សេដ្ឋកិច្ច

ឧកញ៉ា សួរ វីរៈ៖ ការចុះកិច្ចសន្យាទិញស្រូវពីសហគមន៍កសិកម្ម ចូលរួមរក្សាលំនឹងទីផ្សារ

បានផុស

៩ ខែ មុន

នៅ

ថ្ងៃអង្គារ ១៤ តុលា ២០២៥

ដោយ

លោកឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស មានប្រសាសន៍ថា ការចុះកិច្ចសន្យាទិញស្រូវ-អង្ករ ជាមួយសហគមកន៍សិកម្មទំនើប ធ្វើឡើងដើម្បីលើកស្ទូយវិស័យស្រូវ-អង្ករកម្ពុជា និងជួយរក្សាលំនឹងទីផ្សារតម្លៃស្រូវ-អង្កររបស់ប្រជាកសិករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧកញ៉ា សួរ វីរៈ បានថ្លែងប្រាប់ «កម្ពុជាថ្មី» ថា ការងារកសិកម្មជាមួយសហគមន៍កសិកម្មទំបើបនេះ ក្រៅពីជួយរក្សាទីផ្សារដល់កសិករ និងការលើកកម្ពស់ស្រូវអង្ករកម្ពុជាហើយ លោកក៏ចង់បញ្ជ្រាបឱ្យកសិករងាកមកប្រើប្រាស់ជីធម្មជាតិ។

ក្នុងនោះ ក្រុមហ៊ុនក៏បានសន្យាជាមួយប្រជាពលរដ្ឋ នូវរាល់ការសាកល្បងប្រើជីធម្មជាតិ លាយជាមួយជីគីមីទិន្នផលដែលកសិករទទួលបាន គឺមិនឱ្យចាញ់នៅពេលដែលកសិករប្រើប្រាស់ជីគីមីនោះទេ។

ប្រសិនបើកសិករប្រើប្រាស់ជីគីមី និងជីធម្មជាតិរបស់ក្រុមហ៊ុន មិនបានផលគ្រប់ដូចកសិករធ្លាប់ធ្វើជីគីមី នោះក្រុមហ៊ុន នឹងចេញរាល់ការខូចខាតរបស់កសិករ។

«តាមរយៈការចុះកិច្ចសន្យាទិញពីសហគមទំនើបនេះគឺអាចឱ្យប្រជាកសិករប្រាកដចិត្តថា រាល់ស្រូវដែលផលិតមក នឹងមានទីផ្សារ ហើយអាចឱ្យគាត់ច្បាស់ចិត្ត និងយកចិត្តទុកដាក់នៅក្នុងការផលិត និងបង្កើនគុណភាពស្រូវរបស់គាត់កាន់តែល្អប្រសើរជាងមុន។» លោកឧកញ៉ា សួរ វីរៈ បន្ថែមបែបនេះ។

ក្រៅពីធ្វើការចុះកិច្ចសន្យាជាមួយសហគមន៍កសិកម្មទំនើបនៅខេត្តបាត់ដំបង និងខេត្តបន្ទាយមានជ័យ លោកឧកញ៉ា អាចនឹងបន្តការងារមួយនេះទៅខេត្តឧត្តមានជ័យបន្ថែមទៀត។

សម្រាប់ខេត្តឧត្តមានជ័យ នឹងមានការចុះកិច្ចសន្យាជាមួយសហគមន៍នៅក្នុងការផលិតស្រូវដោយប្រើប្រាស់ជីធម្មជាតិ ១០០% មិនមានការប្រើប្រាស់លាយឡំជាមួយជីគីមីនោះទេ។

សម្រាប់ការចុះកិច្ចនេះ ក្រុមហ៊ុន វីរៈ ប៊ុនថាំ ក៏នឹងធ្វើការនាំចេញអង្ករកម្ពុជា ទៅកាន់ទីផ្សារមួយចំនួនដូចជា ប្រទេសចិន អូស្ត្រាលី សហគមអឺរ៉ុប និងទីផ្សារសហរដ្ឋអាមេរិក ឬក៏ទីផ្សារនៅលើពិភពលោកដែលមានតម្រូវការអង្កររបស់កម្ពុជា។

កាលពីពេលថ្មីៗកន្លងទៅនេះ ក្រុមហ៊ុនវីរៈប៊ុនថាំ បានចុះកិច្ចសន្យាទិញស្រូវស្រងែជាង ៣ ម៉ឺនតោន ពីសហគមន៍កសិកម្មទំនើបចំនួន ៦ នៅក្នុងខេត្តបាត់ដំបង និងខេត្តបន្ទាយមានជ័យ ក្នុងតម្លៃចន្លោះពី ៩៥០៛-១០៥០៛ ក្នុងមួយគីឡូក្រាម។

ក្នុងនោះ សហគមន៍កសិកម្មទំនើបចំនួន ៦ ដែលត្រូវបានចុះហត្ថលេខានាពេលនេះ មានសហគមន៍កសិកម្មទំនើប នៅខេត្តបាត់ដំបងចំនួន ៥ និងសហគមន៍កសិកម្មទំនើប នៅខេត្តបន្ទាយមានជ័យចំនួន ១ ផងដែរ៕

ដោយ៖ ឌិន ថារី