ក្រុមហ៊ុនទី ១ របស់កម្ពុជា ទទួល​បាន​ការវិនិយោគ​​ពី​​ក្រុមហ៊ុន​នៅ Silicon អាមេរិក​ឱ្យទៅជាក្រុមហ៊ុនកម្រិត​អន្តរជាតិ

ក្រុមហ៊ុន Bamnang Academy ត្រូវបានមជ្ឈមណ្ឌលបច្ចេកវិទ្យា Plug and Play ដែល​មានមូលដ្ឋាន​នៅ Silicon Valley សហរដ្ឋអាមេរិក ជ្រើសរើសជាក្រុមហ៊ុនទី ១ របស់កម្ពុជា ដើម្បីវិនិយោគ និងជំរុញឱ្យទៅជាក្រុមហ៊ុនកម្រិត​អន្តរជាតិ។

នៅក្នុងកម្មវិធីពានរង្វាន់ឌីជីថលកម្ពុជា ឆ្នាំ២០២៥ Bamnang Academy ត្រូវបានជ្រើសរើស​ជាជយលាភី​លេខ ២ ពានរង្វាន់រដ្ឋមន្ត្រីក្រសួងប្រៃសណីយ៍និងទូរគមនាគមន៍ ប្រចាំឆ្នាំ២០២៥ ពីក្នុងចំណោមធុរកិច្ចថ្មីនិងក្រុមហ៊ុន ៨៦ ដែលបានចូលរួមប្រកួតប្រជែង។ ពិធីប្រកាសពានរង្វាន់ឆ្នាំនេះ ចូលរួមដោយថ្នាក់ដឹកនាំក្រសួងស្ថាប័ន ធុរកិច្ចថ្មីឌីជីថលអាស៊ាន និងភ្ញៀវបរទេសមកពីប្រមាណ ២៧ ប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា វ៉ាន់ដេត រដ្ឋមន្រ្តីក្រសួង​ប្រៃសណីយ៍និងទូរគមនាគមន៍​បាន​គូស​បញ្ជាក់ថា ការសម្រេចចិត្តរបស់ Plug and Play វិនិយោគលើ​ក្រុមហ៊ុន​ Bamnang Academy ស្ដែង​ឱ្យឃើញពីលទ្ធផលនៃកិច្ចខិតខំរបស់គ្រប់ភាគគីពាក់ព័ន្ធក្នុងការកសាង​បរិយាកាស​អំណោយផល​សម្រាប់​អ្នក​មានសមត្ថភាព​ក្នុង​ការចាប់​ឱកាស​រីកចម្រើន​ ទាំងក្នុងស្រុង​ និងសាកលលោក។​

ការវិនិយោគនេះគឺជាសមិទ្ធផលដ៏សំខាន់ សម្រាប់ប្រព័ន្ធអេកូឡូស៊ីធុរកិច្ចថ្មីឌីជីថល​របស់​កម្ពុជា​ដែលកំពុងរីកចម្រើន និងឆ្លុះបញ្ចាំងពីសមត្ថភាពលេចធ្លោរបស់ធុរជនកម្ពុជាក្នុងវិស័យបច្ចេកវិទ្យាឌីជីថល។​​​

ក្នុង​ឱកាស​នោះ លោក David L.Almirol អនុរដ្ឋមន្ត្រី​ ក្រសួងបច្ចេកវិទ្យាគមនាគមន៍និងព័ត៌មាន (DICT) នៃសាធារណរដ្ឋហ្វ៊ីលីពីន​ បានផ្ដល់​ការលេីកទឹកចិត្តជាប្រាក់រង្វាន់ដល់ក្រុមហ៊ុន​ Jobify និង​ Bamnang ចំនួន​ ១ ម៉ឺនដុល្លារ​ ក្នុង​ ១ ក្រុម​ហ៊ុន។

Plug and Play គឺជាក្រុម​ពន្លឿន​ធុរកិច្ចថ្មី (Startup Accelerator) ដ៏ល្បីល្បាញ​បំផុតមួយក្នុងពិភពលោក ដែលមាន​ស្នាដៃជួយស្ថាបនិកអាជីវកម្មដំណាក់កាលដំបូងឱ្យរីកចម្រើនក្លាយជា​ Unicorns​ (ធុរកិច្ចថ្មីដែលមានតម្លៃសរុបលើសពី ១ ពាន់ លានដុល្លារ) ជាង 30 នៅទូទាំងពិភពលោក។

ក្រុម​ហ៊ុន​ Google ក៏បានពង្រីកខ្លួនចេញពីការគាំទ្ររបស់​ Plug and Play ផងដែរ។​ ប្រព័ន្ធអេកូឡូស៊ីរបស់​ Plug and Play ភ្ជាប់ស្ថាបនិកអាជីវកម្មជាមួយអ្នកវិនិយោគធំៗ ដៃគូក្រុមហ៊ុន និងប្រឹក្សាយោបល់លំដាប់ពិភពលោក ដែលផ្ដល់មូលដ្ឋានរឹងមាំដល់ធុរកិច្ចថ្មីឱ្យពង្រីកអាជីវកម្មបានលឿនជាងមុន ច្នៃប្រឌិតដោយក្លាហាន និងឈានដល់សក្ដានុពលដែលមានតម្លៃរាប់ពាន់លានដុល្លារ។

Bamnang Academy ត្រូវបានបង្កើតដោយអតីតនិស្សិត ៣នាក់ ដែលរៀននៅសាកលវិទ្យាល័យអាមេរិកាំងភ្នំពេញ និងនៅសហរដ្ឋអាមេរិក៕