉ាប់រង ការវិនិយោគ ទូរគមនាគមន៍ ថាមពល ការដឹកជញ្ជូន ប្រព័ន្ធផ្សព្វផ្សាយ និងការកម្សាន្ត សណ្ឋាគារ និងរមណីយដ្ឋាន ការអប់រំ ការអភិវឌ្ឍអចលនទ្រព្យ ការជួញដូរនាំចេញនាំចូល និងតំបន់សេដ្ឋកិច្ចពិសេស៕

ដោយ៖ ឌិន ថារី