នាយករដ្ឋមន្ត្រីស្រីទីមួយរបស់ជប៉ុន នឹងបង្ហាញវត្តមានផ្នែកការទូតលើកដំបូង ក្នុងកិច្ចប្រជុំអាស៊ាន

ទើបចូលកាន់តំណែងថ្មី នាយករដ្ឋមន្ត្រីស្រីទីមួយក្នុងប្រវត្តិសាស្រ្តជប៉ុន Sanae Takaichi កំពុងត្រៀមខ្លួនបង្ហាញវត្តមានផ្នែកការទូតលើកដំបូង ក្នុងកិច្ចប្រជុំកំពូលអាស៊ាននៅប្រទេសម៉ាឡេស៊ី នាចុងខែនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bernama កាលពីថ្ងៃអង្គារទី២១ខែតុលាឆ្នាំ២០២៥, លោកស្រីនឹងមានជំនួបទ្វេភាគីជាមួយសមភាគីម៉ាឡេស៊ីនិងជាប្រធានអាស៊ានប្តូរវេនឆ្នាំ២០២៥ លោក Anwar Ibrahim។

ក្រោយមក លោកស្រីក៏នឹងជួបជាមួយប្រធានាធិបតីហ្វីលីពីន Ferdinand Marcos Jr ផងដែរ ហើយនឹងចូលរួមក្នុងកិច្ចប្រជុំជប៉ុន-អាស៊ាន ក៏ដូចជាកិច្ចប្រជុំកំពូលសហគមន៍អាស៊ីការបំភាយឧស្ម័នសូន្យ (Asia Zero Emission Community) ដែលជាក្របខ័ណ្ឌកិច្ចសហប្រតិបត្តិការគ្មានការបញ្ចេញកាបូន ត្រូវបានបង្កើតឡើងដោយប្រទេសជប៉ុនផងដែរ។

យ៉ាងណា លោកស្រី Takaichi ទំនងជាវិលត្រឡប់ទៅប្រទេសវិញ នៅពាក់កណ្តាលនៃព្រឹត្តិការណ៍អាស៊ាន ដើម្បីជួបជាមួយប្រធានាធិបតីសហរដ្ឋអាមេរិក ដូណាល់ ត្រាំ ដែលនឹងទៅដល់ប្រទេសជប៉ុននៅថ្ងៃចន្ទ សម្រាប់ដំណើរទស្សនកិច្ចនៅអាស៊ី។

ក្រោយមក នាយករដ្ឋមន្ត្រីថ្មីរបស់ជប៉ុន នឹងត្រូវចូលរួមកិច្ចប្រជុំកំពូលនៃវេទិកា កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលចាប់ផ្តើមនៅថ្ងៃទី៣១ខែតុលា ក្នុងប្រទេសកូរ៉េខាងត្បូង។

សូមជម្រាបជាថ្មី ប្រធានគណបក្សប្រជាធិបតេយ្យសេរី (LDP) លោកស្រី Sanae Takaichi ត្រូវបានបោះឆ្នោតជ្រើសរើសជានាយករដ្ឋមន្ត្រីស្ត្រីដំបូងគេរបស់ប្រទេសជប៉ុននៅថ្ងៃអង្គារ​ទី​២១​ខែ​តុលា​ ដែលជាប្រវត្តិសាស្ត្រនៅក្នុងទិដ្ឋភាពនយោបាយដែលគ្រប់គ្រងដោយបុរសរបស់ប្រទេសអាស៊ី​មួយ​នេះ។

លោកស្រីទទួលបានសំឡេងគាំទ្រ២៣៧​ នៅក្នុងសភាជាន់ទាប ដោយបានយកឈ្នះលើមេដឹកនាំគណបក្សប្រជាធិបតេយ្យធម្មនុញ្ញ លោក Yoshihiko Noda ដែលបានទទួល១៤៩​សំឡេង៕

អត្ថបទ៖ សុខ សុវណ្ណ

ចុចអាន៖ Sanae Takaichi ក្លាយ​ជា​នាយក​រដ្ឋមន្ត្រី​ស្ត្រី​ដំបូង​គេ​របស់​ជប៉ុន ​បន្ទាប់​ពី​ការ​ឈ្នះ​ឆ្នោត​ភ្លូកទឹក​ភ្លូកដី