កីឡា

សហព័ន្ធការ៉ាតេបើកវគ្គបណ្តុះបណ្តាលគ្រូមធ្យមដោយរំពឹងសិក្ខាកាមចែករំលែកបន្ត

បានផុស

៥ ខែ មុន

នៅ

ថ្ងៃចន្ទ ២៤ វិច្ឆិកា ២០២៥

ដោយ

សហព័ន្ធកីឡាការ៉ាតេកម្ពុជា បានបើកវគ្គបណ្តុះបណ្តាលគ្រូបច្ចេកទេសកម្រិតមធ្យមថ្នាក់ជាតិ រយៈពេល ៥ ថ្ងៃ ចាប់តាំងពីថ្ងៃទី១៩ ដល់ទី២៣ ខែវិច្ឆិកា ឆ្នាំ ២០២៥ ដោយមានសិក្ខាកាមចំនួន ៣០នាក់ ក្នុងនោះមាន នារី ៥ នាក់មកពីក្លិប សមាគម និងសាលាគុន ២៨ បានចូលរួមរៀនសូត្រ។

វគ្គបណ្តុះបណ្តាលគ្រូបច្ចេកទេសកីឡាការ៉ាតេបានបង្ហាញពីចំណុចសំខាន់ៗជាច្រើនដើម្បីផ្តល់សិក្ខាកាមឲ្យទទួលបានចំណេះដឹងកាន់តែទូលំទូលាយ។ គោលសំខាន់ទាំងនោះមានដូចជា បច្ចេកទេសគ្រឹះ ហៅថា Kihon និងកាតា (Kata) ការប្រឆាំងសារធាតុដូប៉ាដល់ភាគីពាក់ព័ន្ធ និងការប្រឆាំងសារធាតុដូប៉ាដល់ភាគីពាក់ព័ន្ធ, ការបំពានវិធានប្រឆាំងដូប៉ា, សិទ្ធិ និងការទទួលខុសត្រូវរបស់អ្នកគាំពារកីឡា។ ទ្រឹស្តី នៃការប្រយុទ្ធ (Kumite Theory) និងបច្ចេកទេសប្រយុទ្ធ (វាយយកពិន្ទុ) ការត្រៀមលក្ខណ:នៃការបង្ហាត់ តួនាទីគ្រូបង្ហាត់ លក្ខណៈពិសេសរបស់គ្រូ ការរៀបចំផែនការហ្វឹកហាត់ និងវិធីសាស្រ្តការហ្វឹកហាត់ ការហ្វឹកហាត់បច្ចេកទេស និងគម្រោងបង្ហាត់។

បន្ថែមលើសនេះ វគ្គបណ្តុះបណ្តាលក៏រំលេចចេញរបៀបនៃការបែងចែកវ័យរបស់សិស្សកិច្ច ថាមពល និងប្រព័ន្ធចលនាទាំង៥ ការបែងចែកកីឡា និងប្រភេទកីឡា។ ការជ្រើសរើសកីឡាករដើម្បីជើងឯក ការរៀបចំការប្រកួត និងការរៀបចំពូលប្រកួត។

បន្ទាប់ពីដំណើរការបណ្តុះបណ្តាលរយៈពេល ៥ ថ្ងៃត្រូវបានបញ្ចប់ សិក្ខាកាម ១៦នាក់ទទួលបានចំណេះដឹង និងយល់ច្បាស់វគ្គសិក្សានេះ ដោយសារពួកគាត់ធ្លាប់ចូលរួមវគ្គបណ្តុះបណ្តាលបែបនេះពីមុនផង។ ក្នុងនោះ សិក្ខាកាម ៩ នាក់ទទួលបានលទ្ធផលល្អបង្គួរ និង៥នាក់ទទួលបានលទ្ធផលមធ្យម។

លោក ដែក ភារៈ អគ្គលេខាធិការរង បានលើកឡើងថា វគ្គនេះពិតជាសំខាន់ណាស់ដើម្បីបង្កើនធនធានគ្រូបង្វឹកនៅក្នុងប្រទេសកម្ពុជា។ សិក្ខាកាមចូលរួមបានត្រឹមតែ ៣០ នាក់ប៉ុណ្ណោះដោយសារកង្វះថវិកា។ សិក្ខាកាមភាគជាគ្រូបង្គោលមកពីតាមបណ្តាលសាលាគុន សមាគម និងក្លិប ប៉ុន្តែនៅមានគ្រូជំនួយជាច្រើនទៀតដែលមិនបានចូលរួម។ សហព័ន្ធពិតចង់បើកវគ្គបណ្តុះបណ្តាលឲ្យបានច្រើនបន្ថែមនៅតាមបណ្តាខេត្តនានា ប៉ុន្តែដោយសារកង្វះថវិកាទើបមិនទាន់អាចដំណើរតាមការចង់បាន។

ទោះបីជាយ៉ាងណា តំណាងសហព័ន្ធរូបនេះបានសង្កត់ធ្ងន់ថា រឿងសំខាន់ចាំបាច់បំផុតនៅចំពោះមុខគឺសិក្ខាកាមដែលទទួលបានចំណេះដឹងពី វគ្គបណ្តុះបណ្តាលនេះគឺចែករំលែកដល់គ្រូជំនួយ និងអ្នកពាក់ព័ន្ធផ្សេងៗទៀតឲ្យបានទូលំទូលាយ។

សូមបញ្ជាក់ថា សហព័ន្ធកីឡាការ៉ាតេកម្ពុជា ដឹកនាំដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ៕