ប្រធានាធិបតី ម៉ិកស៊ិក បញ្ជាឲ្យស៊ើបអង្កេតប្រធាន MU ភ្លាមៗ

កាសែត The Inquirer បានរាយការណ៍ថា ប្រធានាធិបតីម៉ិកស៊ិកបានស្នើសុំការស៊ើបអង្កេតជាបន្ទាន់ ដើម្បីបញ្ជាក់ការចោទប្រកាន់ប្រឆាំងនឹងអ្នកជំនួញ Raul Rocha ដែលជាម្ចាស់កម្មវិធី Miss Universe (MU) ព្រមទាំងរឿងអាស្រូវអំពីពានរង្វាន់នៅក្នុងការប្រកួតបវរកញ្ញាចក្រវាលឆ្នាំ ២០២៥ នៅលើទឹកដីនៃប្រទេសថៃកន្លងមក។

លើសពីនេះ ប្រធានាធិបតីម៉ិកស៊ិកក៏បាននិយាយអំពីការសង្ស័យថា រដ្ឋាភិបាលបានជ្រៀតជ្រែកក្នុងជ័យជម្នះរបស់បវរកញ្ញា Fátima Bosch។ បន្ទាប់ពីបានគ្រងមកុដ នាងបានទទួលការចោទប្រកាន់ជាហូរហែរថា ដោយសារតែពេញចិត្តពេញថ្លើម និងមានខ្សែអ្នកធំបើកផ្លូវឲ្យនាង។

ទោះជាយ៉ាងណាក៏ដោយ នៅក្នុងអំឡុងពេលសន្និសីទសារព័ត៌មាន ប្រធានាធិបតីម៉ិកស៊ិក Claudia Sheinbaum ត្រូវបានអ្នកយកព័ត៌មានសួរថា តើលោកស្រី ឬភ្នាក់ងារណាមួយនៅក្នុងជួររដ្ឋាភិបាល ពិតជាបានជ្រៀតជ្រែកក្នុងលទ្ធផលនៃការប្រកួតបវរកញ្ញាចក្រវាលឆ្នាំ ២០២៥ ដើម្បីបើកផ្លូវឲ្យបវរកញ្ញា Fátima Bosch ឈ្នះមកុដឬអត់?

លោកស្រី Claudia បានឆ្លើយតបថា «វាមិនសមហេតុផលទេ! ជាក់ស្តែងទេ វាខុសទាំងស្រុង ហើយលើសពីនេះទៅទៀត មនុស្សមិនគួរព្រួយបារម្ភអំពីរឿងបែបនេះទេ»។

ក្រោយមក ក្រសួងការបរទេសហ្គាតេម៉ាឡា បានសម្រេចដកលោក Raul Rocha Cantú ចេញពីតំណែងជាកុងស៊ុលកិត្តិយស ដោយសារតែការរំលោភលើបទប្បញ្ញត្តិ និងបញ្ហាផ្លូវច្បាប់។

ក្រសួងការបរទេសហ្គាតេម៉ាឡា បាននិយាយថា ក្នុងក្របខ័ណ្ឌនៃការវាយតម្លៃជាប្រចាំរបស់កុងស៊ុលកិត្តិយស អង្គការនេះបានទទួលរបាយការណ៍ពីស្ថានទូតហ្គាតេម៉ាឡាប្រចាំប្រទេសម៉ិកស៊ិក ដោយបញ្ជាក់ថា លោក Raul Rocha Cantú បានផ្លាស់ប្តូរទីស្នាក់ការកណ្តាលរបស់គាត់ ដោយមិនបានជូនដំណឹងជាមុន ឬការអនុញ្ញាត។

លោក Raul Rocha ត្រូវបានអនុញ្ញាតធ្វើជាកុងស៊ុលកិត្តិយសនៅក្នុងទីក្រុង Toluca de Lerdo ប៉ុណ្ណោះ ខណៈដែលប្រទេសហ្គាតេម៉ាឡាមានស្ថានកុងស៊ុលផ្លូវការនៅទីក្រុងម៉ិកស៊ិករួចហើយ ដូច្នេះក្រសួងការបរទេសហ្គាតេម៉ាឡា បានសម្រេចចិត្តដកលោក ចេញពីតំណែងជាកុឲ្យងស៊ុលកិត្តិយស បន្ទាប់ពីបានរកឃើញការរំលោភលើបទប្បញ្ញត្តិ។

ក្រសួងការបរទេសហ្គាតេម៉ាឡា បានសង្កត់ធ្ងន់ថា កុងស៊ុលកិត្តិយសមិនមែនជាអ្នកការទូតទេ ប៉ុន្តែគ្រាន់តែជាតំណាងប្រទេសមួយនៅក្នុងតំបន់ជាក់លាក់មួយ ជាធម្មតាដើម្បីគាំទ្រពលរដ្ឋ លើកកម្ពស់ពាណិជ្ជកម្ម វប្បធម៌តែប៉ុណ្ណោះ។

ពីមុន លោក Raul Rocha ត្រូវបានចោទប្រកាន់ដោយការិយាល័យរដ្ឋអាជ្ញាម៉ិកស៊ិក (FGR) ពីបទជាប់ពាក់ព័ន្ធនឹងការជួញដូរអាវុធ និងសហការជាមួយឧក្រិដ្ឋកម្មដែលបានរៀបចំ។ លោកបានចូលរួមក្នុងកម្មវិធីការពារសាក្សីរបស់ FGR ដើម្បីផ្តល់ព័ត៌មានពាក់ព័ន្ធអំពីសកម្មភាពឧក្រិដ្ឋកម្មជាថ្នូរនឹងអត្ថប្រយោជន៍នីតិវិធី។

ទន្ទឹមនឹងនេះ តុលាការថៃបានចេញដីកាចាប់ខ្លួនមហាសេដ្ឋីប្តូរភេទ Anne Jakrajutatip – អតីតនាយកប្រតិបត្តិនៃ Miss Universe បន្ទាប់ពីនាងបានរត់គេចខ្លួន ហើយមិនបានបង្ហាញខ្លួននៅតុលាការ។ ឥឡូវនេះ អ្នកស្រី Anne ត្រូវបានគេជឿថាបានរត់គេចខ្លួនទៅកាន់ប្រទេសម៉ិកស៊ិក ដោយមានជំនួយពីលោក Raul ថែមទៀតផង។

ដោយសារថ្នាក់ដឹកនាំជាន់ខ្ពស់ពីររូបមានបញ្ហាជាមួយច្បាប់ ទស្សនិកជនមានការព្រួយបារម្ភអំពីជោគវាសនារបស់ស្ថាប័ន Miss Universe ខណៈបច្ចុប្បន្នត្រូវបានគ្រប់គ្រងដោយលោក Mario Bucaro នាយកប្រតិបត្តិថ្មី។ ជាងនេះទៀតដែរ ភាពវឹកវរដែលកំពុងកើតឡើង ក៏ធ្វើឲ្យមនុស្សជាច្រើនព្រួយបារម្ភអំពីអាណត្តិរបស់ Fatima Bosch។ នាងត្រូវបានគេចាត់ទុកថាមានឆ្នាំដ៏លំបាកមួយ ក្នុងការប្រឈមមុខនឹងរលកនៃប្រតិកម្មពីសាធារណជន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

​ម៉ិកស៊ិក ស៊ើបអង្កេតម្ចាស់ស្ថាប័ន «បវរកញ្ញា​ចក្រវាល» ពីបទជួញដូរគ្រឿងញៀន និងរត់ពន្ធអាវុធ