រញ្ចួយដីក្នុងកម្រិត ២.០ រ៉ិចទ័រ ក្នុងខេត្តភាគខាងជើងថៃ

គេហទំព័រអង្គការឃ្លាំមើលរញ្ជួយដីក្នុងប្រទេសថៃបានរាយការណ៍ពីការរញ្ជួយដីកម្រិត ២.០ រ៉ិចទ័រ ក្នុងជម្រៅ ៥ គីឡូម៉ែត្រ ស្ថិតនៅខេត្ត Lamphun នាវេលាម៉ោងប្រហែល ៧:៥១ ព្រឹក។ នេះបើយោងតាមការចុះផ្សាយពីសារព័ត៌មាន today នាថ្ងៃទី១១ ខែវិច្ឆិកា ឆ្នាំ ២០២៥ ។

យ៉ាងណាក៏ដោយ អាជ្ញាធរក្នុងតំបន់មិនទាន់ដឹងថា មានអ្នករងរបួសនិងស្លាប់ ឬក៏រងការខូចខាតផ្ទះសម្បែងទេ ខណៈពេលនេះ ក៏មិនទាន់មានអ្នកស្រុកណាម្នាក់រាយការណ៍ថា មានអារម្មណ៍រំញ័រ ឬវិលមុខនឹងការរញ្ចួយដីឡើយ។

សូមជម្រាបជូនថា ខេត្តភាគខាងជើងប្រទេសថៃនេះធ្លាប់រញ្ជួយដីលើកដំបូង នៅម៉ោង ៤:៥៤ ព្រឹក ដោយមានកម្រិត ២.៣ រ៉ិចទ័រ ក្នុងជម្រៅត្រឹមតែ១ គីឡូម៉ែត្រ។ ប៉ុន្មាននាទីក្រោយមក នៅម៉ោង ៥:០៦ ព្រឹក ការរញ្ជួយដីលើកទីពីរបានកើតឡើង ដោយមានកម្រិត ១.៧ រ៉ិចទ័រ ។

ថ្វីដ្បិតតែ ទំហំនៃការរញ្ជួយដីទាំង៣លើកនេះមានកម្រិតទាបក៏ដោយ ការកើតឡើងជាបន្តបន្ទាប់នៃការរញ្ជួយដីក្នុងរយៈពេលខ្លីបែបនេះ បានទាក់ទាញការចាប់អារម្មណ៍យ៉ាងខ្លាំងពីសាធារណជន និងស្ថាប័នពាក់ព័ន្ធ ជាពិសេសនៅភាគខាងជើងប្រទេសថៃ ជាកន្លែងដែលការរញ្ជួយដីកើតឡើងញឹកញាប់៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រលកយក្សស៊ូណាមិ វាយប្រហារខេត្តមួយនៅ ជប៉ុន ក្រោយរញ្ជួយដីដ៏ខ្លាំងក្លា