ព័ត៌មានជាតិ

៩ ខែឆ្នាំនេះ ខេត្តក្រចេះទទួលបានភ្ញៀវទេសចរជាតិ-អន្តរជាតិ ជាង ៤៥ ម៉ឺននាក់

បានផុស

៧ ខែ មុន

នៅ

ថ្ងៃចន្ទ ២៧ តុលា ២០២៥

ដោយ

រយៈពេល ៩ ខែ នៃឆ្នាំ២០២៥ ខេត្តក្រចេះ ទទួលបានភ្ញៀវទេសចរជាតិ និងអន្តរជាតិ សរុបចំនួនជាង ៤៥ ម៉ឺននាក់ (៤៥៥,៨៣៦ នាក់) ប្រៀបធៀបរយៈពេលដូចគ្នាកាលពីឆ្នាំ២០២៤ មានចំនួន ១៩០,២០៨នាក់ កើនឡើង ចំនួន ២៦៥,៦២៨នាក់ ស្មើនឹង ១៣៩%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាន់ សុគន្ធី ប្រធានទេសចរខេត្តក្រចេះ បានឱ្យដឹងថា នារដូវវស្សា ឬហៅថា រដូវកាលបៃតង មន្ទីរទេសចរខេត្ត បានរៀបចំកម្មវិធីដំណើរកំសាន្ត ១យប់ ២ថ្ងៃ ក្នុងគោលបំណងដើម្បីជំរុញការផ្សព្វផ្សាយអំពីសក្តានុពលទេសចរណ៍ថ្មីៗក្នុងខេត្ត និងជាការចូលរួមបំផុសចលនាទេសចរណ៍ក្នុងស្រុក និងចូលរួមកិច្ចការពារធនធានធម្មជាតិទន្លេមេគង្គ។

តំបន់ទេសចរសំខាន់ៗទាំងនោះ រួមមាន វត្តវិហារបុរាណរកាកណ្ដាល និងផ្ទះសសរ១០០ នៅក្នុងក្រចេះ សហគមន៍ទេសចរធម្មជាតិកោះទ្រង់ ការធ្វើដំណើរកំសាន្តជុំវិញកោះ ដោយជិះកង់ ម៉ូតូ រទេះសេះ រទេះគោ និងរ៉ឺម៉កកង់បី មើលទេសភាពលើកោះ សួនបន្លែ និងដើមរការដ៏ធំ ដែលមានអាយុកាលរាប់រយឆ្នាំ ស្វែងយល់ពីជីវភាពការរស់នៅរបស់ប្រជាពលរដ្ឋនៅលើកោះទ្រង់ អគាររចនាបថបារាំង។

តំបន់ដ៏មានសក្តានុពលបំផុតនោះ គឺការទស្សនាសត្វផ្សោតទន្លេមេគង្គ នៅអន្លង់ផ្សោតកាំពី ទាំងរដូវប្រាំង និងវស្សា នៅស្រុកចិត្របុរី និងព្រះវិហារធំវត្តសសរ១០០ នៅស្រុកសំបូរ និងរមណីយដ្ឋានប្រវត្តិសាស្ត្រ វិមានរណសិរ្ស ២ធ្នូ នៅស្រុកស្នួល។

លោកប្រធានមន្ទីរទេសចរខេត្ត បានឱ្យដឹងថាបន្ថែមទៀតថា ដោយឈរលើយុទ្ធសាស្ត្រអភិវឌ្ឍន៍វិស័យទេសចរណ៍ និងទិសដៅការងារអនុវត្តបន្តសម្រាប់ត្រីមាសទី៤ ឆ្នាំ២០២៥ មន្ទីរមានគោលដៅសំខាន់ៗជាច្រើន ជាពិសេសការចុះពង្រឹងគុណភាពផលិតផល និងសេវាកម្មទេសចរណ៍ ដើម្បីត្រៀមទទួលភ្ញៀវទេសចរក្នុងឱកាសបុណ្យឆ្លងឆ្នាំសកល ២០២៥-២០២៦៕

អត្ថបទ៖ ប្រុញ វិធិន