ព័ត៌មានជាតិ

អាជ្ញាធរខេត្តមណ្ឌលគិរី លើកកម្ពស់គុណភាពផ្លូវភូមិពីផ្លូវក្រួសក្រហមទៅជាផ្លូវបេតុង សម្រួលការធ្វើដំណើរ

បានផុស

៥ ខែ មុន

នៅ

ថ្ងៃអង្គារ ២ ធ្នូ ២០២៥

ដោយ

ផ្លូវក្រាលក្រួសក្រហមមួយខ្សែប្រវែង ៦០០ ម៉ែត្រ ស្ថិតនៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ត្រូវបានអាជ្ញាធរលើកកម្ពស់កម្រិតគុណភាពប្រែក្លាយទៅជាផ្លូវបេតុងដែលមានគុណភាព ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋាន។ ផ្លូវនេះត្រូវបានជួសជុលទៅជាផ្លូវបេតុងដោយទទឹងខ្នងលើ៥ម៉ែត្រ កម្រាស០,១៥ម៉ែត្រ និងដាក់លូទោលកាត់ផ្លូវមុខ៨០០មីលីម៉ែត្រ ប្រវែង៧ម៉ែត្រ កម្រាស ០,១៥ម៉ែត្រ ដែលបានចំណាយកញ្ចប់ថវិការរបស់រដ្ឋបាលស្រុកអូររាំង។

លោក សៀក មុន្នី អភិបាលស្រុកអូររាំង ប្រាប់កម្ពុជាថ្មីថា ក្រុមការងារជំនាញបានចាប់ផ្តើមស្ថាបនាផ្លូវនេះ តាំងពីថ្ងៃទី ២៥ ខែវិច្ឆិកា ឆ្នាំ ២០២៥ ដោយគិតមកដល់ថ្ងៃទី ១ ខែធ្នូនេះ បានលេចចេញជារូបរាងផ្លូវបេតុងបណ្តើរៗហើយ។ លោកបញ្ជាក់ថា វឌ្ឍនភាពហេដ្ឋារចនាសម្ព័ន្ធសមិទ្ធផលថ្មីៗជាច្រើននេះ គឺជាការខឹតខំប្រមុខរាជដ្ឋាភិបាល ក៏ជាថ្នាក់ដឹកនាំខេត្ត ដើម្បីផ្ដល់ភាពងាយស្រួល និងតម្រូវការជូនប្រជាពលរដ្ឋក្នុងការធ្វើដំណើរ ក៏ដូចជាដឹកកសិផលផ្សេងៗទៅកាន់ទីផ្សារប្រកបដោយសុខសុវត្ថិភាព។

ទន្ទឹមនេះ លោកបានក្រើនរំលឹកដល់ក្រុមហ៊ុនទទួលបានសិទ្ធិសាងសង់ត្រូវគោរពទៅតាមកិច្ចសន្យា សាងសង់ផ្លូវទៅតាមស្តង់ដាបច្ចេកទេសប្រកបដោយគុណភាព។ លោកបញ្ជាក់ថា៖«បើអាជ្ញាធរពិនិត្យមើល ឃើញថាសាងសង់ផ្ទុយពីអ្វីដែលជាកិច្ចព្រមព្រៀង រដ្ឋបាលស្រុកនឹងបញ្ឈប់ការសាងសង់ភ្លាម ហើយនឹងរកក្រុមហ៊ុនថ្មីមកសាងសង់ជំនួសវិញ»។

កញ្ញា ធឿន ធីដា ជាពលរដ្ឋរស់នៅភូមិពូទ្រូក្រោម ឃុំសែនមនោរម្យ ស្រុកអូររាំង បានឱ្យដឹងផងថា កន្លងមកផ្លូវនេះមានស្ថានភាពលំបាកខ្លាំងណាស់ជាពិសេសនារដូវវស្សាដែលធ្វើឱ្យប្រជាពលរដ្ឋធ្វើដំណើរ ក៏ដូចជាដឹកកសិផលប្រឈមនឹងគ្រោះថ្នាក់។ យុវតីបញ្ជាក់ថា៖« ក្នុងនាមពលរដ្ឋរស់ក្នុងភូមិពិតជាសប្បាយចិត្តពេលឃើញអាជ្ញាធរយកចិត្តទុកដាក់លើកកម្ពស់គុណភាពផ្លូវ ព្រោះកន្លងមកពលរដ្ឋធ្វើដំណើរតាមផ្លូវនេះពិបាក ជាពិសេសនៅរដូវវស្សា»។

ទន្ទឹមនេះ ធឿន ធីដា បានថ្លែងអំណរគុណទៅដល់រាជរដ្ឋាភិបាលជាពិសេសថ្នាក់ដឹកនាំខេត្តអាជ្ញាធរគ្រប់លំដាប់ថ្នាក់ ដែលតែងតែគិតគូរយកចិត្តទុកដាក់ដល់សុខទុក្ខរបស់ប្រជាពលរដ្ឋតាមទីជនបទ និងបានប្រែក្លាយជាផ្លូវដីលំបាកឱ្យទៅជាផ្លូវក្រាលក្រួសក្រហមពីផ្លូវក្រាលក្រួសក្រហមទៅជាផ្លូវបេតុងធ្វើឱ្យប្រជាពលរដ្ឋធ្វើដំណើរប្រកបដោយសុខសុវត្ថិភាព និងលើកស្ទួយជីវភាពរស់នៅពលរដ្ឋក្នុងមូលដ្ឋានថែមមួយកម្រឹតទៀតផង៕

អត្ថបទ៖ រៀម សុខហេង