សេដ្ឋកិច្ច

ការដោះដូរទំនិញកម្ពុជា-អង់គ្លេស សម្រេចបាននូវទំហំទឹកប្រាក់ជិត ១ ពាន់លានដុល្លារ ត្រឹមរយៈពេល ១១ខែ

បានផុស

៧ ខែ មុន

នៅ

ថ្ងៃសៅរ៍ ១៣ ធ្នូ ២០២៥

ដោយ

ការដោះដូរទំនិញកម្ពុជា-អង់គ្លេសសម្រេចបានទំហំទឹកប្រាក់ជាង ៩៨១ លានដុល្លារនៅក្នុងរយៈពេល ១១ ខែ ឆ្នាំ ២០២៥ កើនឡើង ៥,៣ ភាគរយ ធៀបនឹងរយៈពេលដូចគ្នានៅក្នុងឆ្នាំ ២០២៤ ដែលមានទំហំ ៩៣២ លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បង្ហាញថា គិតចាប់ពីខែមករា ដល់ខែវិច្ឆិកា ឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អង់គ្លេសសរុបចំនួន ៩៨១ លានដុល្លារ កើន ៥,៣% ក្នុងនោះកម្ពុជានាំទំនិញចេញទៅអង់គ្លេសមានទំហំទឹកប្រាក់ ៩៣៣ លានដុល្លារ កើន ៥,៣% ចំណែកអង់គ្លេសនាំចូលមកវិញមានតម្លៃ ៤៨ លានដុល្លារ កើន ៥%។ ផលិតផលសំខាន់ៗ ដែលកម្ពុជា នាំទៅអង់គ្លេសមានដូចជាសម្លៀកបំពាក់ ស្បែកជើង កង់ជាដើម។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា កម្ពុជា និងចក្រភពអង់គ្លេសមានទំនាក់ទំនងជិតស្និទ្ធលើគ្រប់វិស័យ ជាពិសេសក្នុងវិស័យពាណិជ្ជកម្ម និងវិនិយោគ។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ប្រាប់កម្ពុជាថ្មីថា ពាណិជ្ជកម្មទ្វេភាគីកម្ពុជា-អង់គ្លេស មានលក្ខណៈល្អប្រសើរនៅឆ្នាំនេះ ដែលយើទទួលបានការអនុគ្រោះពន្ធពីអង់គ្លេស ពិសេសគឺការនាំចេញវិស័យវាយនភណ្ឌ កាត់ដេរ និងគ្រឿងបង្គុំអគ្គិសនី នាំចេញទៅអង់គ្លេសក្នុងអត្រាសូន្យភាគរយ។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-អង់គ្លេសសម្រេចបានទឹកប្រាក់ ១ ពាន់លានដុល្លារ កើនឡើង ១៦ ភាគរយ ក្នុងនោះកម្ពុជានាំចេញទៅអង់គ្លេសមានទំហំ ៩៥៨,៧៥ លានដុល្លារ កើន ២០,៤ ភាគរយ និងអង់គ្លេសនាំចូលមកកម្ពុជាវិញ មានទំហំទឹកប្រាក់ ៥៣,៧ លានដុល្លារ ធ្លាក់ចុះជិត ៣០ ភាគរយ៕

អត្ថបទ៖ ឡេង ដេត