លោក ហ្សេលេនស្គី៖ ការចរចាសន្តិភាពជាមួយអាមេរិក មិនមែនជារឿងងាយស្រួលទេ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានថ្លែងនៅក្នុងសុន្ទរកថាវីដេអូមួយកាលពីថ្ងៃអាទិត្យទី ៧ខែធ្នូថា ការពិភាក្សាជាមួយតំណាងសហរដ្ឋអាមេរិក ស្តីពីផែនការសន្តិភាពសម្រាប់ប្រទេសអ៊ុយក្រែន មានលក្ខណៈស្ថាបនា ក៏ប៉ុន្តែមិនមែនជារឿងងាយស្រួលដូចការគិតនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយពីសារព័ត៌មាន Reuters លោកហ្សេលេនស្គី បានទូរស័ព្ទកាលពីថ្ងៃសៅរ៍ជាមួយបេសកជនពិសេសរបស់ប្រធានាធិបតីអាមេរិក ដូណាល់ ត្រាំ លោក Steve Witkoff និងកូនប្រសាត្រាំគឺ Jared Kushner ហើយត្រូវបានគេរំពឹងថានឹងជួបជាមួយមេដឹកនាំបារាំង អង់គ្លេស និងអាល្លឺម៉ង់នៅថ្ងៃចន្ទនៅទីក្រុងឡុងដ៍។ កិច្ចពិភាក្សាបន្ថែមទៀតត្រូវបានគ្រោងធ្វើនៅទីក្រុងប្រ៊ុចសែលផងដែរ។

ប្រធានាធិបតីអ៊ុយក្រែនបានមានប្រសាសន៍ទៀតថា «យើងបានពិភាក្សាអំពីទិដ្ឋភាពជាច្រើន ដោយស៊ើបអង្កេតលើចំណុចសំខាន់ៗដែលអាចធានាបាននូវការបញ្ចប់ការបង្ហូរឈាម និងលុបបំបាត់ការគំរាមកំហែងនៃការវាយប្រហារទ្រង់ទ្រាយធំថ្មីរបស់រុស្ស៊ី។ ភាគីទាំងពីរក៏បានឯកភាពគ្នាលើជំហានបន្ទាប់ និងទម្រង់សម្រាប់ការចរចាជាមួយសហរដ្ឋអាមេរិកផងដែរ»។

មិនតែប៉ុណ្ណោះ ភាគីទាំងពីរក៏បានពិភាក្សាអំពីហានិភ័យនៃប្រទេសរុស្ស៊ីមិនបំពេញកាតព្វកិច្ចរបស់ខ្លួន។ លោកបានបន្ថែមថា មិនមែនអ្វីៗទាំងអស់អាចត្រូវបានពិភាក្សាតាមទូរស័ព្ទនោះទេ។ ដូច្នេះយើងត្រូវធ្វើការយ៉ាងជិតស្និទ្ធជាមួយក្រុមរបស់យើងលើគំនិត និងសំណើ។

ថ្វីដ្បិតតែយ៉ាងនេះក្ដី ថ្ងៃដដែលនោះលោកត្រាំបានសម្តែងការខកចិត្តជាមួយសមភាគីអ៊ុយក្រែន ចំពោះការមិនចូលរួមក្នុងផែនការបញ្ចប់ការប្រយុទ្ធ។ លោកបានប្រាប់អ្នកយកព័ត៌មានថា ខ្លួនបាននិយាយជាមួយប្រធានាធិបតីរុស្ស៊ី និងថ្នាក់ដឹកនាំអ៊ុយក្រែន រួមទាំងប្រធានាធិបតីហ្សេលេនស្គី ផងដែរ។ ប៉ុន្តែរហូតដល់ពេលនេះ លោកមិនទាន់បានអានសំណើសន្តិភាពពីប្រធានាធិបតីអ៊ុយក្រែននៅឡើយទេ។

ទោះបីជាមានការសម្របសម្រួលពីអាមេរិក និងការទំនាក់ទំនងកម្រិតខ្ពស់តាមកាលកំណត់ក៏ដោយ ក៏វឌ្ឍនភាពក្នុងកិច្ចចរចាសន្តិភាពមានភាពយឺតយ៉ាវ ដោយជម្លោះជុំវិញការធានាសន្តិសុខសម្រាប់ទីក្រុងកៀវ និងស្ថានភាពនៃទឹកដីដែលកាន់កាប់ដោយរុស្ស៊ី នៅតែមិនទាន់ដោះស្រាយបាន។

ទីក្រុងមូស្គូនិយាយថា ខ្លួនបើកចំហចំពោះការចរចា និងស្តីបន្ទោសទីក្រុងកៀវ និងលោកខាងលិចចំពោះការរារាំងសន្តិភាព ខណៈដែលអ៊ុយក្រែន និងសម្ព័ន្ធមិត្តនិយាយថា រុស្ស៊ីកំពុងជាប់គាំង និងប្រើប្រាស់ការទូតដើម្បីពង្រឹងផលប្រយោជន៍របស់ខ្លួន។

ដោយឡែក មេដឹកនាំអ៊ឺរ៉ុបបានគាំទ្រដំណើរការការទូតជាជំហានៗសម្រាប់អ៊ុយក្រែន ដោយភ្ជាប់ទៅនឹងការធានាសន្តិសុខរយៈពេលវែង និងជំនួយយោធាប្រកបដោយនិរន្តរភាព។ ទោះជាយ៉ាងនេះក្តី លោកត្រាំបានផ្តោតលើការព្រមព្រៀងគ្នាយ៉ាងឆាប់រហ័ស និងការចែករំលែកបន្ទុក ហើយអ្នកការទូតបានព្រមានថា កិច្ចពិភាក្សាណាមួយនៅតែផុយស្រួយ និងងាយរងគ្រោះចំពោះការផ្លាស់ប្តូរនៅក្នុងនយោបាយសហរដ្ឋអាមេរិក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អតីតអ្នកនាំពាក្យ ហ្សេលេនស្គី ភ័យខ្លាចលោក Yermak ទោះអស់តំណែង តែមានឥទ្ធិពលមិនធម្មតា