ជួបសម្ដេចធិបតី ឯកអគ្គរដ្ឋទូតឆែកប្តេជ្ញាជំរុញទំនាក់ទំនងជាមួយកម្ពុជាឱ្យកាន់តែរីកចម្រើន

នៅក្នុងជំនួបជាមួយនាយករដ្ឋមន្ត្រីកម្ពុជា នៅថ្ងៃទី២ ខែធ្នូ ឆ្នាំ២០២៥ ឯកអគ្គរដ្ឋទូតថ្មីរបស់ឆែកប្រចាំកម្ពុជា បានបង្ហាញនូវការប្ដេជ្ញាក្នុងការជំរុញទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងឆែក ឱ្យកាន់តែរីកចម្រើនថែមទៀត។

លោកស្រី ម៉ាកេតា កូល ហៃកូវ៉ា (Markéta Kolc Hájková) ឯកអគ្គរដ្ឋទូតឆែក បានគូសបញ្ជាក់អំពីទំនាក់ទំនងដ៏យូរអង្វែង និងកិច្ចសហប្រតិបត្តិការល្អរវាងម្ពុជា និងឆែក។ ដោយក្នុងឆ្នាំ២០២៦ ជាខួប៧០ឆ្នាំនៃទំនាក់ទំនងការទូតរវាងប្រទេសទាំងពីរ លោកស្រី បានជម្រាបទៅសម្ដេចធិបតី ថា នឹងពិនិត្យលើកសំណើ ដើម្បីរៀបចំប្រារព្ធខួបនេះឱ្យបានល្អប្រសើរ។

លោកស្រី ឯកអគ្គរដ្ឋទូត គូសបញ្ជាក់ពីការប្តេជ្ញាចិត្តក្នុងការខិតខំជំរុញទំនាក់ទំនង និងកិច្ចសហប្រតិបត្តិការទ្វេភាគីកម្ពុជា និងឆែកឱ្យកាន់តែរីកចម្រើនបន្ថែមទៀត។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្វាគមន៍ និងអបអរសាទរចំពោះលោកស្រី Markéta Kolc Hájková ដែលត្រូវបានតែងតាំងជាឯកអគ្គរដ្ឋទូតប្រចាំកម្ពុជា។ សម្ដេចធិបតី មានជំនឿជឿជាក់ថា ក្នុងអាណត្តិការទូតរបស់លោកស្រី ទំនាក់ទំនង និងកិច្ចសហប្រតិបត្តិការកម្ពុជា និងឆែក នឹងកាន់តែរីកចម្រើនថែមទៀត។

សម្ដេចធិបតី និងលោកស្រីឯកអគ្គរដ្ឋទូត បានពិភាក្សាលើការបន្តជំរុញ និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យសំខាន់ៗ មានជាអាទិ៍៖ អប់រំ សុខាភិបាល សន្តិសុខ ការពារជាតិ កសិកម្ម ទេសចរណ៍ ហេដ្ឋារចនាសម្ព័ន្ធ និងបច្ចេកវិទ្យា។ បន្ថែមលើនេះ ភាគីទាំងពីរ បានឯកភាពលើកកម្ពស់ឱ្យមានការភ្ជាប់ទំនាក់ទំនងរវាងវិស័យឯកជននៃប្រទេសទាំងពីរ ដើម្បីបង្កើនកាលានុវត្តភាពបន្ថែមទៀតក្នុងការជំរុញដល់ការវិនិយោគ។

សម្ដេចធិបតី បានលើកទឹកចិត្តឱ្យលោកស្រីឯកអគ្គរដ្ឋទូត បន្តធ្វើការកាន់តែជិតស្និទ្ធថែមទៀតជាមួយក្រសួង-ស្ថាប័នពាក់ព័ន្ធកម្ពុជា៕